ଟୋକିଓ, ୭।୪ (ପି.ଟି.)- କୋଭିଡ୍-୧୯ ସାରା ବିଶ୍ୱ ମହାମାରୀର ରୂପ ନେଇଥିବା ବେଳେ ଅଲିମ୍ପିକ୍ସ ଆୟୋଜକ ଦେଶ ଜାପାନ ଏକ ଗୁରୁତ୍ୱପୂର୍ଣ୍ଣ ନଷ୍ପତ୍ତି ନେଇଛି। ଜାପାନ ଅଲିମ୍ପିକ୍ସ ଜ୍ୟୋତି ପ୍ରଦର୍ଶନକୁ ଜାପାନ ବାତିଲ କରିଛି। ୨୦୨୦ ଟୋକିଓ ଅଲିମ୍ପିକ୍ସ ଗୋଟିଏ ବର୍ଷ ଘୁଞ୍ଚାଇ ଦିଆଯାଇଥିବା ବେଳେ ଜ୍ୟୋତି ପ୍ରଦର୍ଶନକୁ ବାତିଲ କରାଯିବ ବୋଲି ପୂର୍ବରୁ ଆଶା କରାଯାଉଥିଲା।
ଜାପାନର ଫୁକୁଶିମାର ଉତ୍ତରପୂର୍ବାଞ୍ଚଳରେ ଗତ ଗୋଟିଏ ସପ୍ତାହ ହେବ ସର୍ବସାଧାରଣଙ୍କ ପାଇଁ ଜ୍ୟୋତି ପ୍ରଦର୍ଶିତ ହୋଇ ଆସୁଥିଲା। ତେବେ ଦେଶରେ କରୋନା ଭାଇରସ ସଂକ୍ରମଣ ବଢି ଚାଲିଥିବାରୁ ଅଲିମ୍ପିକ୍ ଆୟୋଜକମାନେ ଏହାକୁ ବନ୍ଦ କରିବାକୁ ନିଷ୍ପତ୍ତି ନେଇଛନ୍ତି। ଗ୍ରୀସ୍ରେ ପ୍ରଜ୍ୱଳିତ ହୋଇଥିବା ଏହି ଜ୍ୟୋତି ମାର୍ଚ୍ଚ ୨୦ ତାରିଖରେ ଜାପାନରେ ପହଞ୍ଚିଥିଲା। ୬ ଦିନ ପରେ ଏହି ଟର୍ଚ୍ଚ ରିଲେ ଆରମ୍ଭ ହୋଇଥାନ୍ତା ଓ ଜୁଲାଇ ୨୪ରେ ଅଲିମ୍ପିକ୍ସ ଉଦ୍ଘାଟନୀ ଉତ୍ସବରେ ଏହି ରିଲେ ଶେଷ ହେବାର କାର୍ଯ୍ୟକ୍ରମ ଥିଲା। କରୋନା ଭାଇରସ କାରଣରୁ ଅଲିମ୍ପିକ୍ସ ଗୋଟିଏ ବର୍ଷ ଘୁଞ୍ଚିଛି। ତେଣୁ ଅଲିମ୍ପିକ୍ସର ଉଦ୍ଘାଟନୀ ଉତ୍ସବ ୨୦୨୧ ଜୁଲାଇ ୨୩ରେ ଆୟୋଜନ ହେବ।
ଅଲିମ୍ପିକ୍ସ ସ୍ପିରିଟ୍କୁ ବଞ୍ଚାଇ ରଖିବା ପାଇଁ ସ୍ଥାନୀୟ ଆୟୋଜକ ଏହି ଜ୍ୟୋତିକୁ ଫୁକୁଶିମାରେ ଏକ ଲଣ୍ଠନରେ ପ୍ରଦର୍ଶନ କରିବାକୁ ନିଷ୍ପତ୍ତି ନେଇଥିଲେ। ଫୁକୁଶିମାରୁ ଟର୍ଚ୍ଚ ରିଲେ ଆରମ୍ଭ ହେବାର କାର୍ଯ୍ୟକ୍ରମ ଥିଲା। ଏପ୍ରିଲ ଶେଷ ପର୍ଯ୍ୟନ୍ତ ଏହି ଜ୍ୟୋତିକୁ ପ୍ରଦର୍ଶନ କରିବା ଲକ୍ଷ୍ୟ ରଖିଥିଲୁ। ତେବେ ପରସ୍ଥିତିକୁ ଦୃଷ୍ଟିରେ ରଖି ଆମେ ଏହାକୁ ବନ୍ଦ କରିବାକୁ ନିଷ୍ପତ୍ତି ନେଇଛୁ ବୋଲି ଟୋକିଓ ୨୦୨୦ ଆୟୋଜକ କମିଟି ମୁଖପାତ୍ର କହିଛନ୍ତି। ତେବେ ଲୋକେ ଏକତ୍ରିତ ହେବାର ସମ୍ଭାବନା ଥିବାରୁ ସେ ଏହି ଜ୍ୟୋତିକୁ କେଉଁଠାରେ ରଖାଯିବ ସେନେଇ ସେ କିଛି କହିନାହାନ୍ତି। କରୋନା ଭାଇରସ ସଂକ୍ରମଣ କାରଣରୁ ଅଲିମ୍ପିକ୍ ଜ୍ୟୋତିର ଯାତ୍ରାରେ ସବୁ ପ୍ରକାର ସମସ୍ୟା ଦେଖା ଦେଇଥିଲା। ଲୋକେ ଏକତ୍ରିତ ହେବାର ଆଶଙ୍କା ଦୃଷ୍ଟିରେ ରଖି ଗ୍ରୀକ୍ରୁ ଜାପାନ ଆସିବା ପର୍ଯ୍ୟନ୍ତ ଅଲିମ୍ପିକ ଜ୍ୟୋତିର ଯାତ୍ରା ବେଶ୍ ନିରାଡମ୍ବର ଥିଲା।
