କେନ୍ଦ୍ରାପଡ଼ା ଅଫିସ, ୧୫ା୫: ତାଲାବନ୍ଦ ଯୋଗୁ କର୍ମନିଯୁକ୍ତି ହରାଇ ଦେଶ ବିଦେଶରୁ ବହୁ ସଂଖ୍ୟାରେ ପ୍ରବାସୀ ଜିଲାକୁ ଫେରିବାରେ ଲାଗିଛନ୍ତି। ଏମାନଙ୍କୁ ଏବେ ରୋଜଗାର ଚିନ୍ତା ଘାରିଛି। କର୍ମନିଯୁକ୍ତି ପାଇଁ ସରକାର କୃଷି କ୍ଷେତ୍ରକୁ ଅଗ୍ରାଧିକାର ଦେଉଥିବା ବେଳେ ଜିଲାରେ ଅଧାରୁ ଅଧିକ ଚାଷଜମି ପାଇଁ ଜଳସେଚନ ଏକ ପ୍ରମୁଖ ସମସ୍ୟା ହୋଇଛି। ଜିଲାର ୯ ବ୍ଲକ ମଧ୍ୟରୁ ଆଳି, ରାଜନଗର ଓ ରାଜକନିକାରେ କେନାଲ ଆଦୌ ନାହିଁ ା ଜଳସମ୍ପଦ ବିଭାଗ, କୃଷି ବିଭାଗ, ପଞ୍ଚାୟତିରାଜ ବିଭାଗ, ଉଠାଜଳସେଚନ ବିଭାଗ ଆଦି ଜିଲାରେ କାର୍ଯ୍ୟ କରୁଥିଲେ ମଧ୍ୟ ରାଜନଗର, ରାଜକନିକା ଓ ମହାକାଳପଡା ବ୍ଲକରେ ରାଜ୍ୟ ସରକାରଙ୍କ ପ୍ରତି ବ୍ଲକର ୩୫ ପ୍ରତିଶତ କ୍ଷେତକୁ ଜଳଯୋଗାଣ ଘୋଷଣା ଅଦ୍ୟାବଧି କାର୍ଯ୍ୟକାରୀ କରାଯାଇ ପାରିନାହିଁ। ରାଜକନିକା ବ୍ଲକର ୩୩.୬୨ ପ୍ରତିଶତ କ୍ଷେତକୁ ଜଳ ଯୋଗାଇ ଦିଆଯାଉଥିବା ବେଳେ ରାଜନଗର ଓ ମହାକାଳପଡା ବ୍ଲକର ଚାଷୀ ଜଳସେଚନ କ୍ଷେତ୍ରରେ ବହୁ ପଛରେ ପଡିଛନ୍ତି। ତଥ୍ୟ ଅନୁଯାୟୀ, ମହାକାଳପଡା ବ୍ଲକରେ ୨୮,୦୭୦ ହେକ୍ଟର ଚାଷଜମି ଥିବାବେଳେ ମାତ୍ର ୬୮୨୩ ହେକ୍ଟର ଜମିକୁ ଜଳସେଚନ ବ୍ୟବସ୍ଥା ରହିଛି। ଅର୍ଥାତ୍ ୨୪.୩୧ ପ୍ରତିଶତ ଜମି ଜଳସେଚିତ। ସେହିପରି ରାଜନଗରର ମୋଟ ୨୫୮୯୫ ହେକ୍ଟର ଜମି ମଧ୍ୟରୁ ମାତ୍ର ୧୯.୧୬ ପ୍ରତିଶତ ଜମି ଜଳସେଚିତ ା ପ୍ରତିବର୍ଷ ଜିଲା କୃଷି ବିଭାଗ ପକ୍ଷରୁ ଜିଲାରେ ୧ଲକ୍ଷ ୫୨ ହଜାର ହେକ୍ଟର ଜମିରେ ଖରିଫ ଚାଷ ପାଇଁ ଲକ୍ଷ୍ୟ ଧାର୍ଯ୍ୟ ହୋଇଥାଏ ା ଏଥିପାଇଁ ବିହନ, ସାର, କୀଟନାଶକ ସହ ବୈଷୟିକ ଜ୍ଞାନକୌଶଳ ଆଦି ଚାଷୀଙ୍କୁ ଯୋଗାଇ ଦିଆଯାଇଥାଏ। ସେହିପରି ସରକାରୀ ରିହାତିରେ ଚାଷୀକୁ କୃଷି ଯନ୍ତ୍ରପାତି ଯୋଗାଇଦେବା ସହ ଖରିଫ ଧାନର ସ୍ବତନ୍ତ୍ର ପଦ୍ଧତି ଚାଷକୁ ପ୍ରୋତ୍ସାହନ ପାଇଁ ଅନୁଦାନ ଯୋଗାଇ ଦିଆଯାଏ ା ତେବେ ଚାଷ ପାଇଁ ଜଳସେଚନ ଏକ ସମସ୍ୟା ହୋଇଛି। ଧାର୍ଯ୍ୟଲକ୍ଷ୍ୟ ୧ ଲକ୍ଷ ୫୨ ହଜାର ହେକ୍ଟର ଚାଷ ଜମିରୁ ମାତ୍ର ୪୬୭୨୭ ହେକ୍ଟର ଜମିକୁ କେନାଲ ମାଧ୍ୟମରେ ଜଳସେଚନ ହେଉଥିବା ଜିଲା କୃଷିବିଭାଗ ତଥ୍ୟରୁ ଜଣାପଡେ। ୧୧୧୪ଟି ଲିଫ୍ଟ ଇରିଗେସନ ପଏଣ୍ଟ, ୩୦୬୩ ସ୍ବାଲୋ ଟ୍ୟୁବ୍ୱେଲ ଦ୍ୱାରା ଜିଲାର ମୋଟ ୩୦୭୮୧ ହେକ୍ଟର ଜମିକୁ ଜଳସେଚନ ହେଉଥିବାବେଳେ ଅନ୍ୟାନ୍ୟ ଉତ୍ସରୁ ୧୦୬୨୪ ହେକ୍ଟର କ୍ଷେତକୁ ପାଣି ଯାଉଥିବା ତଥ୍ୟରେ ଦର୍ଶାଯାଇଛି। ତେବେ ଏହି ଆକଳନ ତୃଣମୂଳସ୍ତରରେ ଯାଞ୍ଚ କଲେ ଅବାସ୍ତବ ବୋଲି ବହୁ ଚାଷୀ ଓ ବୁଦ୍ଧିଜୀବୀ ମତ ଦେଇଛନ୍ତି। ସେମାନଙ୍କ ମତରେ ଉଠାଜଳସେଚନ ବିଭାଗ ପକ୍ଷରୁ ଗଠନ ହୋଇଥିବା ପାଣି ପଞ୍ଚାୟତ ଏବେ ପ୍ରହସନ ପାଲଟିଛି। ସଭ୍ୟାସଭ୍ୟଙ୍କ ଅଜାଣତରେ କର୍ମକର୍ତ୍ତାମାନେ ସରକାରୀ ଅନୁଦାନକୁ ଠିକାଦାରି ଆଳରେ ହଡ଼ପ କରୁଛନ୍ତ। ସେହିପରି ଜଳସମ୍ପଦ ବିଭାଗ ପକ୍ଷରୁ ଜଳ ପରିଚାଳନାକୁ ଗୁରୁତ୍ୱ ଦିଆଯାଉନାହିଁ। ଅପରପକ୍ଷରେ ବିଶ୍ୱ ବ୍ୟାଙ୍କଠାରୁ ଆରମ୍ଭ କରି ବିଭିନ୍ନ ସ୍ଥାନରୁ ରାଜ୍ୟ ସରକାର ଋଣ କରି କ୍ଷେତକୁ ଜଳ ପରିଚାଳନାର ଉନ୍ନୟନ ଯୋଜନା ପାଇଁ ଅର୍ଥ ଯୋଗାଇଦେଉଥିବା ବେଳେ ବିଭାଗୀୟ କର୍ମକର୍ତ୍ତାଙ୍କ ଅବହେଳାରୁ ହିତାଧିକାରୀଙ୍କୁ ସୁଫଳ ମିଳୁନାହିଁ। ପ୍ରତିବର୍ଷ ବନ୍ୟା ଆସି ଉପାନ୍ତ ଅଞ୍ଚଳର ଚାଷକୁ ନଷ୍ଟ କରୁଛି ା ଜଳ ନିଷ୍କାସନ ଓ ଜଳସେଚନ ପାଇଁ ଆବଶ୍ୟକ ଜଳର ଅଭାବ ଚାଷୀଙ୍କୁ ଚାଷରୁ ନିବୃତ୍ତ କରୁଛି। ବିଭିନ୍ନ ନଦୀ, କେନାଲର ଜଳ ବ୍ୟାରେଜ ଓ କ୍ରିକ୍ ବନ୍ଧ ଦ୍ୱାରା ଅଟକାଇ କ୍ଷେତକୁ ଜଳସେଚିତ ହୋଇପାରିବ ବହୁ ବୁଦ୍ଧିଜୀବୀ ମତ ଦେଇଛନ୍ତି ା ଏ ସମ୍ପର୍କରେ ଉପଜିଲାପାଳ ଜ୍ୟୋତି ରଞ୍ଜନ ମହାପାତ୍ର କୁହନ୍ତି ଯେ, ଜଳସେଚନ ସମସ୍ୟା ନେଇ ଗତ ଫେବୃୟାରୀ ମାସରେ ପ୍ରଶାସନିକ ବୈଠକ ହୋଇଥିଲା। ଏଥିରେ ଅଣଜଳସେଚିତ ଜମି କ୍ଷେତ୍ରରେ ଉଠାଜଳସେଚନ ବ୍ୟବସ୍ଥା କରିବା ପାଇଁ ନିଷ୍ପତ୍ତି ନିଆଯାଇଥିଲା। ଏବେ ଏହି ପ୍ରକ୍ରିୟା ଆରମ୍ଭ ହୋଇଛି।
