ପୁରୀ ଅଫିସ,୨୨।୩: ମହାମାରୀ କରୋନାକୁ ନେଇ ଏବେ ସବୁଠି ଆତଙ୍କ। ସମଗ୍ର ବିଶ୍ୱ କରୋନା ସହିତ ଲଢ଼େଇ କରୁଥିବାବେଳେ ଭାରତ ବି ପ୍ରାଣମୂର୍ଚ୍ଛା ଚେଷ୍ଟା ଚଳାଇଛି। କିନ୍ତୁ ବେକାବୁ କରୋନା ଦିନକୁ ଦିନ ଅଧିକ ଉଗ୍ରରୂପ ଧାରଣ କରି ଗୋଟିଏ ପରେ ଗୋଟିଏ ଦେଶକୁ ମାଡ଼ି ଚାଲିଛି। କେବଳ ନୂଆ ଦେଶକୁ ମାଡ଼ୁନି ବରଂ ଅନେକ ମୁଣ୍ଡ ବି ଗଡ଼ାଇ ଚାଲିଛି। ଏହାକୁ କିପରି ରୋକାଯାଇପାରିବ ସେନେଇ ସବୁସ୍ତରରେ ଚିନ୍ତା ପ୍ରକଟ କରାଯାଉଛି। ତେବେ ଏଭଳି ସ୍ଥିତିରେ କରୋନା ମୁକାବିଲା ପାଇଁ ଦେଶବାସୀଙ୍କୁ ଜନତା କର୍ଫ୍ୟୁର ଆହ୍ବାନ ଦେଇଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି। ରବିବାର ଜନତା କର୍ଫ୍ୟୁରେ ସମସ୍ତେ ସହଯୋଗ କରିବା ଲାଗି ସ୍ୟାଣ୍ଡ ଆନିମେଶନରେ ଅନୁରୋଧ କରିଛନ୍ତି ବାଲୁକା ଶିଳ୍ପୀ ମାନସ କୁମାର ସାହୁ। ଏହି ପ୍ରାଣଘାତୀ କରୋନା ଭୂତାଣୁ ପାଇଁ ଏ ପର୍ଯ୍ୟନ୍ତ କୌଣସି ଔଷଧ ବାହାରିପାରି ନ ଥିବାବେଳେ କେବଳ ସଚେତନତା ହିଁ ଏହାକୁ ପରାସ୍ତ କରିହେବ। ତେଣୁ ପ୍ରଧାନମନ୍ତ୍ରୀଙ୍କ ଜନତା କର୍ଫ୍ୟୁକୁ ସମର୍ଥନ ଜଣାଇ ମାନସ ତିଆରି କରିଛନ୍ତି ସଚେତନତାଭିତ୍ତିକ ସ୍ୟାଣ୍ଡ ଆନିମେଶନ। ଏହା ମାଧ୍ୟମରେ ସେ ଜନସମାଜର ସମର୍ଥନ ଲୋଡିଛନ୍ତି। ସମସ୍ତଙ୍କୁ ନିଜ ଆର୍ଟ ମାଧ୍ୟମରେ ୨୨ ମାର୍ଚ୍ଚ ସକାଳ ୭ଟାରୁ ରାତି ୯ଟା ପର୍ଯ୍ୟନ୍ତ ଘରୁ ନ ବାହାରିବା ପାଇଁ ଆହ୍ବାନ ଦେଇଛନ୍ତି। ସେ ତାଙ୍କ ସ୍ୟାଣ୍ଡ ଆନିମେଶନରେ ବିଭିନ୍ନ ରାଜ୍ୟର ଐତିହ୍ୟ କୀର୍ତ୍ତିରାଜି ଓ ରାସ୍ତାଘାଟ କିପରି ଶୂନ୍ଶାନ ରହିଛି ତାହା ଦର୍ଶାଇଛନ୍ତି। ଏହାକୁ ପ୍ରସ୍ତୁତ କରିବା ଲାଗି ମାନସଙ୍କୁ ୩ ଘଣ୍ଟା ସମୟ ଲାଗିଥିବାବେଳେ ଏଥିରେ ସେ ସପୋର୍ଟ ଜନତା କର୍ଫ୍ୟୁ, ସେଭ୍ ସେଲ୍ଫର ବାର୍ତ୍ତା ଦେଇଛନ୍ତି।
