ନୂଆଦିଲ୍ଲୀ, ୯।୮:ଲୋକ ସଭାର ଶେଷ ବେଞ୍ଚରେ ବସୁଥିବା ଲଦାଖର ଯୁବ ଏମ୍ପି ଜାମ୍ୟାଙ୍ଗ ସେରିଙ୍ଗ ନମ୍ବୟାଲ୍ ରାତାରାତି ସୋସିଆଲ ମିଡିଆର ଷ୍ଟାର୍ ପାଲଟି ଯାଇଛନ୍ତି। ଏବେ ଟୁଇଟରରେ ତାଙ୍କ ଅନୁଗାମୀଙ୍କ ସଂଖ୍ୟା ଦ୍ରୁତଗତିରେ ବଢିଚାଲିଛି। ମଙ୍ଗଳବାର ସୁଦ୍ଧା ଏହା ୪ ହଜାର ପାର୍ କରିଥିବା ଜଣାପଡ଼ିଛି। ସେହିଭଳି ଫେସ୍ବୁକରେ ମଧ୍ୟ ତାଙ୍କ ବନ୍ଧୁ ସଂଖ୍ୟା ବଢି ୫ ହଜାର ପାର୍ ହୋଇଛି। ଗତ ମଙ୍ଗଳବାର ଲୋକ ସଭାରେ ତାଙ୍କ ଅଲିଖିତ ଅଭିଭାଷଣ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ସ୍ବରାଷ୍ଟ୍ରମନ୍ତ୍ରୀ ଅମିତ ଶାହ ଓ ଅନ୍ୟ ସଦସ୍ୟଙ୍କୁ ପ୍ରଭାବିତ କରିଥିଲା। ଭାଜପାର ନିର୍ବାଚନୀ ଇସ୍ତାହାରରେ ଲଦାଖକୁ କେନ୍ଦ୍ରଶାସିତ ଅଞ୍ଚଳରେ ପରିଣତ କରିବା କଥା ଉଲ୍ଲେଖ ଥିଲା। ଏଥିପ୍ରତି ଲୋକଙ୍କ ସମର୍ଥନ ମଧ୍ୟ ରହିଥିଲା। ମୁସଲମାନ ଓ ବୌଦ୍ଧ ଧର୍ମାବଲମ୍ବୀ ମୋତେ ଏଥିଲାଗି ବିଜୟୀ କରାଇଥିଲେ ବୋଲି ଲୋକ ସଭାରେ ଲଦାଖ ଏମ୍ପି କହିବା ସହ କେନ୍ଦ୍ର ସରକାରଙ୍କ ପଦକ୍ଷେପକୁ ପ୍ରଶଂସା କରିଥିଲେ। ୩୭୦ ଧାରା ଜମ୍ମୁ-କଶ୍ମୀରରୁ ଉଚ୍ଛେଦ କରାଯିବା ଓ ଲଦାଖର ବିକାଶ ଲାଗି ଏହାକୁ କେନ୍ଦ୍ର ଶାସିତ ଅଞ୍ଚଳ କରାଯିବାକୁ ସେ ଦୃଢ ସମର୍ଥନ କରିଥିଲେ।
