କଟକ,୨୨।୨(ସ୍ପୋଟର୍ସ ବ୍ୟୁରୋ): ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଶନିବାର ପ୍ରଥମ ଖେଲୋ ଇଣ୍ଡିଆ ୟୁନିଭର୍ସିଟି ଗେମ୍ସ ଉଦ୍ଘାଟନ କରିଛନ୍ତି। ସ୍ଥାନୀୟ ଜବାହରଲାଲ ନେହରୁ ଇନ୍ଡୋର ଷ୍ଟାଡିୟମରେ ଆୟୋଜିତ ଏକ ରଙ୍ଗାରଙ୍ଗ ଉତ୍ସବରେ ଏହି ମେଗା ଇଭେଣ୍ଟର ଶୁଭାରମ୍ଭ ହୋଇଛି। ଏହି ଇଭେଣ୍ଟ ଦେଶରେ କ୍ରୀଡ଼ା ବିପ୍ଳବ ଆଣିବ ବୋଲି କହିଛନ୍ତି। ଦେଶର ୧୫୯ ବିଶ୍ୱବିଦ୍ୟାୟରୁ ପାଖାପାଖି ୩୪୦୦ ଆଥଟେ ଏଥିରେ ଅଂଶଗ୍ରହଣ କରିବେ। ୧୭ଟି ବର୍ଗରେ ପ୍ରତିଯୋଗିତା ଆୟୋଜନ ହେବ। ରଗବୀ ସମେତ ୬ଟି ଟିମ୍ ଇଭେଣ୍ଟରେ ମଧ୍ୟ ପ୍ରତିଯୋଗିତା ଆୟୋଜନ ହେବ।
ଭିଡିଓ କନ୍ଫୋରେନ୍ସ ମାଧ୍ୟମରେ ପ୍ରଧାନମନ୍ତ୍ରୀ ଏହି ଏହି ମେଗା ଇଭେଣ୍ଟକୁ ଉଦ୍ଘାଟନ କରିଥିଲେ। ଭାରତୀୟ କ୍ରୀଡ଼ା ପାଇଁ ଏହା ଏକ ଐତିହାସିକ ମୁହୁର୍ତ୍ତ ସୃଷ୍ଟି କରିଛି। ଦେଶରେ କ୍ରୀଡ଼ା ବିପ୍ଳବକୁ ଏହି ଇଭେଣ୍ଟ ଗୋଟିଏ ପାଦ ଆଗକୁ ନେଇଛି ବୋଲି ପ୍ରଧାନମନ୍ତ୍ରୀ ତାଙ୍କ ଅଭିଭାଷଣରେ କହିଛନ୍ତି। ଓଡ଼ିଶାରେ ଏକ ନୂଆ ଇତିହାସ ସୃଷ୍ଟି ହୋଇଛି। ଏହି ଇଭେଣ୍ଟ ଭାରତୀୟ କ୍ରୀଡ଼ାର ଭବିଷ୍ୟତ ପାଇଁ ଏକ ବଡ଼ ପଦକ୍ଷେପ ସଦୃଶ ହୋଇଛି।
ଏହି ଅବସରରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ, କେନ୍ଦ୍ରକ୍ରୀଡ଼ା ମନ୍ତ୍ରୀ କିରେନ ରିଜିଜୁ ଓ କେନ୍ଦ୍ର ପେଟ୍ରୋଲିୟମ ଓ ନ୍ୟାଚୁରାଲ ଗ୍ୟାସ୍ ମନ୍ତ୍ରୀ ଧର୍ମେନ୍ଦ୍ର ପ୍ରଧାନ, କ୍ରୀଡ଼ା ସଚିବ ରାଧେ ଶ୍ୟାମ ଜୁଲାନିୟା ଉପସ୍ଥିତ ଥିଲେ। ଆୟୋଜକ କିଟ୍ ୟୁନିଭର୍ସିଟି ଛାତ୍ରୀ ତଥା ତାରକା ମହିଳା ସ୍ପ୍ରିଣ୍ଟର ଦୂତୀ ଚାନ୍ଦ ମଧ୍ୟ ଉଦ୍ଘାଟନୀ ଉତ୍ସବରେ ଉପସ୍ଥିତ ଥିଲେ। ଅନ୍ୟମାନଙ୍କ ମଧ୍ୟରେ ମାଙ୍ଗାଲୋର ବିଶ୍ୱବିଦ୍ୟାଳୟ ଟ୍ରିପଲ ଜମ୍ପର ଜୟ ଶାହ, ତାଙ୍କ ଦଳୀୟ ସାଥୀ ତଥା ଲଙ୍ଗ ଡିଷ୍ଟାନ୍ସ ରନର ନରେନ୍ଦ୍ର ପ୍ରତାପ ସିଂ, ପୁଣେ ବିଶ୍ୱ ବିଦ୍ୟାଳୟ ଲଙ୍ଗ ଡିଷ୍ଟାନ୍ସ ରନର କୋମଲ ଜାଗାଦଲେ ଓ ଅଚାର୍ଯ୍ୟ ନାଗାର୍ଜୁନ ବିଶ୍ୱବିଦ୍ୟାଳୟ ସ୍ପ୍ରିଣ୍ଟର ୟାରାଜି ଜ୍ୟୋତି ମଧ୍ୟ ଉପସ୍ଥିତ ଥିଲେ।
ଖେଲୋ ଇଣ୍ଡିଆ ୟୁନିଭର୍ସିଟି ଗେମ୍ସ ଯୁବ ଆଥଲେଟଙ୍କ ସ୍ବପ୍ନ ପୂରଣ କରିବ ବୋଲି ପ୍ରଧାନମନ୍ତ୍ରୀ କହିଛନ୍ତି। ଏହି ଅବସରରେ ସେ ଆଥଲେଟମାନଙ୍କୁ ବିଭିନ୍ନ ଉପଦେଶ ତଥା ପରାମର୍ଶ ଦେଇଥିଲେ। ଏହି ଇଭେଣ୍ଟ ମାଧ୍ୟମରେ ନିଜ ନିଜ ମଧ୍ୟରେ ନୁହଁ ବରଂ ନିଜ ସହିତ ପ୍ରତିଦ୍ୱନ୍ଦ୍ୱୀତା କର। ତୁମର କଠିନ ପରିଶ୍ରମ ତୁମର ଓ ତୁମ ପରିବାରର ସ୍ବପ୍ନକୁ ପୂରଣ କରିବ ବୋଲି ପ୍ରଧାନମନ୍ତ୍ରୀ କହିଛନ୍ତି। ଏ ନେଇ ସରକାରଙ୍କ ପ୍ରୟାସକୁ ମଧ୍ୟ ସେ ପ୍ରଶଂସା କରିଛନ୍ତି। ଏହି ଇଭେଣ୍ଟ ମଧ୍ୟମରେ ଦେଶରେ କ୍ରୀଡ଼ା ପ୍ରତିଭା ଚିହ୍ନଟ ଓ ବିକାଶ ହେବେ ବୋଲି ସେ କହିଛନ୍ତି। ଏହା ଦ୍ୱାରା କ୍ରୀଡ଼ା ଓ କ୍ରୀଡ଼ାବିତଙ୍କ ଉନ୍ନତି ହୋଇପାରିବ। ଦେଶରେ କ୍ରୀଡ଼ା ଭିତ୍ତିଭୂମିରେ ମଧ୍ୟ ଏହି ଇଭେଣ୍ଟ ମାଧ୍ୟରେ ଉନ୍ନତି ହୋଇଛି। ବଡ଼ ବଡ଼ ସହରରୁ ନୁହଁ ବରଂ ଗ୍ରାମାଞ୍ଚଳରୁ ଯୁବ କ୍ରୀଡ଼ାବିତମାନେ ଭଲ ପ୍ରଦର୍ଶନ କରି ସମସ୍ତଙ୍କ ଦୃଷ୍ଟି ଆକର୍ଷଣ କରୁଛନ୍ତି। ଗରିବ ପରିବାରରୁ ଆସିଥିଲେ ମଧ୍ୟ ଏମାନେ ଦେଶର ପାଇଁ ନୂଆ ଆଶା ସୃଷ୍ଟି କରିଛନ୍ତି। ପ୍ରତିଭା ଚିହ୍ନଟ ଓ ବିକାଶରେ ଆମେ ସ୍ବଚ୍ଛତା ଆଣିବାକୁ ପ୍ରୟାସ କରିଛୁ। ଏହା ଦ୍ୱାରା ଆମେ ଆଥଲେଟମାନେ ବିଶ୍ୱସ୍ତରରେ ଅପେକ୍ଷାକୃତ ଅଧିକ ଭଲ ପ୍ରଦର୍ଶନ କରୁଛନ୍ତି ବୋଲି ପ୍ରଧାନ ମନ୍ତ୍ରୀ କହିଛନ୍ତି।
