ପିଟ୍ସବର୍ଗ,୧।୫(ୟୁଏସ୍ଏ): ଏନ୍ବିଏ ଏକାଡେମୀ ପ୍ରତିଭା ଭାରତର ଜଗଶନବୀର ସିଂଙ୍କୁ ଏକ ବଡ଼ ସୁଯୋଗ ମିଳିଛି। ଆମେରିକାର ପିଟ୍ସବର୍ଗସ୍ଥିତ ପଏଣ୍ଟ ପାର୍କ ବିଶ୍ୱବିଦ୍ୟାଳୟ ପୁରୁଷ ବାସ୍କେଟବଲ ଦଳ ପାଇଁ ଖେଳିବାକୁ ସେ ଚୁକ୍ତି କରିଛନ୍ତି। ୨୦୨୦-୨୧ ସେସନ ପାଇଁ ସେ ବିଦେଶୀ ଖେଳାଳି ହିସାବରେ ଏହି ଦଳରେ ଯୋଗଦେବା ପାଇଁ ଚୁକ୍ତିରେ ସ୍ବାକ୍ଷର କରିଛନ୍ତି। ୭ ଫୁଟ ଉଚ୍ଚତା ବିଶିଷ୍ଟ ଏହି ସେଣ୍ଟର ଖେଳାଳି କାଲିଫର୍ନିଆରେ ଗୋଲ୍ଡେନ ଷ୍ଟେଟ୍ ପ୍ରେପ୍ରେ ରହୁଛନ୍ତି। ଏନ୍ବିଏ ଏକାଡେମୀ ଇଣ୍ଡିଆରେ ସାମିଲ ହେବା ପାଇଁ ସେ ଚୟନ ହୋଇଥିଲେ। ୨୦୧୭ରେ ଏହି ପ୍ରୋଗ୍ରାମ ଆରମ୍ଭ ହୋଇଥିଲା। ସାରା ଭାରତରେ ବାସ୍କେଟବଲ ପ୍ରତିଭା ଅନ୍ବେଷଣ କାର୍ଯ୍ୟକ୍ରମ ‘ଏସିଜି ଏନ୍ବିଏ ଜମ୍ପ’ ମଧ୍ୟରେ ୨୨ଜଣ ପିଲାଙ୍କ ସମେତ ଜଗଶନବୀର ଚିହ୍ନଟ ହୋଇଥିଲେ।
ଏନ୍ବିଏ ଏକାଡେମୀ ଇଣ୍ଡିଆରୁ ପ୍ରଶିକ୍ଷଣ ନେବା ପରେ ସେ ଆମେରିକା ଆସିଥିଲେ ଓ ଗୋଲ୍ଡେନ ଷ୍ଟେଟ୍ ପ୍ରେପ୍ରେ ପୋଷ୍ଟ ଗ୍ରେଡ ଲେଭେଲ ଖେଳିଥିଲେ। ଜଗଶନବୀରଙ୍କୁ ଦଳରେ ସାମିଲ କରି ଆମେ ବହୁତ ଖୁସି ବୋଲି ପଏଣ୍ଟ ପାର୍କ ବିଶ୍ୱବିଦ୍ୟାଳୟ ହେଡ୍ କୋଚ୍ ଜୋ ଲିଓ୍ବାଣ୍ଡୋଓ୍ବିସ୍କି କହିଛନ୍ତି। ଜଗଶନବୀରଙ୍କ ବେଶ୍ ଡେଙ୍ଗା ଓ ବାସ୍କେଟବଲ୍ ସମ୍ପର୍କରେ ତାଙ୍କର ବହୁତ ଜ୍ଞାନ ମଧ୍ୟ ରହିଛି। ତାଙ୍କୁ ଭଲଭାବେ ପ୍ରଶିକ୍ଷଣ ଦିଆଯାଇଛି ଓ ସେ ଭଲ ପ୍ରଦର୍ଶନ କରିବେ ବୋଲି ଆଶା କରାଯାଉଛି। ଜଗଶନବୀରଙ୍କୁ ନେଇ ଆମେ ବହୁତ ଉତ୍ସାହିତ ଅଛୁ ବୋଲି ବିଶ୍ୱବିଦ୍ୟାଳୟ ଆସୋସିଏଟ ହେଡ୍ କୋଚ୍ ଡରେନ ଫ୍ରିଡ୍ମ୍ୟାନ କହିଛନ୍ତି। ଫ୍ରିଡ୍ମ୍ୟାନ ପୂର୍ବରୁ ଏନ୍ବିଏ ଖେଳାଳି ସିମ୍ ଭୁଲାରଙ୍କୁ କୋଚିଂ ଦେଇଛନ୍ତି। ତାଙ୍କ ସମୟରେ ଚାଇନାରେ ଅନୁଷ୍ଠିତ ହୋଇଥିବା ଏନ୍ବିଏ ଏସିଆ ପାସିଫିକ୍ ଟିମ୍ କ୍ୟାମ୍ପ ପାଇଁ ଜଗଶନବୀର ଚୟନ ହୋଇଥିଲେ। ୨୦୧୮ ଅଗଷ୍ଟରେ ଜଗଶନବୀର ଏଫ୍ଆଇବିଏ ୧୮ ବର୍ଷରୁ କମ୍ ଏସିଆନ ଚାମ୍ପିୟନଶିପ୍ ଖେଳିବା ପାଇଁ ଭାରତୀୟ ଜାତୀୟ ଦଳରେ ସାମିଲ ହୋଇଥିଲେ। ଏହି ପ୍ରତିଯୋଗିତା ଥାଇଲାଣ୍ଡରେ ଆୟୋଜିତ ହୋଇଥିଲା।
