ଢେଙ୍କାନାଳ ଅଫିସ, ୫।୫
କରୋନା ପ୍ରଭାବିତ ଢେଙ୍କାନାଳ ଜିଲାକୁ ଅରେଞ୍ଜ ଜୋନ୍ରେ ରଖାଯାଇଛି। ଜିଲା ସଦରରେ ଜଣେ ମହିଳାଙ୍କ ନିକଟରୁ ଏପ୍ରିଲ୍ ୯ରେ କୋଭିଡ୍-୧୯ ଭୂତାଣୁଠାବ କରାଯାଇଥିଲା। ଏହାପରେ ନୂଆ ମାମଲା ଆସିନାହିଁ। ଏହାସତ୍ତ୍ୱେ ପଡୋଶୀ ଯାଜପୁର ଏବଂ କେନ୍ଦୁଝର ଜିଲାରେ ସଂକ୍ରମଣ ବଢୁଥିବାରୁ ପ୍ରଶାସନ ପକ୍ଷରୁ ସତର୍କତାମୂଳକ ପଦକ୍ଷେପ ଗ୍ରହଣ କରାଯାଇଛି। ଜିଲାବାସୀଙ୍କୁ ସୁରକ୍ଷିତ ରଖିବାକୁ ସୋମବାର ଜିଲାପାଳ ଭୂମେଶ ଚନ୍ଦ୍ର ବେହେରା ନୂଆ ଗାଇଡ୍ଲାଇନ ଜାରି କରିଛନ୍ତି। ଏହା ୧୭ ତାରିଖ ଯାଏ ବଳବତ୍ତର ରହିବ।
ଗାଇଡ୍ ଲାଇନ୍ ଅନୁଯାୟୀ, ଜିଲାରେ ସନ୍ଧ୍ୟା ୭ଟାରୁ ସକାଳ ୭ଟା ଯାଏ ୧୪୪ ଧାରା ଜାରି କରାଯାଇଛି। ଏହି ସମୟ ମଧ୍ୟରେ କୌଣସି ଜରୁରୀ କାର୍ଯ୍ୟ ନ ଥିଲେ ଲୋକମାନେ ପଦାକୁ ବାହାରିପାରିବେ ନାହିଁ। ଗାଡି ଏବଂ ବାଇକ ଚଳାଚଳକୁ ନିଷେଧ କରାଯିବ। ସହରାଞ୍ଚଳରେ ପୂର୍ବ ନିର୍ଦ୍ଦେଶନାମା ଅନୁଯାୟୀ ସକାଳ ୭ଟାରୁ ଦିନ ୧ଟା ପର୍ଯ୍ୟନ୍ତ ଅତ୍ୟାବଶ୍ୟକ ସାମଗ୍ରୀ ଦୋକାନ ଖୋଲା ରହୁଥିଲା। ଏଥିରେ ପରିବର୍ତ୍ତନ କରାଯାଇଛି। ଏଣିକି ଦୋକାନଗୁଡ଼ିକ ଅପରାହ୍ନ ୨ଟା ଯାଏ ଖୋଲାରହିବ। ଔଷଧ ଦୋକାନକୁ କଟକଣା ମୁକ୍ତ କରାଯାଇଛି। ସେହିପରି ଜରୁରୀ କାର୍ଯ୍ୟରେ ଅନ୍ୟ ଜିଲାକୁ ଯିବାକୁ ଚାହୁଁଥିଲେ ଜିଲାପାଳଙ୍କ ପାସ୍ ଆବଶ୍ୟକ ପଡ଼ିବ ନାହିଁ। ରାଜ୍ୟ ବାହାରକୁ ଗଲେ ଢେଙ୍କାନାଳ ସଦର ଲାଗି ଜିଲାପାଳ ଏବଂ କାମାକ୍ଷାନଗର ଓ ହିନ୍ଦୋଳ ଉପଖଣ୍ଡବାସୀଙ୍କ ସ୍ଥାନୀୟ ଉପଜିଲାପାଳଙ୍କଠାରୁ ପାସ୍ ନେବାକୁ ପଡ଼ିବ। ସହରାଞ୍ଚଳରେ ନିର୍ମାଣ କାର୍ଯ୍ୟ ସହିତ ଶିଳ୍ପାନୁଷ୍ଠାନ ଚାଲିବ। କାର୍ ଏବଂ ଅଟୋରିକ୍ସାରେ ଚାଳକଙ୍କୁ ମିଶାଇ ୩ଜଣ ଯାତ୍ରୀ ଯାଇପାରିବେ। ବାଇକ୍ରେ ଆରୋହୀଙ୍କ ସମେତ ଜଣେ ମହିଳା ଯାତ୍ରା କରିପାରିବେ। ଏଥିପାଇଁ ଫାଇନ୍ ଆଦାୟ କରାଯିବନାହିଁ। ମଦ ଦୋକାନ, ବସ୍, ସିନେମା ହଲ୍, ଶପିଂ ମଲ୍, ଜିମ୍ନାସିୟମ, ସ୍ପୋର୍ଟସ କମ୍ପ୍ଲେକ୍ସ, ସୁଇମିଂପୁଲ ବନ୍ଦ ରହିବ। ସାମାଜିକ, ରାଜନୈତିକ, ସାଂସ୍କୃତିକ କାର୍ଯ୍ୟକ୍ରମ, କ୍ରୀଡ଼ା ଆୟୋଜନ ସାଙ୍ଗକୁ ଧର୍ମୀୟ ପୀଠ ଉପରେ ଶ୍ରଦ୍ଧାଳୁଙ୍କ ପ୍ରବେଶ ଉପରେ କଟକଣା ଲଗାଯାଇଛି। ରେଷ୍ଟୁରାଣ୍ଟ, ଚା ଓ ପାନ ଦୋକାନ, ସେଲୁନ, ବିୟୁଟି ପାର୍ଲର, ଜୁସ୍ ସେଣ୍ଟର, ସୁନା ଦୋକାନ, ଠେଲାଗାଡ଼ି ଖାଦ୍ୟକୁ ଅନୁମତି ଦିଆଯାଇନାହିଁ। ୬୫ବର୍ଷରୁ ଊର୍ଦ୍ଧ୍ୱ ବୟସ୍କ, ଗର୍ଭବତୀ, ୧୦ବର୍ଷରୁ କମ୍ ପିଲାଙ୍କୁ ଘରେ ରହିବା ପାଇଁ ପରାମର୍ଶ ଦିଆଯାଇଛି। ଲୋକମାନଙ୍କ ସୁବିଧାକୁ ନଜରରେ ରଖି ପ୍ରଶାସନ ପକ୍ଷରୁ ବହୁବିଧ ସୁବିଧା ପ୍ରଦାନ କରାଯାଇଛି। ଏହାକୁ ଉଲ୍ଲଂଘନ କଲେ ଆଇନ ଅନୁଯାୟୀ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ଏବେ ଲୋକମାନେ ପ୍ରଶାସନକୁ ସହଯୋଗ କରନ୍ତୁ। ସାମାଜିକ ଦୂରତ୍ୱ, ମାସ୍କ ପିନ୍ଧିବା ଉପରେ ଗୁରୁତ୍ୱ ଦିଅନ୍ତୁ। ଏହା ହେଲେ କରୋନାକୁ ରୋକିହେବ ବୋଲି ଜିଲାପାଳ ଆହ୍ବାନ ଦେଇଛନ୍ତି।
