ଲୋଇସିଂହା, ୯।୧୨(ଡି.ଏନ.ଏ.)- ଆଦିବାସୀ ଛାତ୍ରୀଛାତ୍ରକଁର ଶିକ୍ଷାର ବିକାଶ ଲାଗି ସରକାର ଖାସ୍ ପଦକ୍ଷେପ ନେଉଥିବାର କହୁଛନ୍। ହେଲେ ବଲାଙ୍ଗୀର ଜିଲା ଲୋଇସିଂହା ବ୍ଲକ ଦୁମଦୁମିରେ ଥିବାର ଆଦିବାସୀ ସେବାଶ୍ରମ ସ୍କୁଲର ଶିକ୍ଷକ ଥିତିକେ ଦେଖ୍ଲେ ସରକାରକଁର ଦରଦ୍ ଫଟିକ୍ ବୁଝାପଡ଼ୁଛେ। ସ୍କୁଲରେ ଶିକ୍ଷକ ଅଭାବୁ ଅନେକ ସମିଆରେ ଛାତ୍ରୀଛାତ୍ର ବାହାରେ ବୁଲୁଥିବାର ନଜରକେ ଆସୁଛେ। ସ୍କୁଲର ଏନ୍ତା ଅବେବସ୍ତାକେ ନେଇ ସାଧାରନରେ ଅସନ୍ତୋଷ ଦେଖାଦେଇଛେ।
ସୂଚନା ହିସାବେ କୁଟେନପାଲି ପଁଚେତ୍ ଅଧୀନ ଦୁମଦୁମି ଗଁାରେ ରହିଛେ ସରକାରକଁର ଆଦିବାସୀ ଓ ହରିଜନ କଲ୍ୟାଣ ବିଭାଗ ସେବାଶ୍ରମ ବିଦ୍ୟାଲୟ। ଏହେଦେ ସ୍କୁଲ ଛାତ୍ରାବାସରେ ରହି ୧ମରୁ ୧୦ମ ଶ୍ରେଣୀ ତକ୍ ୨୬୮ ଛାତ୍ରୀଛାତ୍ର ପାଠ୍ ପଢ଼ୁଛନ୍। ୧ମରୁ ୫ମ ଶ୍ରେଣୀରେ ୧୧୬ ଆର ୬ଷ୍ଠରୁ ୮ମ ଶ୍ରେଣୀ ତକ୍ ୧୫୨ ଛାତ୍ରୀଛାତ୍ର ରହିଛନ୍। ସ୍କୁଲରେ ଶିକ୍ଷାଦାନ ଲାଗି ପ୍ରଧାନଶିକ୍ଷକକଁର ସମେତ ୯ ଝନ୍ ଶିକ୍ଷୟିତ୍ରୀ ଶିକ୍ଷକକଁର ଦରକାର ଥିଲାବେଲେ ରହିଛନ୍ କୁଲ ୪ ଝନ୍ ଶିକ୍ଷକ। ଛାତ୍ରୀଛାତ୍ରକଁର ଲାଗି ବେଲାର ରଁଧାଖଁଜା, ସ୍କୁଲ ଗାଜପତର ଆର ଉନିଆ କାମ୍ଧଁଦା ଲାଗି ପ୍ରଧାନଶିକ୍ଷକ ପାଠ୍ପଢ଼ାବାର ଲାଗି ସମିଆ ନାଇଁ ପାଏବାର। ବାକି ୩ ଝନ୍ ଶିକ୍ଷକ ଆର ଝନେ ସ୍ବେଚ୍ଛାସେବୀ ଶିକ୍ଷୟିତ୍ରୀ ୧ମରୁ ୮ମ ତକ୍ ପାଠ୍ପଢ଼ା ବୁଝୁଛନ୍। ଗଲା ନଭେମ୍ବର ମାସୁ ଝନେ ଶିକ୍ଷୟିତ୍ରୀ ପ୍ରସୂତିକାଲିନ ଛୁଟିରେ ରହିଛନ୍। ଏନ୍ତାଥି ୩ ଝନ୍ ଶିକ୍ଷକ ପାଠ୍ ପଢ଼ଉଥିଲାବେଲେ ବାକି ଶ୍ରେଣୀମାନେ ଖାଲି ପଡ଼ୁଛେ। ସ୍କୁଲ ପରିସରରେ ହାଟବଜାର ବସ୍ଲା ଲେଖେଁ ପିଲାକର ରଡାକିର୍ଲା ଶୁଭୁଛେ। ବଡ଼ଭାଗି ସମିଆ ପିଲାମାନେ ସ୍କୁଲ ବାହାରେ ବୁଲୁଥିବାର ଦେଖ୍ବାକେ ମିଲୁଛେ। ଗଲା ଶନିବାର ଦିନର ୧୧ ବଜେ ପ୍ରଧାନଶିକ୍ଷକ ନୃସିଂହଚରଣ ପ୍ରଧାନୀ ବେଲାର ରଁଧାଖଁଜା ଲାଗି ବାହାରୁ ଅଣ୍ଡା ଧରି ଆସୁଥିଲାବେଲେ ବାକି ଶିକ୍ଷକମାନେ ନିଜର ନିଜର ଶ୍ରେଣୀରେ ଛୁଆକୁ ପାଠ୍ ପଢ଼ଉଥିଲେ। ଖାଲିପଡ଼ିଥିବାର ଶ୍ରେଣୀର ଛାତ୍ରମାନେ ସ୍କୁଲ ପାସେ ତିଆର ହେଉଥିବାର ହଷ୍ଟେଲ ଜାଗାରେ ଆର କେତେ ଛାତ୍ରୀ ସ୍କୁଲ ପରିସରରେ ଥିବାର ନଲ୍ଚୁଅଁାରେ ଖେଲୁଥିବାର ଦେଖ୍ବାକେ ମିଲିଥିଲା। ଇତାର ପରେ ସ୍କୁଲକେ ଯାଇ ଇ ଘଟନା ବାବ୍ଦେ ପ୍ରଧାନଶିକ୍ଷକକୁଁ କହେଲାରୁ ଶିକ୍ଷକ ଅଭାବୁ ଇ ସବୁ ସମସିଆ ହେଉଛେ ବଲି ମନ୍ଦୁଖ କରି ସେ କହିଥିଲେ। ଫିମାସ ଜିଲାସ୍ତରୀୟ ବଇଠକ୍ରେ ଶିକ୍ଷକ ସମସିଆକେ ନେଇ ବିଭାଗୀୟ ଅଧ୍କାରୀ ଆର ଜିଲା ପରଶାସନକେ ଜନେଇ ଆସୁଛୁଁ। ହେଲେ ଇ ସମସିଆ ଉପରେ ପରଶାସନ ଦୁରୁଷ୍ଟି ନାଇଁ ଦେବାର ଲାଗି ଏନ୍ତା ଅସ୍ବିଧା ଦେଖାଦେଉଛେ ବଲି ସେ କହିଥିଲେ। ସ୍କୁଲ ସମସିଆ ଉପରେ ଜିଲାପାଳ ଦୁରୁଷ୍ଟି ଦେଇ ପଦକ୍ଷେପ ନେବାକେ ଆଦିବାସୀ ସଂଘ ଦାବି କରିଛେ।
