ନୂଆଦିଲ୍ଲୀ,୧୪ା୮(ପି.ଟି.): ସିବିଆଇ ‘ରାଜନୈତିକ ହାତବାରିସୀ’ ଭାବେ ବ୍ୟବହୃତ ନହୋଇ ଅଧିକ ସ୍ବାଧୀନ ଓ ନିରପେକ୍ଷ ତଦନ୍ତ କରିବା ଉଚିତ ବୋଲି ପ୍ରଧାନ ବିଚାରପତି ରଞ୍ଜନ ଗୋଗୋଇ ମଙ୍ଗଳବାର ପରାମର୍ଶ ଦେଇଛନ୍ତି। ତାଙ୍କ କହିବାନୁଯାୟୀ, ସିବିଆଇ ଭଲ କାମ କରୁଛି ବୋଲି ସରକାର କେବେ ପ୍ରଶଂସା କରୁ ନ ଥିବାବେଳେ ଉକ୍ତ ସଂସ୍ଥା ନିରପେକ୍ଷ ଭାବେ କାର୍ଯ୍ୟ କରୁଛି ବୋଲି କିପରି କୁହାଯାଇ ପାରିବ?
ସାମଗ୍ରିକ ପ୍ରଶାସନିକ ନିୟନ୍ତ୍ରଣରୁ ସିବିଆଇର ଗୁରୁତ୍ୱପୂର୍ଣ୍ଣ ନିଷ୍ପତ୍ତିକୁ ମୁକ୍ତ କରାଯିବା ଆବଶ୍ୟକ। ଉକ୍ତ ସଂସ୍ଥା ଦ୍ୱାରା ନୂଆଦିଲ୍ଲୀର ବିଜ୍ଞାନ ଭବନରେ ଆୟୋଜିତ ସିବିଆଇର ପୂର୍ବତନ ପ୍ରତିଷ୍ଠାତା ନିର୍ଦ୍ଦେଶକ ଡି.ପି. କୋହଲି ୧୮ତମ ବାର୍ଷିକ ସ୍ମାରକୀ ବକ୍ତୃତାମାଳାରେ ଉଦ୍ବୋଧନ ଦେଇ ଗୋଗୋଇ କହିଲେ, କଣ୍ଟ୍ରୋଲର ଆଣ୍ଡ ଅଡିଟର ଜେନେରାଲ୍(ସିଏଜି)ଙ୍କୁ ଆଇନଗତ କ୍ଷମତା ଦିଆଯାଇଥିବାବେଳେ ସିବିଆଇକୁ ସେଭଳି ମାନ୍ୟତା ଦିଆଯିବା ଉଚିତ। ସିବିଆଇର କାର୍ଯ୍ୟ ପଦ୍ଧତିକୁ ବ୍ୟାପକ ଆଇନ ପ୍ରଣୟନ ଦ୍ୱାରା ସୁଦୃଢ଼ କରାଯିବା ଆବଶ୍ୟକ। ଏଥିପାଇଁ ସିବିଆଇର ଗଠନ ପ୍ରଣାଳୀ କାର୍ଯ୍ୟ ପରିସର, କ୍ଷମତାର ସୀମା, କ୍ଷମତା ହସ୍ତାନ୍ତର, ଅସାବଧାନତା ଯୋଗୁ ହୋଇଥିବା ଭୁଲ ଆଦି ସମସ୍ୟାଗୁଡିକୁ ସୁଧୁରାଯିବା ଆବଶ୍ୟକ। ସିବିଆଇ ଆଗରେ ଅନେକ ଆହ୍ବାନ ଅଛି। କ୍ଷମତା ହସ୍ତାନ୍ତର ଏବଂ ସିବିଆଇକୁ ନିୟନ୍ତ୍ରଣ କରିବା ଭଳି କ୍ଷମତା ଦିଲ୍ଲୀ ସ୍ପେଶାଲ ପୋଲିସ ଏଷ୍ଟାବ୍ଲିଶମେଣ୍ଟ ଆକ୍ଟ, ୧୯୪୬ ଅନୁଯାୟୀ କାର୍ଯ୍ୟକାରିଣୀ ଅଧୀନରେ ରହିଛି। ତେଣୁ ସିବିଆଇକୁ ରାଜନୈତିକ ହାତବାରିସୀ କରିବା ଆଶଙ୍କା ରହିଥିବାରୁ କୌଣସି ପରିସ୍ଥିତିରେ ତଦନ୍ତକାରୀ ସଂସ୍ଥା ଏହାର କ୍ଷମତାଠାରୁ ଅଧିକ ପ୍ରୟୋଗ କରିପାରିବ ନାହିଁ। ସିବିଆଇରେ ସଂସ୍କାର ଆଣିବା ପାଇଁ ବିଚାର ବିଭାଗର ଅନେକ ସୁପାରିସ କେନ୍ଦ୍ର ସରକାରଙ୍କ ପାଖରେ ପଡିରହିଥିଲେ ସୁଦ୍ଧା ଏହା ଉପରେ କୌଣସି ପଦକ୍ଷେପ ନିଆଯାଇ ନାହିଁ। ତେଣୁ ସିବିଆଇକୁ ଏକ ଦକ୍ଷ ଏବଂ ସମ୍ପୂର୍ଣ୍ଣ ନିରପେକ୍ଷ ତଦନ୍ତକାରୀ ସଂସ୍ଥା ବୋଲି ବର୍ଣ୍ଣନା କରିବା ବର୍ତ୍ତମାନ ଏକ ଚ୍ୟାଲେଞ୍ଜ ରୂପେ ଉଭା ହୋଇଛି ବୋଲି ଗୋଗୋଇ କହିଥିଲେ।
