ଡେରାଡୁନ୍,୨୨ା୭: ଉତ୍ତରାଖଣ୍ଡ ଉତ୍ତରକାଶୀ ଜିଲାର ୧୩୨ ଗାଁରେ ୩ମାସ ମଧ୍ୟରେ ଆଦୌ ଝିଅ ଜନ୍ମ ହୋଇନାହାନ୍ତି। ଏହି ସମୟ ମଧ୍ୟରେ ଜନ୍ମିତ ସମସ୍ତ ୨୧୬ ଶିଶୁ ପୁଅ। କେନ୍ଦ୍ର ସରକାର ‘ବେଟି ବଚାଓ ବେଟି ପଢ଼ାଓ’ ଯୋଜନା କାର୍ଯ୍ୟକାରୀ କରୁଥିବାବେଳେ ଗତ ୩ ମାସ ମଧ୍ୟରେ ଏହିସବୁ ଅଞ୍ଚଳରେ କନ୍ୟା ଶିଶୁ ଜନ୍ମ ନ ହେବା ଜିଲା ପ୍ରଶାସନ ପାଇଁ ସମସ୍ୟା ସୃଷ୍ଟି କରିଛି। ଏହି ଯୋଜନା ଏଠାରେ ଆଦୌ କାର୍ଯ୍ୟକାରୀ ହେଉ ନ ଥିବା ସୂଚନା ମିଳୁଛି।
ଏ ସମ୍ପର୍କରେ ଜିଲାପାଳ ଡ. ଆଶିଷ ଚୌହାନଙ୍କ କହିବା କଥା ହେଲା, ଯେଉଁସବୁ ଅଞ୍ଚଳରେ ଆଦୌ ଝିଅ ଜନ୍ମ ହୋଇନାହାନ୍ତି କିମ୍ବା ଝିଅ ଜନ୍ମ ସଂଖ୍ୟା ଖୁବ୍ କମ୍ ସେ ସବୁ ଅଞ୍ଚଳକୁ ଚିହ୍ନଟ କରାଯାଉଛି। ଏହା ପଛରେ କାରଣ ତର୍ଜମା କରାଯିବା ସହ ବିସ୍ତୃତ ସର୍ବେକ୍ଷଣ କରାଯିବ ବୋଲି ସେ କହିଛନ୍ତି। ସେହିସବୁ ଅଞ୍ଚଳରେ ଆଶାକର୍ମୀମାନେ କନ୍ୟାସନ୍ତାନ ସମ୍ପର୍କରେ ସଚେତନତା ସୃଷ୍ଟି କରିବା ସହ ଲିଙ୍ଗ ଅସମାନତା ସମ୍ପର୍କରେ ରିପୋର୍ଟ ପ୍ରସ୍ତୁତ କରି ଦାଖଲ କରିବାକୁ ଜିଲାପାଳ ପରାମର୍ଶ ଦେଇଛନ୍ତି। ସାମାଜିକ କର୍ମୀ କଳ୍ପନା ଠାକୁର କହିଛନ୍ତି, ଶିଶୁକନ୍ୟା ଆଦୌ ଜନ୍ମ ନ ହେବା ପଛରେ ଭ୍ରୂଣହତ୍ୟା ମୁଖ୍ୟ କାରଣ। ସରକାର ଏବଂ ପ୍ରଶାସନ ଏ ଦିଗରେ କିଛି କରୁନାହାନ୍ତି। ସେହିପରି ବରିଷ୍ଠ ଖବରଦାତା ଶିବ ସିଂ ଥନଭାଲ୍ କହିଛନ୍ତି, ଭ୍ରୂଣହତ୍ୟା ଯୋଗୁ କେବଳ ପୁଅ ଜନ୍ମ ହେଉଛନ୍ତି। ଏହି କୁପ୍ରଥାର ମୂଳପୋଛ ପାଇଁ ପ୍ରଶାସନ ଦୃଢ଼ ପଦକ୍ଷେପ ନେବା ଆବଶ୍ୟକ ।
