ଖୋର୍ଦ୍ଧା ଅଫିସ,୨୭ା୩: ସମ୍ପ୍ରତି କରୋନା ଭୂତାଣୁ ସଂକ୍ରମଣ ରୋକିବା ନେଇ ଦେଶରେ ଲକ୍ଡାଉନ୍ ଘୋଷଣା କରାଯାଇଛି। ଏହାଦ୍ୱାରା ଦିନମଜୁରିଆ ତଥା ଗରିବ ଶ୍ରେଣୀର ଲୋକେ ପ୍ରଭାବିତ ହୋଇଛନ୍ତି। ସେମାନେ କାମଧନ୍ଦା ପାଉ ନ ଥିବାରୁ ଅସୁବିଧାରେ ଚଳୁଛନ୍ତି। ଅଧିକାଂଶ ଲୋକଙ୍କ ଘରେ ଚୁଲି ଜଳୁନି। ଖୋର୍ଦ୍ଧା ବ୍ଲକ ନାଲିପଡିଆ ଅର୍ଜୁନପୁର ପଞ୍ଚାୟତର ଶରଧାପୁର ଗ୍ରାମରେ ଏଭଳି ଦୃଶ୍ୟ ଦେଖିବାକୁ ମିଳିଛି। ଏହି ଗ୍ରାମରେ ରହୁଥିବା ୨୦୦ ପରିବାର ଦୈନିକ ମୂଲ ଲାଗି ପରିବାର ପ୍ରତିପୋଷଣ କରିଥାନ୍ତି। କୌଣସି କାରଣରୁ କାମକୁ ନ ଗଲେ ପରିବାର ଚଳାଇବା କଷ୍ଟକର ହୋଇପଡ଼େ। ଏଭଳି ସ୍ଥଳେ ଲକ୍ଡାଉନ୍ ସ୍ଥିତି ଯୋଗୁ ଏହି ଗରିବ ଶ୍ରେଣୀର ପରିବାର ଏବେ ହାତବାନ୍ଧି ବସିଛନ୍ତି। ଅନେକ ପରିବାର ଓଳିଏ ଖାଇଲେ ଓଳିଏ ଉପବାସ ରହୁଛନ୍ତି। ରୋଗୀ, ପିଲାଛୁଆ, ବୃଦ୍ଧାବୃଦ୍ଧ ବେଶି ହଇରାଣ ହେଉଛନ୍ତି। ଯଦି ଆହୁରି କିଛିଦିନ ଏଭଳି ପରିସ୍ଥିତି ଲାଗି ରହେ ତାହାଲେ ସେମାନଙ୍କ ଅବସ୍ଥା ଦୁର୍ବିଷହ ହୋଇପଡ଼ିିବ ବୋଲି ଗ୍ରାମର ଦୁଃଖିଶ୍ୟାମ ବେହେରା କହିଛନ୍ତି। ସେହିପରି ଜାପାନୀ ଦେଈ ଓ ସରୋଜିନୀ ଦେଈ କହିଛନ୍ତି, ଭତ୍ତା ଟଙ୍କା ଉପରେ ଆମେ ନିର୍ଭର କରୁ। ଏପର୍ଯ୍ୟନ୍ତ ଭତ୍ତା ମିଳିନାହିଁ। ପାଖରେ ଥିବା ଟଙ୍କା ସରିଆସିଲାଣି। ଆଗକୁ କିପରି ଚଳିବୁ, ସେ ନେଇ ଚିନ୍ତାରେ ପଡ଼ିଛୁ। ଏ ନେଇ ସରପଞ୍ଚ ସୁବାସିନୀ ଦାସ କହିଛନ୍ତି, ଏହି ପଞ୍ଚାୟତର ୧୫ଟି ୱାର୍ଡ ମଧ୍ୟରୁ ୪ଟି ୱାର୍ଡରେ ଭତ୍ତା ବଣ୍ଟା ସରିଛି। ଖୁବଶୀଘ୍ର ଅନ୍ୟ ୱାର୍ଡରେ ଭତ୍ତା ଏବଂ ଖାଦ୍ୟ ସୁରକ୍ଷା ଯୋଜନାରେ ଚାଉଳ, ଗହମ ଯୋଗାଇ ଦିଆଯିବ। ଗ୍ରାମର ବ୍ରିକମ କେଶରୀ ବଡଜେନା କହିଛନ୍ତି, ଏମାନେ ସାଧାରଣତଃ ଶିଳ୍ପ, କୋଠାବାଡ଼ିି, ରାସ୍ତା କାମ କରିବା ସହ ମୂଲମଜୁରି ଲାଗି ଚଳନ୍ତି। ଏବେ ଲକ୍ଡାଉନ୍ ଯୋଗୁ କାମ ବନ୍ଦ ରହିଛି। ତେଣୁ ପରିବାର ଚିନ୍ତା ବଳେଇ ପଡ଼ିଛି। ଏମାନଙ୍କ ଲାଗି ସରକାର ତୁରନ୍ତ ପଦକ୍ଷେପ ନେବା ଜରୁରୀ ହୋଇପଡ଼ିିଛି।
