କେସିଙ୍ଗା,୩।୯(ଡି.ଏନ୍.ଏ.): ନୂଆଖାଇକୁ ନେଇ ସମଗ୍ର ପଶ୍ଚିମ ଓଡ଼ିଶା ଚଳଚଞ୍ଚଳ। ଇଷ୍ଟଦେବୀ ମା’ ସମଲେଇଙ୍କ ନିକଟରେ ମଙ୍ଗଳବାର ସକାଳ ୧୦ଟାରୁ ପୂଜା ଆରମ୍ଭ ହୋଇ ନବାନ୍ନ ଲାଗି ହୋଇଛି। ଏହି କ୍ରମରେ କଳାହାଣ୍ଡି ଜିଲା କେସିଙ୍ଗା ବ୍ଲକରେ ଥିବା ବାଲସି ଗ୍ରାମର ଗ୍ରାମଦେବତା କନ୍ଦାଡ଼ୁଙ୍ଗରଙ୍କ ନିକଟରେ ଛେଳି, କୁକୁଡ଼ା ଆଦିଙ୍କୁ ବଳି ଦିଆଯାଇଛି। ଗ୍ରାମର ଜାନୀ ଘରେ ଥିବା ଧରଣୀ ମନ୍ଦିରରେ ନୀତି ନିୟମ ଅନୁଯାୟୀ ପୂଜାର୍ଚ୍ଚନା ସମ୍ପୂର୍ଣ୍ଣ ହୋଇଛି। ସେହିଭଳି ଗ୍ରାମର ଶ୍ରୀଜଗନ୍ନାଥ ମନ୍ଦିରରେ ନୀତିକାନ୍ତି ପରେ ଗ୍ରାମର ଜାନୀ ଘରେ ପ୍ରଥମେ ନୂଆ ଖାଇଥିଲେ। ଏହାପରେ ବାଲସି ଗ୍ରାମ ସହ କେସିଙ୍ଗା ବ୍ଲକର ୨୬ଟି ଗ୍ରାମପଞ୍ଚାୟତରେ ନୂଆଖାଇ ଶେଷ ହୋଇଛି।
ପରମ୍ପରାନୁଯାୟୀ, ପ୍ରତ୍ୟେକଲୋକେ ନୂଆ ଧାନର ଚୂଡ଼ା ଖାଇବା ପରେ ନୂତନ ବସ୍ତ୍ର, ଅଳଙ୍କାର ଆଦି ପିନ୍ଧିଥାନ୍ତି। ଏହା ତିନି ଦିନ ଧରି ପାଳନ ହୋଇଥାଏ। ପ୍ରତ୍ୟେକ ଘରେ ପିଠା,ଖିରି, ମାଛ, ମାଂସ ଆଦିର ଆସର ଜମେ। ନାଚଗୀତର ତାଳେତାଳେ ଅଞ୍ଚଳବାସୀ ଦିନଟିକୁ କାଟିଥାନ୍ତି। ଅପରାହ୍ନରେ ନୂଆ ଖାଇ ସରିବା ପରେ ଗ୍ରାମର ବୟୋଜ୍ୟେଷ୍ଠ ବ୍ୟକ୍ତିଙ୍କଠାରୁ ଆଶିର୍ବାଦ ନେଇଥାନ୍ତି। ସଂନ୍ଧ୍ୟାରେ ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମ ଅନୁଷ୍ଠିତ ହୋଇଥାଏ।
