ନୂଆଦିଲ୍ଲୀ, ୮।୮:ଜମ୍ମୁ-କଶ୍ମୀରରୁ ୩୭୦ ଅନୁଚ୍ଛେଦ ଉଠିବା ଏବଂ ରାଜ୍ୟକୁ ଦୁଇଭାଗ କରି ୨ଟି କେନ୍ଦ୍ର ଶାସିତ ଅଞ୍ଚଳ କରିବାକୁ କେନ୍ଦ୍ର ସରକାରଙ୍କ ନିଷ୍ପତ୍ତିକୁ ସ୍ବାଗତ କରିଛନ୍ତି ଦେଶବାସୀ। କିଛି ରାଜନୈତିକ ଦଳ ପକ୍ଷରୁ ଏହାକୁ ବିରୋଧ କରାଯାଉଥିଲେ ମଧ୍ୟ ମୋଟାମୋଟି ଭାବେ ଅନେକ ଏହାକୁ ସମର୍ଥନ କରୁଛନ୍ତି। ମଙ୍ଗଳବାର ଏହି ପ୍ରସଙ୍ଗକୁ ନେଇ ସଂସଦରେ ଜୋରଦାର୍ ଚର୍ଚ୍ଚା ହୋଇଥିଲା। କିନ୍ତୁ ଲଦାଖର ପ୍ରତିନିଧିତ୍ୱ କରୁଥିବା ୩୪ ବର୍ଷୀୟ ଭାଜପା ଏମ୍ପି ଜମୟାଙ୍ଗ ସେରିଂ ନାଗ୍ୟାଲ ଲୋକ ସଭାରେ ରଖିଥିବା ମତ ସୋସିଆଲ ମିଡିଆରେ ବେଶ୍ ଭାଇରାଲ୍ ହୋଇଛି। ବାଚସ୍ପତିଙ୍କଠାରୁ ଆରମ୍ଭ କରି ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ପର୍ଯ୍ୟନ୍ତ ତାଙ୍କ ଭାଷଣକୁ ପ୍ରଶଂସା କରିଥିଲେ। ରାତାରାତି ସାରା ଦେଶରେ ଏକ ସେଲିବ୍ରିଟି ହୋଇଯାଇଥିଲେ ସେରିଂ। ଏହାର ଫଳସ୍ବରୂପ ତାଙ୍କ ସୋସିଆଲ ମିଡିଆ ଫେସବୁକରେ ବହୁ ସଂଖ୍ୟାରେ ବନ୍ଧ୍ବତ୍ୱ ପ୍ରସ୍ତାବ ଆସିଲା। ବାଧ୍ୟ ହୋଇ ସେ ଆଉ କାହାର ବନ୍ଧୁତ୍ୱ ସ୍ବୀକାର କରିପାରିବେ ନାହିଁ ବୋଲି ଘୋଷଣା କଲେ। ସେ ସ୍ପଷ୍ଟ କରିଥିଲେ ଯେ, ‘ଆଉ ଫ୍ରେଣ୍ଡ ରିକ୍ୱେଷ୍ଟ ଆକ୍ସେପ୍ଟ କରିପାରିବି ନାହିଁ, କାରଣ ଏହାର ଲିମିଟ ମାତ୍ର ୫ ହଜାର। ତେଣୁ ଆପଣ ବଟନ ଦବାନ୍ତୁ ଏବଂ ମୋର ଅଫିସିଆଲ ପେଜ ସହ ସମ୍ପର୍କ ରଖନ୍ତୁ।’। ସୂଚନାଯୋଗ୍ୟ,ଜମୟାଙ୍ଗ୍ ନିଜ ଭାଷଣରେ କହିଥିଲେ, ଲଦାଖ ଅନେକ ବର୍ଷ ପୂର୍ବରୁ କେନ୍ଦ୍ର ଶାସିତ ଅଞ୍ଚଳ ହେବାକୁ ଦାବି କରି ଆସୁଥିଲା। ଆଜି ଲଦାଖ ବିକାଶଠାରୁ ଦୂରରେ ଅଛି, ସେଥିପାଇଁ ଏହି ଧାରା ୩୭୦ ଏବଂ କଂଗ୍ରେସ ଦଳ ହିଁ ଦାୟୀ ବୋଲି ସେ କହିଥିଲେ।
