ନୂଆଦିଲ୍ଲୀ,୨୦।୪ (ପି.ଟି.): କରୋନା ଭାଇରସ ସଂକ୍ରମଣକୁ ଦୃଷ୍ଟିରେ ରଖି ହକି ଇଣ୍ଡିଆ ଏନ ନୂଆ ପ୍ରୟାସ ଆରମ୍ଭ କରିଛି। ଅନ୍ଲାଇନ୍ରେ ମ୍ୟାଚ୍ ଅଫିସିଆଲମାନେ ପରସ୍ପର ସହିତ ବାର୍ତ୍ତାଳାପ ତଥା ଆଲୋଚନା କରିଛନ୍ତି। ହକିର ନୂଆ ନିୟମ ସହିତ ଅବଗତ ହେବା ଓ ଫିଟ୍ନେସ ବଜାୟ ରଖିବା ପାଇଁ ଅମ୍ପାୟର ଓ ଟେକ୍ନିକାଲ ଅଫିସିଆଲମାନେ ଅନ୍ଲାଇନ୍ ଇଣ୍ଟରାକ୍ଟିଭ ସେଶନ ଦ୍ୱାରା ପରସ୍ପର ସହିତ ଯୋଗାଯୋଗ କରି ଅପ୍ଡେଟ ହୋଇଛନ୍ତି। ୬ଟି ହ୍ବାଟ୍ସଆପ୍ ଗ୍ରୁପ୍ ମାଧ୍ୟମରେ ହକି ଇଣ୍ଡିଆ ଏହି ସେଶନ ଆୟୋଜନ କରିଛି। ଏଥିରେ ୩ଜଣ ଟେକ୍ନିକାଲ ଅଫିସିଆଲ ଓ ୩ ଜଣ ଅମ୍ପାୟରଙ୍କ ଗ୍ରୁପ୍ ସାମିଲ ରହିଛି। ପ୍ରତ୍ୟେକ ସପ୍ତାହର ୬ ଦିନରେ ପାଖାପାଖି ୧୦୦ ଅଫିସିଆଲା ଏଥିରେ ଅଂଶଗ୍ରହଣ କରିବା ପାଇଁ ରେଜିଷ୍ଟ୍ରେଶନ କରିଛନ୍ତି ବୋଲି ହକି ଇଣ୍ଡିଆ ତରଫରୁ କୁହାଯାଇଛି।
ଅଭିଜ୍ଞ ଟୁର୍ନାମେଣ୍ଟ ଡାଇରେକ୍ଟର, ଅମ୍ପାୟର ଓ ମ୍ୟାନେଜର ଏହି ସେଶନର ସଂଯୋଜନା କରୁଛନ୍ତି। ଏମାନଙ୍କ ମଧ୍ୟରେ ରହିଛନ୍ତି ମୋଘୁଲ ମହମ୍ମଦ ମୁନିର, କ୍ଲାଉଡିୟସନ ଡି ସେଲ୍ସ ଓ ଏଚ୍ଏସ୍ ସୋଖି। ଜି.ଏସ୍. ସଂଘ , ଜାଭେଦ ଶେଖ ଓ ଜି. ହର୍ଷ ବର୍ଦ୍ଧନ ଅମ୍ପାୟରମାନଙ୍କ ପାଇଁ ଏହି ସେଶନ ଆୟୋଜନ କରୁଛନ୍ତି। ଏହି ସେଶନ ଦ୍ୱାରା ଅଫିସିଆଲଙ୍କ ଜ୍ଞାନରେ ଉନ୍ନତି ହୋଇଛି ଓ ଆବଶ୍ୟକ ପଡିଲେ ଏମାନେ ନିଜ ନିଜର ସନ୍ଦେହ ଦୂର କରିପାରିବେ। ଖେଳାଳିଙ୍କ ଭଳି ଅଫିସିଆଲମାନେ ମଧ୍ୟ ହକି ପାଇଁ ସମାନ ଭାବେ ଗୁରୁତ୍ୱପୂର୍ଣ୍ଣ। କରୋନା ଭାଇରସ କାରଣରୁ ସାରା ଦେଶରେ ଲକ୍ଡାଉନ୍ ଜାରି ରହିଥିବା ବେଳେ ଏହି ସେଶନ ଦ୍ୱାରା ଅଫିସିଆଲମାନେ ନିଜ ଜ୍ଞାନରେ ଉନ୍ନତି ଆଣିପାରିବେ। ଅମ୍ପାୟରିଂ ଗ୍ରୁପ୍ରେ ଅଫିସିଆଲମାନେ ସେମାନଙ୍କ ଫିଟ୍ନେସ ଓ ଟ୍ରେନିଂ ସମ୍ପର୍କରେ ସୂଚନା ଦେଇପାରିବେ। ମୋଟ ଉପରେ ୩୦ ହକି ଇଣ୍ଡିଆ ମେମ୍ବର ୟୁନିଟ୍ ଏହି ସେଶନ ସଂଯୋଜନା କରୁଛନ୍ତି। ମୋଟ ଉପରେ ୧୧୦୦ ଅଫିସିଆଲ ୭୦ଟି ହ୍ବାଟ୍ସଆପ୍ ଗ୍ରୁପ୍ ମାଧ୍ୟମରେ ପରସ୍ପର ସହିତ ସମ୍ପର୍କରେ ରହିଛନ୍ତି। ମେମ୍ବର ୟୁନିଟ୍ଗୁଡିକ ଗ୍ରୁପ୍ ସୃଷ୍ଟି କରିଛନ୍ତି।
