କେନ୍ଦୁଝର,୨୦ା୫(ସ୍ବ.ପ୍ର.): କେନ୍ଦୁଝର ଜିଲାପାଳଙ୍କ କାର୍ଯ୍ୟାଳୟ ପରିସର ଅବ୍ୟବସ୍ଥା ଘେରରେ ରହିଛି। ରକ୍ଷଣାବେକ୍ଷଣ, ସୁରକ୍ଷା ଢିଲା କାରଣରୁ ପରିସରରେ ମଦ୍ୟପଙ୍କ ଆଡ୍ଡା ଜମୁଛି। ସାମାନ୍ୟ ବର୍ଷା ହେଲେ ଜଳ ନିଷ୍କାସନ ହୋଇପାରୁ ନ ଥିବାରୁ ରାସ୍ତା ନଷ୍ଟ ହେଉଛି। ଅସ୍ବାସ୍ଥ୍ୟକର ପରିବେଶ ସୃଷ୍ଟି ହେବା ସହ ଯାତାୟାତରେ ସମସ୍ୟା ସୃଷ୍ଟି ହେଉଛି। ଖୋଦ୍ ଜିଲାପାଳଙ୍କ କାର୍ଯ୍ୟାଳୟ ପରିସରରେ ଏଭଳି ଅବସ୍ଥାକୁ ନେଇ ସାଧାରଣରେ ଅସନ୍ତୋଷ ପ୍ରକାଶ ପାଇଛି।
ପ୍ରକାଶ ଯେ, ନିକଟରେ ଜିଲାପାଳଙ୍କ କାର୍ଯ୍ୟାଳୟ ନିକଟ ରାସ୍ତା ଉନ୍ନତୀକରଣ କରାଯାଇଥିଲା। ମାତ୍ର ଡ୍ରେନେଜ ବ୍ୟବସ୍ଥା ନ ଥିବାରୁ ପରିସରରେ ପାଣି ଜମା ହୋଇ ରହୁଛି। ସୁରକ୍ଷା ବ୍ୟବସ୍ଥା କଡ଼ାକଡ଼ି ହେଉ ନ ଥିବାରୁ ପରିସରରେ ଥିବା ଆପତ୍କାଳୀନ ବିଭାଗ କାର୍ଯ୍ୟାଳୟ ନିକଟ ତଥା ପାଣି ଟାଙ୍କି ନିକଟରେ ଥିବା ବାଇକ ଷ୍ଟାଣ୍ଡ୍ରେ ମଦ୍ୟପଙ୍କ ସୁରକ୍ଷିତ ପିଇବା ସ୍ଥାନ ପାଲଟିଛି। ଚାରିଆଡ଼େ ମଦ ବୋତଲ ପଡ଼ି ଥିଲେ ହେଁ ସଫେଇ ହେଉନାହିଁ କିମ୍ବା କଟକଣା କରାଯାଉ ନାହିଁ। ନିୟମିତ ସଫେଇ ହେଉ ନ ଥିବାରୁ ଚାରିଆଡ଼େ ମଇଳା ଆବର୍ଜନା ମାସରୁ ଅଧିକ ଦିନ ପଡ଼ି ରହୁଛି। ସେହିପରି ନିକଟରେ ଥିବା ୨୦ ଲକ୍ଷ ଟଙ୍କା ବ୍ୟୟରେ ନିର୍ମିତ ଶୌଚାଳୟ କାମରେ ଲାଗୁନାହିଁ। ଫଳରେ ବାହାରୁ ଆସୁଥିବା ଲୋକେ ଓ କର୍ମଚାରୀମାନେ ବହୁ ଅସୁବିଧା ଭୋଗୁଛନ୍ତି। ଅଭିଯୋଗ ପ୍ରକୋଷ୍ଠ ତଥା ଅନ୍ୟାନ୍ୟ କାମରେ ଆସୁଥିବା ଲୋକେ ବିଶେଷ କରି ମହିଳାମାନେ ଅକଥନୀୟ ସମସ୍ୟା ଭୋଗୁଛନ୍ତି। ଶୌଚାଳୟ କାମରେ ଲାଗୁ ନ ଥିବାରୁ ଲୋକମାନେ ଏଣେତେଣେ ପରିସ୍ରା କରିବାକୁ ବାଧ୍ୟ ହୋଇଥାନ୍ତି ବୋଲି ସାମାଜିକ କର୍ମୀ ଦିଲ୍ଲୀପ ସାହୁ କହିଛନ୍ତି। ପୂର୍ବତନ ବିଧାୟକ ସୁବର୍ଣ୍ଣ ନାୟକ କହିଛନ୍ତି, ଜିଲାପାଳଙ୍କ କାର୍ଯ୍ୟାଳୟକୁ ଜିଲା ତଥା ରାଜ୍ୟ ବାହାରୁ ବହୁ ଭିଆଇପି ଆସିଥାନ୍ତି। ଏହା ସତ୍ତ୍ୱେ ପରିସରକୁ ସରସ ସୁନ୍ଦର ତଥା ଲୋକଙ୍କ ସୁବିଧା କରାଯାଇପାରୁନାହିଁ। ରକ୍ଷଣାବେକ୍ଷଣ ପାଇଁ ନିଯୁକ୍ତ କର୍ମଚାରୀ ବାବୁମାନଙ୍କ ଘରେ କାମ କରୁଥିବାରୁ ପରିସର ଅବହେଳିତ ହୋଇଛି ବୋଲି ସେ କହିଛନ୍ତି। ଜିଲାପାଳ ଉକ୍ତ ସମସ୍ୟା ଦିଗରେ ତୁରନ୍ତ ପଦକ୍ଷେପ ଗ୍ରହଣ କରିବାକୁ ଦାବି କରିଛନ୍ତି। ଘଟଣାରେ ଜିଲାପାଳଙ୍କ ମତାମତ ପାଇଁ ଯୋଗାଯୋଗ କରାଯାଇଥିଲେ ହେଁ ସମ୍ଭବ ହୋଇନାହିଁ।
