ପଦ୍ମପୁର,୧୩ା୫(ପ୍ରଦୀପ୍ତ ଦାଶ): ବରଗଡ଼ ଜିଲା ପଦ୍ମପୁର ଉପଖଣ୍ଡରେ ସୋମବାରଠାରୁ ରବିଧାନ ସଂଗ୍ରହ ପ୍ରକ୍ରିୟା ଆରମ୍ଭ ହୋଇଛି। ଉପଖଣ୍ଡର ମୋଟ ୫୯ଟି କେନ୍ଦ୍ରରେ ଧାନ ସଂଗ୍ରହ କରାଯିବ । ସେଥିମଧ୍ୟରୁ ୧୧ଟି ମୁଖ୍ୟ ବଜାର ପ୍ରାଙ୍ଗଣ ଓ ୨୫ଟି ସମବାୟ ସମିତିରେ ଧାନ ସଂଗ୍ରହ ହେବ। ମଙ୍ଗଳବାର ପାଇକମାଳ ବ୍ଲକ ଲଖମରା ମଣ୍ଡିକୁ କେବଳ ଜଣେ ଚାଷୀ ୧୨୪ ପ୍ୟାକେଟ୍ ଧାନ ଆଣିଥିବା ଆର୍ଏମ୍ସି ସମ୍ପାଦକ ରବି ନାରାୟଣ ପଣ୍ଡା ସୂଚନା ଦେଇଛନ୍ତି। ତେବେ ଧାନ ବିକ୍ରି ପୂର୍ବରୁ ଟୋକନ ସମସ୍ୟା ନେଇ ଚାଷୀ ମହଲରେ ଅସନ୍ତୋଷ ଦେଖାଦେଇଛି। ଅନେକ ଚାଷୀଙ୍କ ପଞ୍ଜୀକୃତ ଜମି ତୁଳନାରେ କମ୍ ପରିମାଣର ଟୋକନ ଆସିଥିବା ବେଳେ ମଣ୍ଡିରେ ଧାନ ବିକ୍ରି ପାଇଁ ଧାର୍ଯ୍ୟ ସମୟ ମେ’ ୨୨ ପରେ ରହିଛି। ପଦ୍ମପୁର ଦର୍ବେ କେଲା ଗ୍ରାମର ଚାଷୀ ସନ୍ତୋଷ ମେହେର ୨.୫ ହେକ୍ଟର ଜମି ପଞ୍ଜୀକୃତ କରିଥିବା ବେଳେ ବିକ୍ରି ପାଇଁ ମାତ୍ର ୧୩ କୁଇଣ୍ଟାଲ ୬୮ କେଜିର ଟୋକନ ଆସିଛି। ସେହିପରି ଏହି ଗ୍ରାମର ଛବିଲ ମେହେର, ସରୋଜ ମେହେର, ବାହାଦୁର ମେହେର ଭଳି ଅନେକ ଚାଷୀଙ୍କ ଜମି ତୁଳନାରେ ବହୁତ କମ୍ ପରିମାଣର ଟୋକନ ଆସିଛି। ଏହାକୁ ନେଇ ଚାଷୀ ମହଲରେ ଅସନ୍ତୋଷ ପ୍ରକାଶ ପାଇଛି। ଅପରପକ୍ଷେ ଟୋକନ ତାରିଖ ବିଳମ୍ବ ଓ ଅନେକ ଚାଷୀଙ୍କ ଏପର୍ଯ୍ୟନ୍ତ ଟୋକନ ପହଞ୍ଚି ନ ଥିବାରୁ ଚାଷୀଙ୍କ ଅମଳ ଧାନ ଖଳା ତଥା ରାସ୍ତାରେ ପଡ଼ିରହିଛି ଓ ଚାଷୀ ସମ୍ଭାବ୍ୟ ଲଘୁଚାପ ଦେଖି ଆଶଙ୍କାରେ ରହିଛି। ଟୋକନ ସମସ୍ୟା ନେଇ ରାଜବୋଡ଼ାସମ୍ବର କୃଷକ ସଙ୍ଗଠନ ତରଫରୁ ଉପଜିଲାପାଳଙ୍କ ସହିତ ବୁଧବାର ଆଲୋଚନା କରାଯିବ ବୋଲି ରାଜବୋଡ଼ାସମ୍ବର କୃଷକ ସଙ୍ଗଠନର ଆବାହକ ଅଶୋକ ସାହୁ କହିଛନ୍ତି।
Dharitri – Odisha’s No.1 Odia Daily
