କଞ୍ଚାମାଲ ଅଭାବ, ସାମଗ୍ରୀ ଚାହିଦା କମୁଛି
8:18 amFebruary 26, 2020 / 21

ବ୍ରହ୍ମପୁର ଅଫିସ୍‌,୨୬ା୨-ବ୍ରହ୍ମପୁରର ମେଦିରୀ ସଂପ୍ରଦାୟକ ଲୋକେ ପୂର୍ବରୁ ବାଉଁଶରେ ବିଭିନ୍ନ ପ୍ରକରର ସାମଗ୍ରୀ ତିଆରି କରି ନିଜ ପରିବାର ପ୍ରତିପୋଷଣ କରୁଥିଲେ। ହେଲେ ବର୍ତ୍ତମାନ ସମୟରେ ପ୍ଲାଷ୍ଟିକ, ପଲିଥିନର ବ୍ୟବହାର ଯୋଗୁ ଏସବୁ ସାମଗ୍ରୀର ଚାହିଦା କମିବାରେ ଲାଗିଛି। ଯଦ୍ଦ୍ବାରା ଏହାକୁ କୌଳିକ ବୃତ୍ତି ଭାବେ ଧରି ନେଇଥିବା ଲୋକେ ଏଥିରୁ ଦୂରେଇ ଯିବାକୁ ବାଧ୍ୟ ହେଉଛନ୍ତି। ସହରର ଟାଟାବେଞ୍ଜ ଛକ, ଗିରିମାର୍କେଟ, ସୁବାରାଓ ଛକ, ଠାକୁରାଣୀ ମନ୍ଦିର ସାହି, ଏସ୍‌ଏନ୍‌ଟି ରୋଡ଼ ଆଦି ସ୍ଥାନରେ ବାଉଁଶ ପାତରେ ତିଆରି ବିଭିନ୍ନ ସାମଗ୍ରୀ, ଘରୋଇ ଉପକରଣ ଓ ସାଜସଜ୍ଜା ଲାଗି ଉଦ୍ଦିଷ୍ଟ ଜିନିଷସବୁ ଦେଖିବାକୁ ମିଳୁଛି। ଟୋକେଇ, କୁଣ୍ଡି, ଚାଙ୍ଗୁଡ଼ି, ଚାଉଳଧୁଆ ଡାଲା, ତାଟି ଆଦି ବିକ୍ରି କରାଯାଉଥିଲେ ମଧ୍ୟ ବଜାରରେ ପ୍ଲାଷ୍ଟିକରେ ଠିକ ଏଭଳି ଜିନିଷସବୁ କମ୍‌ ଦାମରେ ମିଳୁଥିବାରୁ ବାଉଁଶ ସାମଗ୍ରୀକୁ ଲୋକେ ଆଗ୍ରହ ଦେଖାଉନାହାନ୍ତି । କେବଳ ବାହାଘର ଓ ଅନ୍ୟାନ୍ୟ ମାଙ୍ଗଳିକ କାର୍ଯ୍ୟ ସମୟରେ ଅଳ୍ପ ମାତ୍ରାରେ ବ୍ୟବହାର ହେଉଥିବା ଦେଖିବାକୁ ମିଳୁଛି। ଅନ୍ୟପକ୍ଷରେ ଯଥେଷ୍ଟ ପରିମାଣର ବାଉଁଶ ଆଉ ମିଳୁନି। ଏସବୁ କାରଣରୁ କୌଳିକ ବୃତ୍ତିରୁ ଦୂରେଇ ଯିବାକୁ ପଡୁଛି ବୋଲି ବ୍ୟବସାୟୀମାନେ କହିଛନ୍ତି ।