ଶାରଜା,୩।୧୦: ଚଳିତ ଆଇପିଏଲ ସିଜନରେ ଶାରଜା ଗ୍ରାଉଣ୍ଡରେ ଅନ୍ୟ ଦଳମାନେ ୧୪୦ ରନ୍ ପାରୁ ନ ଥିବା ବେଳେ କିଙ୍ଗ୍ସ ପଞ୍ଜାବ ବିପକ୍ଷ ମ୍ୟାଚ୍ରେ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର (ଆରସିବି) ଧାର୍ଯ୍ୟ ୨୦ ଓଭରରେ ୭ ଉଇକେଟ ହରାଇ ୧୬୪ ରନ୍ କରିଛି। ଗ୍ଲେନ ମ୍ୟାକ୍ସଓ୍ବେଲ ଯୋଗୁ ଏହା ସମ୍ଭବ ହୋଇପାରିଛି। ବୋଲରଙ୍କୁ ସୁହାଉଥିବା ପିଚ୍ରେ ମ୍ୟାକ୍ସଓ୍ବେଲ ତାଙ୍କ ପୁରୁଣା ଦଳ ବିପକ୍ଷରେ ଖେଳିଛନ୍ତି ବିସ୍ଫୋରକ ଅର୍ଦ୍ଧଶତକୀୟ ପାଳି। ସେ ମାତ୍ର ୩୩ ବଲରେ ୩ ଚୌକା ଓ ୪ ଛକା ବଳରେ ୫୭ ରନ୍ର କରିଥିଲେ। ଏହା ଥିଲା ଚଳିତ ସିଜନରେ ମ୍ୟାକ୍ସଓ୍ବେଲଙ୍କ ୫ମ ଅର୍ଦ୍ଧଶତକ।
ମ୍ୟକ୍ସଓ୍ବେଲଙ୍କ ବ୍ୟତୀତ ଅଧିନାୟକ ବିରାଟ କୋହଲି ୨୫ (୨ ଚୌକା ଓ ୧ ଛକା), ଦେବଦତ୍ତ ପାଡିକଲ ୪୦ (୪ ଚୌକା ଓ ୨ ଛକା), ଏବି ଡି’ଭିଲୟର୍ସ ୨୩ ( ୧ ଚୌକା ଓ ୨ ଛକା) ରନ୍ କରିଥିଲେ। ପଞ୍ଜାବ ପାଇଁ ଅନ୍ତିମ ଓଭରରେ ମହମ୍ମଦ ଶାମି ୩ ଉଇକେଟ ନେଇଥିଲେ।
