କୋଚି, ୨୧ା୫ (ପି.ଟି.)-ଜାତୀୟ ଫୁଟ୍ବଲ ଟିମ୍ ଡିଫେଣ୍ଡର ସନ୍ଦେଶ ଝିଙ୍ଗାନ ବୁଧବାର କେରଳ ବ୍ଲାଷ୍ଟର୍ସ ଦଳ ଛାଡ଼ିଛନ୍ତି। ଇଣ୍ଡିଆନ ସୁପର ଲିଗ୍ (ଆଇଏସ୍ଏଲ)ର ଏହି ଦଳ ସହିତ ସେ ୬ବର୍ଷ ଧରି ସଂଶ୍ଳିଷ୍ଟ ଥିଲେ। ୨୦୧୫ରେ ପଦାର୍ପଣ କରିବା ପରଠାରୁ ଝିଙ୍ଗାନ ଭାରତ ତରଫରୁ ୩୬ଟି ମ୍ୟାଚ ଖେଳି ସାରିଲେଣି। ଆସନ୍ତା ଆଇଏସ୍ଏଲ୍ ସିଜନ ପୂର୍ବରୁ କ୍ଲବ ସହିତ ଆପୋସ ବୁଝାମଣାରେ ସେ ଅଲଗା ହୋଇଛନ୍ତି। ୨୦୧୪ରୁ ଝିଙ୍ଗାନ୍ ବ୍ଲାଷ୍ଟର୍ସ ଦଳର ଡିଫେନ୍ସ ପୋଜିଶନରେ ଖେଳି ଆସୁଛନ୍ତି। ତାଙ୍କର ପ୍ରଭାବୀ ପ୍ରଦର୍ଶନକୁ ପାଥେୟ କରି ବ୍ଲାଷ୍ଟର୍ସ ଦୁଇଥର ଆଇଏସ୍ଏଲ୍ (୨୦୧୪ ଓ ୨୦୧୬) ଫାଇନାଲରେ ପ୍ରବେଶ କରି ପାରିଛି। ଚଣ୍ଡିଗଡ଼ରେ ଜନ୍ମିତ ୨୬ ବର୍ଷୀୟ ଝିଙ୍ଗାନ୍ ବ୍ଲାଷ୍ଟର୍ସ ଦଳର ସମର୍ଥକଙ୍କ ଜଣେ ଲୋକପ୍ରିୟ ଖେଳାଳି। କ୍ଲବ ତରଫରୁ ସେ ୭୬ ମ୍ୟାଚ୍ ଖେଳିଛନ୍ତିି। ଇଞ୍ଜୁରି ଯୋଗୁ କିନ୍ତୁ ସେ ୨୦୧୯-୨୦ ସିଜନରେ ସେ ଖେଳି ପାରି ନ ଥିଲେ। ଆଇଏସଏଲର ୧୦ଟି ଦଳ ମଧ୍ୟରେ ବ୍ଲାଷ୍ଟର୍ସ ୭ମ ସ୍ଥାନରେ ରହିଥିଲା। ଅନ୍ୟପକ୍ଷରେ ଆସନ୍ତା ସିଜନ ପାଇଁ କେରଳ ବ୍ଲାଷ୍ଟର୍ସ ମୋହନ ବାଗାନକୁ ଆଇ-ଲିଗ୍ ବିଜୟୀ କରିଥିବା କୋଚ୍ କିବୁ ଭିକୁନାଙ୍କୁ ନିଯୁକ୍ତି ଦେଇଛି।
