କଟକ ଅଫିସ,୧୬।୩: କଟକ ମହାନଦୀ ବିହାର ଛକରେ ରହିଛି ଏକ ଦୋକାନ। ଯାହାର ନାଁ ହେଉଛି ଗବର୍। ବଲିଉଡ୍ ଷ୍ଟାର ଅକ୍ଷୟ କୁମାରଙ୍କ ଅଭିନୀତ ଚଳଚ୍ଚିତ୍ର ‘ଗବର ଇଜ୍ ବ୍ୟାକ୍’ରୁ ଅନୁପ୍ରାଣିତ ହୋଇ ଏଭଳି ନିଆରା ଦୋକାନ କରିଛନ୍ତି ରଞ୍ଜନ କୁମାର ପରିଡ଼ା ନାମକ ଜଣେ ଯୁବକ। ଫିଲ୍ମ ଷ୍ଟାଇଲରେ ଦୋକାନ ଓ ବିଭିନ୍ନ ଖାଦ୍ୟ ତାଲିକାର ନାଁ ରଖି ଗ୍ରାହକଙ୍କ ଆକର୍ଷଣକୁ ବଢାଉଛନ୍ତି। କିଛିଦିନ ତଳେ ଆରମ୍ଭ ହୋଇଥିବା ଏହି ଦୋକାନରେ ପ୍ରତ୍ୟେହ ଶତାଧିକ ଲୋକଙ୍କ ଭିଡ ଦେଖିବାକୁ ମିଳୁଛି। ତେବେ ଏଠାରେ ମିଳୁଥିବା ବିଭିନ୍ନ ସାମଗ୍ରୀର ନାଁ ବି ନିଆରା। ଯେମିତିକି ବାସନ୍ତୀ ସ୍ପେସାଲ କଫି, ବିବିକ୍ୟୁ ସ୍ପାଇସି ପନିର ବର୍ଗର, ଜୟ-ଭୀରୁ ସ୍ପେସାଲ ମ୍ୟାଗି, ଗବର ସ୍ପେଶାଲ ଲସି।
ରେଭେନ୍ଶା ବିଶ୍ୱବିଦ୍ୟାଳୟରୁ ୨୦୧୩ରେ ଆଇଟିଏମ୍ ବିଭାଗରେ ପାଠପଢା ଶେଷ କରି ଏକ ଘରୋଇ ବ୍ୟାଙ୍କରେ ଚାକିରି କରୁଥିଲେ ରଞ୍ଜନ। ହେଲେ ଚାକିରିରୁ ଆତ୍ମସନ୍ତୋଷ ନ ମିଳିବାରୁ ବ୍ୟବସାୟ କରିବାକୁ ମନସ୍ଥ କରିଥିଲେ। କିଛିମାସ ତଳେ ମହାନଦୀ ବିହାରରେ ଏକ ଦୋକାନ କରିଥିଲେ। ଏହି ବ୍ୟବସାୟରେ ପ୍ରଥମେ ତାଙ୍କ ବାପା ଭାଗୁ ଚରଣ ପରିଡା ଏବଂ ମା’ ଟୁନିଲତା ପରିଡା ସାହାଯ୍ୟ କରୁଥିଲେ। ଏବେ ଦୁଇଜଣ ପିଲା ରଖି ନିଜେ ଏହାର ଦାୟିତ୍ୱ ନେଉଛନ୍ତି। କଟକ ସହରରେ କିଛି ସ୍ବତନ୍ତ୍ର କରିବାର ଲକ୍ଷ୍ୟ ରଖି ଏହି କ୍ଷେତ୍ରରେ ପାଦ ଥାପିଥିବା ରଞ୍ଜନ କହିଛନ୍ତି। ସେ ଭବିଷ୍ୟତରେ ଅନ୍ଲାଇନ୍ରେ ଚା’ ବ୍ୟବସାୟ କରିବାକୁ ଆଶା ରଖିଛନ୍ତି। କେବଳ ବ୍ୟବସାୟ ନୁହେଁ ଏଠାରେ ସାଧାରଣ ଲୋକଙ୍କୁ ସଚେତନତା ବାର୍ତ୍ତା ବାଣ୍ଟୁଛନ୍ତି ରଞ୍ଜନ। ପ୍ରତ୍ୟେକ ଗ୍ରାହକଙ୍କୁ ସେ ପ୍ଲାଷ୍ଟିକ ବର୍ଜନ, ଧୂମ୍ରପାନ ସ୍ବାସ୍ଥ୍ୟପକ୍ଷେ ହାନିକାରକ, ନାରୀ ହିଂସା ରୋକିବା, ମଦ୍ୟପାନ କରି ଗାଡି ନ ଚଳାଇବା ଭଳି ବାର୍ତ୍ତା ଦେଇଥାନ୍ତି।
୫୦ରୁ ଊର୍ଦ୍ଧ୍ୱ ଫ୍ଲେବରର ଚା’
ଏହିି ଦୋକାନର ଚାହିଦା ସ୍ବତନ୍ତ୍ର। ଏଠାରେ ୫୦ରୁ ଅଧିକ ଫ୍ଲେଭର ଚା, ବିଭିନ୍ନ ପ୍ରକାରର କଫି, ମିଲ୍କ ସେକ୍ ଏବଂ ସ୍ନାକ୍ସ ମିଳୁଛି। କିନ୍ତୁ ତନ୍ଦୁରି ଚା’କୁ ଲୋକମାନେ ଅଧିକ ପସନ୍ଦ କରୁଛନ୍ତି। ଚା’ର ଦାମ ୧୦ଟଙ୍କାରୁ ୧୦୦ଟଙ୍କା ପର୍ଯ୍ୟନ୍ତ ରହିଛି। ଅନ୍ୟ ଚା’ ମଧ୍ୟରେ କଡକ ମସଲା ଚା, ତନ୍ଦୁରୀ ମସଲା ଚା, ଚକଲେଟ ମସଲା ଚା, ତନ୍ଦୁରୀ ଚକଲେଟ ଚା, କୁଲାଡୱାଲା ଚା ଆଦି ମିଳେ। କଫିରେ ମସଲା କଫି, ହଟ କଫି, ନଟି ଆଲମଣ୍ଡ, ବାସନ୍ତୀ ସ୍ପେଶାଲ, ବାସନ୍ତୀ ସ୍ପେଶାଲ ତନ୍ଦୁରୀ କଫି, ସ୍ମୁକି ଚକୋ ଅରେଞ୍ଜ ରହିଛି। ସେହିପରି ଆମ୍ବ, ସପୁରି, ବାଦାମ, ଲିଚି, କଦଳୀ, ଗ୍ରୀନ ଆପେଲ ଆଦି ଫ୍ଲେଭରର ଲସି ଏଠାରେ ଉପଲବ୍ଧ ରହିଛି।
ରିପୋର୍ଟ: ଆଶୋକ କୁମାର ବାରିକ
