ରାଉରକେଲା ଅଫିସ,୬ା୫: ରାଜସ୍ଥାନ କୋଟାରୁ ଛାତ୍ରୀଛାତ୍ରଙ୍କୁ ନେଇ ଆସିଥିବା ଏକ ବସ୍କୁ ଜିଲା ପ୍ରଶାସନ ଓ ରାଉରକେଲା ମହାନଗର ନିଗମ ପକ୍ଷରୁ ଅଟକ ରଖାଯାଇଛି। ମିଳିଥିବା ସୂଚନା ଅନୁଯାୟୀ, କୋଟାରୁ ୨୫ ଜଣ ଛାତ୍ରୀଛାତ୍ରଙ୍କୁ ନେଇ ଏହି ବସ୍ ରାଉରକେଲା ଅଭିମୁଖେ ଆସିଥିଲା। ଏଥିରେ ରାଉରକେଲାର ୧୨ ଛାତ୍ରୀଛାତ୍ର ଥିବାବେଳେ ଅନ୍ୟ ୧୩ ଜଣ ସମ୍ବଲପୁର, ଅନୁଗୋଳ, ନୂଆପଡ଼ା, କଟକ, ଯାଜପୁରର ଥିଲେ। ୨ ଦିନ ତଳେ ଏହି ବସ୍ଟି କୋଟାରୁ ବାହାରିବା ବେଳେ ଛାତ୍ରୀଛାତ୍ରଙ୍କ ମେଡିକାଲ ଯାଞ୍ଚ କରାଯାଇଥିଲା। ଛାତ୍ରୀଛାତ୍ରଙ୍କ ହାତରେ ଷ୍ଟାମ୍ପିଂ ପରେ ସମସ୍ତଙ୍କୁ ଛଡ଼ା ଯାଇଥିଲା। କିନ୍ତୁ ସେଠାକାର ପ୍ରଶାସନ ରାଉରକେଲା ପ୍ରଶାସନକୁ କୋଣସି ସୂଚନା ଦେଇ ନ ଥିଲା। ତେବେ ସମ୍ବଲପୁର, ଅନୁଗୋଳ, ନୂଆପଡ଼ା, କଟକ, ଯାଜପୁରର ଛାତ୍ରୀଛାତ୍ର ନିଜ ନିଜ ଘରକୁ ଚାଲି ଯାଇଥିବାବେଳେ ବସ୍ଟି ସିଧାସଳଖ ଆସି ସେକ୍ଟର ୨ ବସ୍ଷ୍ଟାଣ୍ଡରେ ଲାଗିଥିଲା। ଏ ବାବଦରେ ସୂଚନା ପାଇବା ପରେ ବସ୍କୁ ରାଉରକେଲା ମହାନଗର ନିଗମର ଅଧିକାରୀମାନେ ବିପିୟୁଟି କ୍ୟାମ୍ପସ୍କୁ ଆଣି ଅଟକ ରଖିଛନ୍ତି। ଯେଉଁପିଲାମାନେ ଘରକୁ ପଳାଇଛନ୍ତି ସେମାନଙ୍କର ମେଡିକାଲ ଯାଞ୍ଚ କରାଯିବ ବୋଲି ପ୍ରଶାସନ ପକ୍ଷରୁ କୁହାଯାଇଛି।
