କେନ୍ଦୁଝର, ୨୮ା୫(ସ୍ବ.ପ୍ର.)-କରୋନା ଭୂତାଣୁ ସଂକ୍ରମଣ ରୋକିବା ପାଇଁ ବର୍ତ୍ତମାନ ଚତୁର୍ଥ ପର୍ଯ୍ୟାୟ ଲକ୍ଡାଉନ ଚାଲିଛି। କଟକଣା ଯୋଗୁ ଲୋକଙ୍କ ଜୀବନ ଜୀବିକା ପ୍ରଭାବିତ ହୋଇଛି। ସାଧାରଣ ଲୋକଙ୍କ ଜୀବନଶୈଳୀରେ ଅନେକ ପରିବର୍ତ୍ତନ ଦେଖାଦେଇଥିବା ବେଳେ ଅନେକ ପରିବାର ଜୀବିକା ହରାଇ ଘରେ ବସି ରହି ନିଜ ନିଜ ଭାଗ୍ୟକୁ ନିନ୍ଦୁଥିବାର ଦେଖିବାକୁ ମିଳୁଛି। ଏଭଳି ସଙ୍କଟ ସମୟରେ ଆଦିବାସୀ ବହୁଳ ଅଞ୍ଚଳରେ ବସବାସ କରୁଥିବା ଲୋକଙ୍କ ଜୀବନ ଦୁର୍ବିଷହ ହୋଇପଡିଛି। ବିଶେଷ କରି ବାଉଁଶରେ ବିଭିନ୍ନ ସାମଗ୍ରୀ ତିଆରି କରି ଚଳୁଥିବା କାରିଗରମାନେ ଏବେ ବେସାହାରା ହୋଇପଡିଛନ୍ତି।
ଆଦିବାସୀ ଅଧ୍ୟୁଷିତ କେନ୍ଦୁଝର ଜିଲାରେ ୩୦ ପ୍ରତିଶତରୁ ଅଧିକ ଲୋକ ଆଜି ବି ନିଜର କୌଳିକ ବୃତ୍ତି ଉପରେ ଭରସା କରି ଜୀବିକା ନିର୍ବାହ କରିଆସୁଛନ୍ତି। କିଏ ଜଙ୍ଗଲଜାତ ଦ୍ରବ୍ୟ ସଂଗ୍ରହ କରି ବଜାରରେ ବିକ୍ରି କରି ଚଳୁଛି ତ କିଏ ବାସନକୁସନ ବ୍ୟବସାୟ, କମାର କାମ ଭଳି କୌଳିକ ବୃତ୍ତିକୁ ଆଦରି ନେଇ ଗୁଜୁରାଣ ମେଣ୍ଟାଉଛି। ମାତ୍ର ଲକ୍ଡାଉନ କଟକଣା ଏସବୁ ପରିବାର ପାଇଁ ଅଭିଶାପ ସଦୃଶ ହୋଇଛି। ବାଉଁଶ କାମ କରି ପେଟ ପୋଷୁଥିବା ପରିବାର ଆର୍ଥିକ, ଶିକ୍ଷା, ସଚେତନତା ଆଦି କ୍ଷେତ୍ରରେ ସବୁଠୁ ନିମ୍ନସ୍ତରରେ ରହିଛନ୍ତି। ଲକ୍ଡାଉନ କଟକଣା ଚାପ ଭିତରେ ସେମାନେ ଏବେ ପେଷି ହୋଇଯାଇଛନ୍ତି। ବିଶେଷି କରି ଚାଷୀ ପରିବାର ଲୋକଙ୍କୁ ବାଉଁଶ କାରିଗରମାନେ କୁଲା, ପାଛିଆ, ଡାଲା ଭଳି ଅତ୍ୟାବଶ୍ୟକ ଜିନିଷ ଯୋଗାଇ ଆସୁଥିବା ବେଳେ ଆଜି ସେମାନେ ହାତ ବାନ୍ଧି ଘରେ ବସି ରହିବା ଛଡା ଆଉ କିଛି ବାଟ ନାହିଁ। ସରକାରୀ ସହାୟତା ସେମାନଙ୍କ ପାଇଁ ସମୁଦ୍ରକୁ ଶଙ୍ଖେ ହୋଇଛି। କରୋନା କଟକଣା ଭିତରେ ଓଳିଏ ଖାଇ ଓଳିଏ ଉପବାସ ରହିବାକୁ ପଡୁଛି। ସେମାନଙ୍କ ମଧ୍ୟରୁ ଅନେକ ପରିବାର ଆଜି ବି ସରକାରୀ ସହାୟତାରୁ ବଞ୍ଚିତ ରହିଛନ୍ତି। କରୋନା କଟକଣା ଭିତରେ ଗ୍ରସେରି, ଫଳ ଦୋକାନୀମାନେ ଯେନତେନ ପ୍ରକାରେ ଚଳିଯାଉଥିବା ବେଳେ ବାଉଁଶ କାରିଗର ଦାରିଦ୍ର୍ୟର କଷାଘାତରେ ଜୀବନ ବିତାଉଛନ୍ତି। ପ୍ରଶାସନ ତରଫରୁ ସହାୟତା ଯୋଗାଇ ଦେବାକୁ ସାଧାରଣରେ ଦାବି ହୋଇଛି।
