ପୃଥିବୀରେ ବିଭିନ୍ନ ପ୍ରକାର ପ୍ରତିଯୋଗିତାମାନ ଆୟୋଜିତ ହୋଇଥାଏ। ପ୍ରତିଯୋଗୀଙ୍କ ପ୍ରତିଭା ପ୍ରଦର୍ଶନର ଏହା ଏକ ଉତ୍ତମ ମାଧ୍ୟମ ହୋଇଥିବା ବେଳେ ପ୍ରତିଭାକୁ ପ୍ରୋତ୍ସାହନ ଦେବାରେ ମଧ୍ୟ ଏହା ବେଶ୍ ସହାୟକ ହୋଇଥାଏ। ତେବେ ପୃଥିବୀରେ ଏଭଳି ବି କିଛି ପ୍ରତିଯୋଗିତା ହୁଏ ଯାହା ଦେଖିବାକୁ ଯେତିକି ନିଆରା ସେତିକି କୌତୁହଳପ୍ରଦ ମଧ୍ୟ। ସେହିଭଳି ଏକ ମଜାଦାର ପ୍ରତିଯୋଗିତା ଅନୁଷ୍ଠିତ ହୁଏ ଯୁକ୍ତରାଷ୍ଟ୍ର ଆମେରିକାରେ। ପ୍ରତିବର୍ଷ ବିଅର୍ଡ ଟିମ୍ ୟୁଏସ୍ଏ ତରଫରୁ ଅନୁଷ୍ଠିତ ହୋଇଥାଏ ଦାଢି ଏବଂ ନିଶ ପ୍ରତିଯୋଗିତା। ଏହି ପ୍ରତିଯୋଗିତାରେ ପ୍ରତିଯୋଗୀମାନେ ନିଜ ନିଶ ଏବଂ ଦାଢିକୁ ବିଭିନ୍ନ ଡିଜାଇନରେ ସଜାଡି ପ୍ରଦର୍ଶିତ କରିଥାନ୍ତି। ମୋଟ ୫୦ଟି କ୍ୟାଟେଗୋରୀରେ ପ୍ରତିଯୋଗୀମାନେ ନିଜ ନାଁ କୁ ପଞ୍ଜୀକୃତ କରିଥାନ୍ତି। ଯେକୌଣସି ବୟସର ବ୍ୟକ୍ତି ଏଥିରେ ଅଂଶ ଗ୍ରହଣ କରିବାର ସୁଯୋଗ ରହିଛି। ଏଥିରେ ଅଂଶଗ୍ରହଣ କରୁଥିବା ବ୍ୟକ୍ତିମାନେ ନିଜ ନିଶ ଏବଂ ଦାଢିକୁ ବିଭିନ୍ନ ସୃଜନାତ୍ମକ ଢଙ୍ଗରେ କାଟିବା ସହ ବିଭିନ୍ନ ଷ୍ଟାଇଲରେ ସଜାଇଥାନ୍ତି। ତେବେ ଏହି ପ୍ରତିଯୋଗିତାର ଏକ ସ୍ବତନ୍ତ୍ରତା ହେଲା ଏଥିରେ ମହିଳାମାନେ ମଧ୍ୟ ଅଂଶ ଗ୍ରହଣ କରିଥାନ୍ତି। ଏମାନେ ଆର୍ଟିଫିସିଆଲ ନିଶ ଦାଢିକୁ ନିଜ ମୁହଁରେ ବିଭିନ୍ନ ଆକାରରେ ସଜାଇ ପ୍ରତିଯୋଗିତାରେ ଭାଗ ନେଇଥାନ୍ତି। ଆକର୍ଷକ ତଥା ସୃଜନାତ୍ମକ ନିଶ ଦାଢି ଥିବା ବ୍ୟକ୍ତିଙ୍କୁ ପ୍ରତିଯୋଗିତା ଶେଷରେ ପୁରସ୍କୃତ କରାଯାଇଥାଏ।
