ଭଞ୍ଜନଗର,୨୪।୨(ଡି.ଏନ.ଏ.)-ଗୋପାଳପୁର ଭାୟା ଭଞ୍ଜନଗର ସମ୍ବଲପୁର ରେଳ ପ୍ରକଳ୍ପ ବଜେଟରେ ଟୋକନ ମନି ବ୍ୟବସ୍ଥା ହୋଇଛି । ପ୍ରକଳ୍ପ ଆରମ୍ଭ କରିବା ନିମନ୍ତେ ଏବେ ବି ଅନେକ କାର୍ଯ୍ୟ ବାକି ଅଛି । ସମସ୍ତ ରାଜନୈତିକ ଦଳର ସହଯୋଗ ବିନା କାର୍ଯ୍ୟ ଆରମ୍ଭ ହୋଇପାରିବ ନାହିଁ। ତେଣୁ ଅଞ୍ଚଳର ହିତ ଦୃଷ୍ଟିରୁ ରାଜନୀତିରୁ ଉର୍ଦ୍ଧ୍ୱରେ ରହି ସମସ୍ତଙ୍କୁ କାର୍ଯ୍ୟ କରିବାକୁ ହେବ ବୋଲି ରବିବାର ଭଞ୍ଜନଗର ବାର ଆସୋସିଏଶନ କାର୍ଯ୍ୟାଳୟ ପରିସରରେ ଅନୁଷ୍ଠିତ ଗୋପାଳପୁର-ସମ୍ବଲପୁର ରେଳ ପ୍ରକଳ୍ପ କେନ୍ଦ୍ରୀୟ କ୍ରିୟାନୁଷ୍ଠାନ କମିଟି ବୈଠକରେ ମତପ୍ରକାଶ ପାଇଛି। ବୈଠକରେ ଗଞ୍ଜାମ, କନ୍ଧମାଳ ଜିଲାର ବିଭିନ୍ନ ବାର ଆସୋସିଏଶନ କର୍ମକର୍ତ୍ତା, ରାଜନୈତିକ ଦଳର ଲୋକ ପ୍ରତିନିଧିମାନେ ଯୋଗଦେଇ ଆଲୋଚନାରେ ଭାଗ ନେଇଥିଲେ। ଭିତ୍ତିଭୂମି ଚୂଡ଼ାନ୍ତ ହେବା ପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓଡ଼ିଶା ଆସି ପ୍ରକଳ୍ପର ଶିଳାନ୍ୟାସ କରିବାକୁ ଦଳ ପକ୍ଷରୁ ଅନୁରୋଧ କରାଯାଇଥିବା ଘୁମୁସର ସାଙ୍ଗଠନିକ ଜିଲା ସଭାପତି ଗୋକୁଳାନନ୍ଦ ମଳିକ ବୈଠକରେ ସୂଚନା ଦେଇଥିଲେ।
ବୈଠକରେ ଗୋପାଳପୁର-ସମ୍ବଲପୁର ରେଳ ପ୍ରକଳ୍ପ କେନ୍ଦ୍ରୀୟ କ୍ରିୟାନୁଷ୍ଠାନ କମିଟିର ଆବାହକ ତଥା ବାର୍ ଆସୋସିଏଶନ ସଭାପତି ଅଭିମନ୍ୟୁ ଗୌଡ଼ ଅଧ୍ୟକ୍ଷତା କରିଥିଲେ। ଭଞ୍ଜନଗର ବଣିକ ସଂଘ ସଭାପତି ମୃତ୍ୟୁଞ୍ଜୟ ସୁବୁଦ୍ଧି ପ୍ରଦୀପ ପ୍ରଜ୍ଜଳନ କରିଥିଲେ। କ୍ରିୟାନୁଷ୍ଠାନ କମିଟି ଅଧ୍ୟକ୍ଷ ଏମ୍.ତାଜ୍ ଆଦେନୀ, ଭାଜପା ନେତା ନୀଳମଣି ବିଷୋୟୀ, ସିପିଆଇଏମ୍ ଜିଲା ସମ୍ପାଦକ କୈଳାସ ଷଡ଼ଙ୍ଗୀ, ବିଜେଡ଼ି ଜିଲା ଉପସଭାପତି ରାଜେନ୍ଦ୍ର ପ୍ରସାଦ ପ୍ରଧାନ, କଂଗ୍ରେସ ଜିଲା କାର୍ଯ୍ୟକାରୀ କମିଟି ସଭାପତି ସନ୍ତୋଷ ନାୟକ, ସିପିଆଇ ରାଜ୍ୟ କାର୍ଯ୍ୟକାରୀଣି କମିଟି ସଭ୍ୟ ସୋମନାଥ ନାୟକ, ବରିଷ୍ଠ ଲେଖକ ପ୍ରଶାନ୍ତ ମହାନ୍ତି, ଅବସରପ୍ରାପ୍ତ କର୍ମଚାରୀ ସଂଘର ନେତା ଶୂଳପାଣି ଶତପଥୀ,ବଣିକ ସଂଘ ସମ୍ପାଦକ ସୁଶାନ୍ତ ମହାପାତ୍ର, ଆଇନଜୀବୀ ରବି ଦାସ, ବୈଦ୍ୟନାଥ ସାହୁ, ଫୁଲବାଣୀ ବାର୍ ଆସୋସିଏଶନ ସଭାପତି ଅଶିମ ପ୍ରହରାଜ, ବ୍ରହ୍ମପୁର ବାର ଆସୋସିଏଶନ ସମ୍ପାଦକ କୈଳାସ ପାଣିଗ୍ରାହୀ, ଆସିକା ବାର ଆସୋସିଏଶନ ସଭାପତି ସରୋଜ କୁମାର ତ୍ରିପାଠୀ, ବାଲିଗୁଡ଼ା ବାର୍ ଆସୋସିଏଶନ ସଭାପତି କୌଶିକ ସାହୁ, ଛତ୍ରପୁର ଓକିଲ ସଂଘର ସଭ୍ୟ ପର୍ଶୁରାମ ଗୌଡ଼, ସୂଚନାକର୍ମୀ ବି.ଶଙ୍କର ପାତ୍ର ପ୍ରମୁଖ ଯୋଗଦେଇ ନିଜ ନିଜର ମତ ରଖିଥିଲେ । ସମ୍ପାଦକ ଅଶୋକ ଜେନା ଧନ୍ୟବାଦ ଅର୍ପଣ କରିଥିଲେ । ସଭା ପୁର୍ବରୁ ବାର୍ ଆସୋସିଏଶନ କର୍ମକର୍ତା ସହରରେ ଏକ ଶୋଭାଯାତ୍ରା କରିଥିଲେ ।
ପୂର୍ବତନ କାଉସିଲର ଡ଼ି. ଚେଲପତି ରାଓଙ୍କ ସମେତ ବାର ଆସୋସିଏଶନର ସମସ୍ତ କର୍ମକର୍ତ୍ତା କାର୍ଯ୍ୟକ୍ରମ ପରିଚାଳନାରେ ସହଯୋଗ କରିଥିଲେ ।
