ପ୍ରତିଦିନ ଦୁନିଆରେ ବିଭିନ୍ନ ପ୍ରକାରର ଫ୍ୟାଶନ ଶୋ’ ଆୟୋଜିତ ହୋଇଥାଏ। କିନ୍ତୁ କେବେ ବିଲେଇଙ୍କ ଫ୍ୟାଶନ ଶୋ ସମ୍ପର୍କରେ ଶୁଣିଛନ୍ତି? ଆମେରିକାର ନ୍ୟୁୟର୍କ ସହରରେ ପ୍ରତିବର୍ଷ ବିଲେଇମାନଙ୍କ ପାଇଁ ଆୟୋଜିତ ହୋଇଥାଏ ଫ୍ୟାଶନ ଶୋ। ଏହି ଶୋ’ରେ ବିଲେଇମାନେ ପ୍ରୋଫେଶନାଲ ଡିଜାଇନରଙ୍କ ଦ୍ୱାରା ଡିଜାଇନ୍ କରାଯାଇଥିବା ରଙ୍ଗ ବେରଙ୍ଗର ପୋଷାକ ପିନ୍ଧି ଲୋକଙ୍କ ମନୋରଞ୍ଜନ କରିଥାନ୍ତି। ଆଲଗୋନଙ୍କ୍ବିନ୍ ହୋଟେଲରେ ଆୟୋଜିନ ଏହି ନିଆରା ଫ୍ୟାଶନ ଶୋରେ ଚଳିତ ବର୍ଷ ଗୋଲାପି ଶୁଟ ଏବଂ ପଗଡି ପରିହିତ ‘ସେକି’ ନାମକ ଏକ ବିଲେଇ ନିଜର ମାଲିକଙ୍କ ସହ ଏହି ପ୍ରତିଯୋଗିତାରେ ଭାରତକୁ ପ୍ରତିନିଧିତ୍ୱ କରିଥିଲା। ସେହିଭଳି କଳାଧଳା ରଙ୍ଗର ‘ବଲ୍ବୋ’ ନାମକ ଏକ ବିଲେଇ ଆମେରିକାନ୍ ଫ୍ଲାଗ ପ୍ରିଣ୍ଟର ଏକ ପାଇଜାମା ଏବଂ ଏକ ଚଷମା ପରିଧାନ କରି ର଼୍ୟାମ୍ପ ଓ୍ବାକ୍ କରୁଥିବାର ନଜର ଆସିଥିଲା। ଏହିଭଳି ବିଭିନ୍ନ ଦେଶର ଅନେକ ପ୍ରଜାତିର ବିଲେଇ ଭଳିକି ଭଳି ଡିଜାଇନର ପୋଷାକ ପରିଧାନ କରି ନିଜ ମାଲିକଙ୍କ ସହ ର଼୍ୟାମ୍ପ ଓ୍ବାକ କରିଥିଲେ। ତେବେ ପ୍ରାଣୀମାନଙ୍କ ଲାଗି କାର୍ଯ୍ୟ କରୁଥିବା ସ୍ବୟଂସେବକ ସଂସ୍ଥାମାନଙ୍କ ଲାଗି ପାଣ୍ଠି ସଂଗ୍ରହ କରିବା ଏହି ଫ୍ୟାଶନ ଶୋର ମୁଖ୍ୟ ଉଦ୍ଦେଶ୍ୟ ଥିଲା।
