ବାହାନଗା, ୩୦ା୩(ଡି.ଏନ.ଏ.)-ବାଲେଶ୍ୱର ଜିଲା ସଦର ବ୍ଲକ ରସାଳପୁର ପଞ୍ଚାୟତ ଶାସଙ୍ଗ ଗ୍ରାମରେ ବିବାହର ୪ ମାସ ପରେ ଜଣେ ନବବଧୂଙ୍କୁ ହତ୍ୟା କରାଯାଇଥିବା ସଦର ଥାନାରେ ଅଭିଯୋଗ ହୋଇଛି। ଅଭିଯୋଗ ହେବା ପରେ ମଧ୍ୟ କୌଣସି କାର୍ଯ୍ୟାନୁଷ୍ଠାନ କରାଯାଇ ନ ଥିବାରୁ ମହିଳାଙ୍କ ପରିବାର ଲୋକେ ଅସନ୍ତୋଷ ବ୍ୟକ୍ତ କରିଛନ୍ତି।
ବାଲେଶ୍ୱର ଜିଲା ନୀଳଗିରି ଥାନା ପ୍ରତାପଡାସ୍ଥିତ ନରସିଂହପୁର ଗ୍ରାମର ବରେନ୍ଦ୍ର ମଲ୍ଲିିକଙ୍କ ଝିଅ ବିଜୟଲକ୍ଷ୍ମୀ ବାଲେଶ୍ୱରରେ ପାଠ ପଢୁଥିବା ବେଳେ ସଦର ଥାନା ଅଧୀନ ଶାସଙ୍ଗ ଗ୍ରାମର ସିପୁ ମଲ୍ଲିକ(୨୫)ଙ୍କୁ ୪ ମାସ ପୂର୍ବେ ପ୍ରେମ ବିବାହ କରିଥିଲେ। ବିବାହର କିଛି ଦିନ ପରେ ବିଜୟଲକ୍ଷ୍ମୀଙ୍କୁ ତାଙ୍କ ଶାଶୁଘର ଲୋକେ ଯୌତୁକ ବାବଦକୁ ୫୦ହଜାର ଟଙ୍କା ଓ ସୁନା ହାର ମାଗିଥିଲେ। ଏଥିପାଇଁ ବିଜୟଲକ୍ଷ୍ମୀଙ୍କୁ ଅଧିକାଂଶ ସମୟ ନିର୍ଯାତନା ଦିଆଯାଉଥିଲା। ଗତ ୨୫ତାରିଖରେ ଶେଷରେ ଶାଶୁ ଘର ଲୋକେ ଯୌତୁକ ବାବଦ କିଛି ନ ପାଇ ମାରିଦେଇଥିବା ଅଭିଯୋଗରେ ଦର୍ଶାଯାଇଛି। ବିଜୟଲକ୍ଷ୍ମୀଙ୍କ ବାପଘର ଲୋକେ ଝିଅ ଘରକୁ ଯାଇଥିଲେ ମଧ୍ୟ ପାଇ ନ ଥିଲେ। ପଡୋଶୀଙ୍କଠାରୁ ଖବରପାଇ ବାପଘର ଲୋକେ ବାଲେଶ୍ୱର ମୁଖ୍ୟ ଚିକିତ୍ସାଳୟକୁ ଯିବା ବେଳକୁ ଝିଅର ମୃତଦେହ ଦେଖିଥିଲେ। ଝିଅର ମା’ ସାବିତ୍ରୀ ମଲ୍ଲିକ ଏନେଇ ସଦର ଥାନାରେ ଅଭିଯୋଗ କରିଛନ୍ତି।
