ନୂଆଦିଲ୍ଲୀ, ୩ା୩(ପି.ଟି.): ଜି-୨୦ ରାଷ୍ଟ୍ରସମୂହର ବହିର୍ବ୍ୟାପାର ମନ୍ତ୍ରୀମାନଙ୍କ ବୈଠକ ଗୁରୁବାର ଅନୁଷ୍ଠିତ ହୋଇଯାଇଛି। ସହମତି ହାସଲ ଲାଗି ଆୟୋଜକ ଭାରତର ଜୋର୍ଦାର ଉଦ୍ୟମ ସତ୍ତ୍ୱେ ୟୁକ୍ରେନ୍ ବିବାଦ ଉପରେ ତୀବ୍ର ମତଭେଦ ପ୍ରକାଶ ପାଇଥିଲା। ତେଣୁ ସମ୍ମିଳନୀର ନିଷ୍କର୍ଷ ସମ୍ପର୍କରେ ମିଳିତ ବିବୃତି ଆସିପାରିଲା ନାହିଁ। ଭାରତର ବହିର୍ବ୍ୟାପାର ମନ୍ତ୍ରୀ ଏସ୍. ଜୟଶଙ୍କର ଗଣମାଧ୍ୟମକୁ କହିଛନ୍ତି, ବୈଠକରେ ୟୁକ୍ରେନ୍ ଯୁଦ୍ଧ ପ୍ରସଙ୍ଗ ସ୍ଥାନ ପାଇଥିଲା। ତେବେ ଆମେରିକା ନେତୃତ୍ୱାଧୀନ ପାଶ୍ଚାତ୍ୟ ରାଷ୍ଟ୍ର ଏବଂ ରୁଷିଆ-ଚାଇନା ମଧ୍ୟରେ ମତଭେଦ ଦେଖାଦେଇଥିଲା। ଜି-୨୦ ପ୍ରସ୍ତାବରେ ବିଶ୍ୱ ଚ୍ୟାଲେଞ୍ଜଗୁଡ଼ିକର ମୁକାବିଲା ନେଇ ଅଧ୍ୟକ୍ଷ ରାଷ୍ଟ୍ରର ସାରାଂଶ ଓ ପରିଣାମ ଦସ୍ତାବିଜ୍ ପ୍ରତିଫଳିତ ହୋଇଥିଲା। ବହିର୍ବ୍ୟାପାର ମନ୍ତ୍ରୀମାନେ ଆତଙ୍କବାଦର ନିନ୍ଦା କରିଥିଲେ। ମିଳିତ ବିବୃତିକୁ ରୁଷିଆ ଏବଂ ଚାଇନା ସମର୍ଥନ କଲେ ନାହିଁ ବୋଲି ଆମେରିକା ପରରାଷ୍ଟ୍ର ସଚିବ ଆଣ୍ଟୋନି ବ୍ଲିଙ୍କେନ୍ କହିଛନ୍ତି। ୟୁକ୍ରେନ୍ ଯୁଦ୍ଧ ପରେ ବ୍ଲିଙ୍କେନ ଏବଂ ତାଙ୍କ ରୁଷିଆ ପ୍ରତିପକ୍ଷ ସର୍ଗେଇ ଲାଭରୋଭ ପ୍ରଥମ ଥର ପାଇଁ ସାମ୍ନାସାମ୍ନି ହୋଇଥିଲେ। ବୈଠକ ଆରମ୍ଭରୁ ଏକ ଭିଡିଓ ବାର୍ତ୍ତା ମାଧ୍ୟମରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ବିଶ୍ୱ ଚ୍ୟାଲେଞ୍ଜ ମୁକାବିଲା କ୍ଷେତ୍ରରେ ସହମତି ହାସଲ ପାଇଁ ଆହ୍ବାନ ଦେଇଥିଲେ।
