ବିନିକା ,୧୫।୭(ଡି.ଏନ୍.ଏ): ସୁବର୍ଣ୍ଣପୁର ଜିଲା ବିନିକା ବ୍ଲକ ସିଂଘିଯୁବା-ରାମପୁର ମୁଖିଆ ରାସ୍ତାରେ ଗଲା ତା.୨୯.୧୨.୨୦୧୮ରେ ଗୁଟେ ବଡ଼ଭାରି ଦୁରଘଟନା ହେଇଥିଲା। ଇ ଦୁରଘଟନାରେ ସିଂଘିଯୁବା ପଁଚେତ୍ ଅଧୀନ ଅସୁରଗଡ଼ ଗଁାର ମଗଶିର ଭରାସାଗର(୨୮)କଁର ଭୁଜନି ହାତ୍ଗୋଡ଼ ଭାଂଗି ଯାଇଥିଲା। ପୀଡ଼ିତ ମଗଶିରକଁର କହେବାର ହିସାବେ ସେ ତା.୨୯.୧୨.୨୦୧୮ ସଖାଲର ୮ ବଜେ ଶିବଶକ୍ତି ରାଇସ୍ ମିଲକେ କାମ୍କରି ଗଲାବେଲେ ରାସ୍ତା ତରେ ଠିଆ ହେଇଥିଲେ। ଇ ସମିଆରେ ସିଂଘିଯୁବା ଫାଲୁ ଗୁଟେ ଟାଟା ଏସିଇ (ଗାଡ଼ି.ନଂ. ଓଡି-୦୩-୨୭୮୮) ତାହାକୁ ଫଛ୍ଫାଲୁ ପିଟି ଦେଇଥିଲା। ଦୁରଘଟନା ବାବ୍ଦେ ଖବର ପାଇ ଅସୁରଗଡ଼ ଗଁାବାସୀ ଘଟନା ଥଲରେ ପୁହୁଁଚି ଥିଲେ। ଗଁାବାସୀ ଦୁରଘଟନାରେ ଆହତ୍ ମଗଶିରକଁର ଚିକିସତ୍ା ଆର କ୍ଷତିପୂରନ୍ ଦାବି କରବାର ସଂଗେ ରାସ୍ତା ରୋକ୍ କରିଥିଲେ। ସେ ସମିଆର ବିନିକା ଥାନା ଅଧ୍କାରୀ କଲ୍ୟାଣୀ ହେହେରା ରାସ୍ତା ରୋକ୍ କରିଥିବାର ଲୁକ୍କୁ ବୁଝାସୁଝା କରି ରେଡକ୍ରସରୁ ଆହତ୍କୁଁ ଚିକିସତ୍ା ଲାଗି ସାହାଯ୍ ଦିଆଯିବା ବଲି କଥା ଦେଇଥିଲେ। ହେଲେ ଦୁଖର କଥା ଘଟନାକେ ୬ ମାସ ବିତିଯାଇଥିଲେ ବି ପୀଡ଼ିତ ମଗଶିରକୁଁ ରେଡକ୍ରସରୁ ସାହାଯ୍ ଟଁକା ନାଇଁ ମିଲିପାରି। ଏହେଦେ ମଗଶିର ଟଁକା ପଏସା ଅଭାବୁ ଚିକିସତ୍ିତ ନାଇଁ ହେଇପାରି ଘରେ ପଡ଼ିରହିଛନ୍। ଇଆଡ଼େ ମଗଶିରକଁର ଘରର ଗୁଟେ ବଲି କମାନିଅଁା ଲୋକ୍ ହେଇଥିଲାବେଲେ ତାକର ଉପରେ ୫ ପରାନୀ କୁଟୁମ ନିରଭର କରୁଛନ୍। ହେଲେ ସେ ପଡ଼ିରହିଲାରୁ କୁଟୁମବସିଆ ଅଭାବ ଅନାଟନ ଲାଗି ବଡ଼ା ଗୁଲଗୁଲା ହେଉଛନ୍। ଘରେ ଶଶୁର ଖାଡ଼ିଆ ଭରାସାଗର(୬୫), ଶାଶୁ ଶିତୟା ଭରାସାଗର(୬୦), ବଡ଼ ପୁଓ ରୋହିତ(୬) ରହିଥିଲାବେଲେ ଏହେଦେ ଇ ସମକର ବୋଝ ମଗଶିରକଁର ମାଏକିନା ସଂଯୁକ୍ତା ଉପରେ ଲଦି ହେଇଛେ। ଇଆଡ଼େ ପରିବାର ଲୋକ୍ ମଗଶିରକଁର ଚିକିସତ୍ା ଲାଗି ଘରର ଖୁରିଗିନାଠାନୁ ଗହନାଗଁାଠି ତକ୍ ବିକାଭଂଗା କରି ସରବ୍ସୁଅଁାତ୍ ହେଇଯାଇଛନ୍। ଏହେଦେ ପରିବାରଟା ଉପେ ଶୂଇନ୍ ହେଇ ସରକାରୀ ସାହାଯ୍କେ ଟାକିଥିଲାବେଲେ ସଂଯୁକ୍ତା ଗଁାରେ ମାଗିଯାଚି ପରିବାରର ପେଟ୍ ପାଲୁଛନ୍। ଇ ଦୁଖି ଗରିବ୍ ପରିବାରକେ ଜିଲା ପରଶାସନ ଦୁରୁଷ୍ଟି ଦେଇ ସବୁପରକାର ସରକାରୀ ସାହାଯ୍ ଯୁଗେଇ ଦେବାକେ ଅସୁରଗଡ଼ ଗଁାର କନିଷ୍ଠ ହରିପାଲ, ରାହାସ ଭରାସାଗର, ମର୍ଦ୍ଦରାଜ ବାରିକ, ଗଙ୍ଗାଧର ହରିପାଲ ପରମୁଖ ଗଁାବାସୀ ଦାବି କରିଛନ୍।
