ଜଗତ୍ସିଂହପୁର ଅଫିସ୍,୭।୨: ନିଷ୍ଠା, ଆତ୍ମବିଶ୍ୱାସ ଓ କଠୋର ପରିଶ୍ରମ ଆଗରେ ଦାରିଦ୍ର୍ୟତା ହାର ମାନେ, ଯାହାର ଦୃଷ୍ଟାନ୍ତ ଦେଖିବାକୁ ମିଳିଛି ସ୍ଥାନୀୟ ଶିଶୁ ଆଶ୍ରମରେ। ଆଶ୍ରମର ଅନ୍ତେବାସୀ ତଥା ଜଗତ୍ସିଂହପୁର ଥାନା ପାଇକରାବାଟୀ ଅଧୀନ ଗଡ଼ମାର ନୟନା ମଲ୍ଲିକଙ୍କ ପୁଅ ବଣ୍ଟି (୧୬) କଠୋର ପରିଶ୍ରମ ବଳରେ ଜାତୀୟସ୍ତରରେ କୃତିତ୍ୱ ହାସଲ କରିଛନ୍ତି। ଶିଶୁ ଯତ୍ନ ଅନୁଷ୍ଠାନଗୁଡ଼ିକ ଦ୍ୱାରା ହେଉଥିବା ଜାତୀୟସ୍ତରୀୟ ହୌସଲା ପ୍ରତିଯୋଗିତାରେ ବଣ୍ଟି ରୋପ୍ୟ ପଦକ ଜିତି ଜଗତ୍ସିଂହପୁର ଜିଲା ପାଇଁ ଗୌରବ ଆଣିଛନ୍ତି। ଗତ ଡିସେମ୍ବର ୧୯ ରୁ ୨୧ ତାରିଖ ପର୍ଯ୍ୟନ୍ତ ହୋଇଥିବା ଏହି ପ୍ରତିଯୋଗିତାରେ ଭାଗନେଇ ସେ ଉଚ୍ଚ ଡିଆଁ (ହାଇ ଜମ୍ପ)ରେ ୨ୟ ସ୍ଥାନ ଅଧିକାର କରି ରୌପ୍ୟ ପଦକ ଜିତିଛନ୍ତି।
ଶିଶୁ ଆଶ୍ରମ ସୁପରିଣ୍ଟେଣ୍ଡେଣ୍ଟ ଅଞ୍ଜନେୟ ଆଚାର୍ଯ୍ୟ କହିଛନ୍ତି, ବଣ୍ଟି ଓ ତାଙ୍କ ସାନ ଭଉଣୀ ରାନୁ ଉଭୟ ୫ ବର୍ଷ ହେଲା ଆଶ୍ରମରେ ରହୁଛନ୍ତି। ବଣ୍ଟି ସ୍ଥାନୀୟ ଶ୍ରୀକୃଷ୍ଣ ଏକାଡେମୀରେ ଶିକ୍ଷାଲାଭ କରୁଛନ୍ତି। ବଣ୍ଟି ମାଟ୍ରିକ ପରୀକ୍ଷା ଦେଇଥିବା ବେଳେ ଗୋଟିଏ ବିଷୟରେ କମ୍ ନଂ. କାରଣରୁ ଫେଲ୍ ହୋଇଯାଇଛନ୍ତି। ସେମାନଙ୍କୁ ତାଙ୍କ ବାପା ପଚାରୁ ନଥିବାରୁ ଚାଳ ଘରଟିଏ ଥିଲେ ସୁଦ୍ଧା ସେମାନେ ମା’ଙ୍କ ସହ ବାରଣ୍ଡାରେ ରାତ୍ରିଯାପନ କରୁଥିଲେ। ଦିନରେ ତାଙ୍କ ମା’ ପାଖାପାଖି ୧୦ କି.ମି. ଚାଲି ଆସିି ସ୍ଥାନୀୟ କଲେଜ ଛକରେ ଥିବା ଏକ ଶପିଂ ମଲ୍ରେ ପହଞ୍ଚୁଥିଲେ। ମଲ୍ରେ ଘର ଓଳାଓଳି ପାଇଁ ତାଙ୍କୁ ମାସିକ ୯୫୦ଟଙ୍କା ପାରିଶ୍ରମିକ ମିଳୁଥିଲା। ଏହି ଟଙ୍କାରେ ପରିବାର ଚଳାଇବା କଷ୍ଟକର ହେବାରୁ ସେ ପିଲା ଦୁହିଁଙ୍କୁ ଶିଶୁ ଆଶ୍ରମରେ ରଖିବାକୁ ଚାହିଁଥିଲେ। ଏ ନେଇ ଜିଲା ଶିଶୁ ସୁରକ୍ଷା ୟୁନିଟ୍ (ଡିସିପିୟୁ)ରେ ଦରଖାସ୍ତ କରିଥିଲେ। ଏହାପରେ ବଣ୍ଟି ଓ ରାନୁଙ୍କୁ ଆଶ୍ରମରେ ରଖାଯାଇଥିଲା। ସେବେଠାରୁ ବଣ୍ଟି ଓ ରାନୁଙ୍କ ସମସ୍ତ ଖର୍ଚ୍ଚ ସରକାର ବହନ କରୁଛନ୍ତି। ବଣ୍ଟି ଖେଳିବାକୁ ଭଲ ପାଆନ୍ତି। ତାଙ୍କର କ୍ରୀଡ଼ା ପ୍ରେମ, ଦୃଢ଼ ମନୋବଳ ଓ ନିଷ୍ଠା ଯୋଗୁ ସେ ଏହି ସଫଳତା ପାଇଛନ୍ତି। ସେ କହିଛନ୍ତି, ଗତବର୍ଷ ଜିଲାସ୍ତରୀୟ ହୌସ୍ଲା ପ୍ରତିଯୋଗିତାରେ ବଣ୍ଟି ପ୍ରଥମ ସ୍ଥାନ ଅଧିକାର କରି ରାଜ୍ୟସ୍ତରକୁ ମନୋନୀତ ହୋଇଥିଲେ। ଏବର୍ଷ ସେ ବିଭିନ୍ନ କ୍ରୀଡ଼ାରେ ରାଜ୍ୟସ୍ତରରେ ପ୍ରଥମ ସ୍ଥାନ ଅଧିକାର କରିଥିଲେ। ତେଣୁ ତାଙ୍କୁ ନୂଆଦିଲ୍ଲୀସ୍ଥିତ ଜାତୀୟ ହୌସ୍ଲା ପ୍ରତିଯୋଗିତାରେ ଭାଗ ନେବା ପାଇଁ ପଠାଯାଇଥିଲା। ସେଠାରେ ସେ ଉଚ୍ଚଡିଆଁରେ ରୌପ୍ୟ ପଦକ ହାସଲ କରିଛନ୍ତି। ଏଥିସହ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ୩୦ ହଜାର ଟଙ୍କା ପୁରସ୍କାର ରାଶି ପ୍ରଦାନ କରିଛନ୍ତି। ଜିଲା ଶିଶୁ ମଙ୍ଗଳ ସମିତି, ଜିଲା ଶିଶୁ ସୁରକ୍ଷା ୟୁନିଟ୍ ଏବଂ ଶିଶୁ ଆଶ୍ରମ ପରିଚାଳନା କମିଟି ପକ୍ଷରୁ ବଣ୍ଟିଙ୍କୁ ସମ୍ମାନିତ କରାଯାଇଛି। କେବଳ ବଣ୍ଟି ନୁହେଁ, ରାନୁ ମଧ୍ୟ ରାଜ୍ୟସ୍ତରୀୟ ହୌସ୍ଲା ପ୍ରତିଯୋଗିତାକୁ ମନେନୀତ ହୋଇଥିଲେ। ସେ ଜଣେ ଭଲ ନୃତ୍ୟଶିଳ୍ପୀ। ବଣ୍ଟିଙ୍କ ଏହି ସଫଳତା ଅନ୍ୟମାନଙ୍କୁ ପ୍ରେରଣା ଯୋଗାଇବ ବୋଲି ଜିଲା ଶିଶୁ ସୁରକ୍ଷା ୟୁନିଟ୍ ପକ୍ଷରୁ କୁହାଯାଇଛି।
