ଅହମଦାବାଦ,୯ ।୧୨: ଚଳିତ ଥର ଗୁଜରାଟ ବିଧାନସଭା ନିର୍ବାଚନରେ କଂଗ୍ରେସ ଶୋଚନୀୟ ଭାବେ ପରାଜୟ ସ୍ୱୀକାର କରିଛି । ସ୍ୱାଧୀନତା ପରେ କଂଗ୍ରେସ ଏତେବଡ ପରାଜୟର ସାମ୍ନା କେବେବି କରି ନ ଥିଲା । ଏହି ପରାଜୟ ପାଇଁ ନିଜକୁ ଦାୟୀ କରି କଂଗ୍ରେସ ପ୍ରଭାରୀ ରଘୁ ଶର୍ମା ଇସ୍ତଫା ଦେଇଛନ୍ତି । ସେ ତାଙ୍କ ଇସ୍ତଫା ପତ୍ର କଂଗ୍ରେସର ରାଷ୍ଟ୍ରୀୟ ଅଧ୍ୟକ୍ଷ ମଲ୍ଲିକାର୍ଜୁନ ଖର୍ଗେଙ୍କୁ ଦେଇଛନ୍ତି । ଏହାପରେ ରାଜନୀତି ସରଗରମ ହେବା ସହ ତାଙ୍କ ଇସ୍ତଫାକୁ ନେଇ ଅନେକ ଅନୁମାନ ଲଗାଯାଉଛି ।
ସୂଚନାଯୋଗ୍ୟ, ରଘୁ ଶର୍ମା ମୁଖ୍ୟମନ୍ତ୍ରୀ ଅଶୋକ ଗେହଲଟଙ୍କର ଅତି ନିକଟତମ ବୋଲି କୁହାଯାଏ । ସେ ତାଙ୍କ ଇସ୍ତଫା ପତ୍ରରେ ଲେଖିଛନ୍ତି, ଅପ୍ରତ୍ୟାଶିତ ପରାଜୟ ପାଇଁ ମୁଁ ସମ୍ପୂର୍ଣ୍ଣ ଭାବେ ନୈତିକ ଦାୟିତ୍ୱ ନେଉଛି ଓ ଗୁଜରାଟ ପ୍ରଭାରୀ ପଦରୁ ଇସ୍ତଫା ଦେଉଛି । ଏବେ ରଘୁ ଶର୍ମାଙ୍କ ରାଜନୈତିକ ଯାତ୍ରା କ’ଣ ହେବ ତାକୁ ନେଇ ଆଲୋଚନା ଆରମ୍ଭ ହୋଇଯାଇଛି ।
ସୂଚନାଯୋଗ୍ୟ, ୨୦୨୧ରେ ବେଶ କିଛିଦିନର ଅନ୍ତର ପରେ କଂଗ୍ରେସ ଗୁଜରାଟ ପ୍ରଭାରୀ ଘୋଷଣା କରିଥିଲା । ସେ ସମୟରେ ରଘୁ ଶର୍ମାଙ୍କୁ ନେଇ ବଡ ବଡ କଥା କୁହାଯାଇଥିଲା । କରୋନା ସମୟରେ ରଘୁଶର୍ମା ରାଜସ୍ଥାନ ସରକାରରେ ସ୍ୱାସ୍ଥ୍ୟ ମନ୍ତ୍ରୀ ଥିଲେ । ସେ ସମୟରେ ସେ ଖୁବ୍ ଚର୍ଚ୍ଚାରେ ଥିଲେ । ତାଙ୍କ କାର୍ଯ୍ୟକୁ ପ୍ରଶଂସା କରାଯାଉଥିଲା । ଗୁଜରାଟ ସହ ତାଙ୍କୁ ଦମନ ଓ ଡିୟୁ ଓ ଦାଦର ଓ ନଗର ହାବେଲି ପାଇଁ କଂଗ୍ରେସ କମିଟିର ପ୍ରଭାରୀ ନିଯୁକ୍ତ କରାଯାଇଥିଲା । ଏକାଥରେ ଏତେ ଗୁଡିଏ ଦାୟିତ୍ୱ ମିଳିଥିବାରୁ ରାଙ୍କ ରାଜନୈତିକ କ୍ୟାରିୟରକୁ ମଜଭୁତ ବୋଲି କୁହାଯାଇଥିଲା । ହେଲେ ଏବେ ଇସ୍ତଫା ପରେ ତାଙ୍କର ରାଜନୈତିକ କ୍ୟାରିୟର କୁଆଡେ ଯିବ ତାକୁ ନେଇ ଆଲୋଚନା ହେଉଛି ।
