ଆଜିକାଲିର ବ୍ୟସ୍ତ ଜୀବନଶୈଳୀ ଯୋଗୁ ନିଜ ପାଇଁ ସମୟ ବାହାର କରିବା କଷ୍ଟକର। ଦୈନନ୍ଦିନ ଜୀବନଚର୍ଯ୍ୟା ଆରମ୍ଭ କରିବା ପୂର୍ବରୁ କିଛି ସମୟ ବ୍ୟାୟାମ କରିବା ଉଚିତ। ତେବେ ବ୍ୟାୟାମ କରିବା ସମୟରେ ଅନେକଙ୍କୁ ଥକ୍କା ଲାଗିଥାଏ। ଏପରି କିଛି ଖାଦ୍ୟ ରହିଛି ଯାହାକୁ ବ୍ୟାୟାମ ପୂର୍ବରୁ ଖାଇବା ଦ୍ୱାରା ଥକ୍କାପଣ ଅନୁଭୂତ ହୋଇ ନ ଥାଏ। ଏଥିସହ ଶରୀରକୁ ଆବଶ୍ୟକ ଶକ୍ତି ମଧ୍ୟ ମିଳିଥାଏ। କାରଣ ଖାଲିପେଟରେ ବ୍ୟାୟାମ କରିବା ଆଦୌ ଉଚିତ ନୁହେଁ। ମାତ୍ର ଖାଦ୍ୟ ପରିମାଣ ଉପରେ ଧ୍ୟାନ ମଧ୍ୟ ରଖନ୍ତୁ। ଆସନ୍ତୁ ଜାଣିବା ସେଭଳି କିଛି ପ୍ରୋଟିନଯୁକ୍ତ ଖାଦ୍ୟ ବିଷୟରେ:
ଦଲିଆ: ବ୍ୟାୟାମ ବା ଏକ୍ସରସାଇଜ୍ କରିବାର ୩୦ ମିନିଟ୍ ପୂର୍ବରୁ ପାଖାପାଖି ୧ ଗିନା ଦଲିଆ ଖାଇବା ଉଚିତ। ଏହା ଫାଇବର ଏବଂ ପ୍ରୋଟିନର ଏକ ମହତ୍ତ୍ୱପୂର୍ଣ୍ଣ ସ୍ରୋତ।
କଦଳୀ: ବ୍ୟାୟାମ କରିବାର ୩୦ ମିନିଟ୍ ପୂର୍ବରୁ ୨ଟି କଦଳୀ ଖାଇବା ଆବଶ୍ୟକ। କଦଳୀରେ ଅଧିକ ମାତ୍ରାରେ ପୋଟାସିୟମ ରହିଥିବାରୁ ବ୍ୟାୟାମ ସମୟରେ ମାଂସପେଶୀ ଟାଣିହୋଇ ନ ଥାଏ।
ବ୍ରାଉନ୍ ବ୍ରେଡ୍: ବ୍ରାଉନ୍ ବ୍ରେଡ୍ରେ ତିଆରି ସାଣ୍ଡଉଇଜ୍ ସ୍ବାସ୍ଥ୍ୟ ପାଇଁ ଲାଭଦାୟକ। ତେଣୁ ବ୍ୟାୟାମ କରିବାର ୩୦ ମିନିଟ୍ ପୂର୍ବରୁ ଏହାକୁ ଖାଇବା ଆବଶ୍ୟକ। ଏହାକୁ ଖାଇବା ଦ୍ୱାରା ଶରୀରକୁ ଆବଶ୍ୟକ ପ୍ରୋଟିନ୍, କାର୍ବୋହାଇଡ୍ରେଟ୍ ମିଳିଥାଏ। ତେଣୁ ବ୍ୟାୟାମ ସମୟରେ କୌଣସି ପ୍ରକାର ସମସ୍ୟା ଅନୁଭବ ହୋଇ ନ ଥାଏ। ଏବଂ ଅଧିକ ସମୟ ପର୍ଯ୍ୟନ୍ତ ବ୍ୟାୟାମ କରିହେବ।
ବିଟ୍ ଜୁସ୍: ବିଟ୍ ଜୁସ୍ରେ ପୋଟାସିୟମ୍, ମ୍ୟାଗ୍ନେସିୟମ୍, ଭିଟାମିନ ବି ଏବଂ ଏନର୍ଜୀ ଭରପୂର ମାତ୍ରାରେ ରହିଛି। ବ୍ୟାୟାମ କରିବାର ୩୦ ମିନିଟ୍ ପୂର୍ବରୁ ଏକ ଗ୍ଲାସ୍ ଜୁସ୍ ସେବନ କରିବା ଦ୍ୱାରା ଶରୀରରେ ଶକ୍ତି ଏବଂ ସହନଶକ୍ତି ବଢ଼ିଥାଏ। ଏହାକୁ ପିଇବା ଦ୍ୱାରା ନ ଥକି ଅଧିକ ସମୟ ପର୍ଯ୍ୟନ୍ତ ବ୍ୟାୟାମ କରିପାରିବେ।
କ୍ଷୀର, କଦଳୀ, ଅଖରୋଟ ଜୁସ୍: କ୍ଷୀର, କଦଳୀ, ଅଖରୋଟ ଏବଂ ଚିନିକୁ ମିଶାଇ ଏକ ଜୁସ୍ ପ୍ରସ୍ତୁତ କରନ୍ତୁ। ଏହାକୁ ବ୍ୟାୟାମ କରିବାର ୩୦ ମିନିଟ ପୂର୍ବରୁ ପିଅନ୍ତୁ। ଏହାଦ୍ୱାରା ଶରୀରକୁ ଶକ୍ତି ମିଳିଥାଏ।
