କେନ୍ଦୁଝର, ୨୧।୪(ସ୍ବ.ପ୍ର.)-ସୋମବାର ଠାରୁ ଅଫିସ ଖୋଲିଲା। ଘରେ ଥିବା ଅଧିକାରୀ ଓ କର୍ମଚାରୀ ମାନେ କାର୍ଯ୍ୟରେ ଯୋଗ ଦେଇଛନ୍ତି। ତେବେ ଲୁଚାଛପା ବା ଜରୁରୀ କାମରେ ଜିଲା ବାହାରକୁ ଯାଇଥିବା କେତେକ କର୍ମଚାରୀ ରାତାରାତି ଫେରି ଆସି କାମରେ ଯୋଗ ଦେଇଛନ୍ତି। କରୋନା ପଜିଟିଭ ବାହାରି ଥିବା ଜିଲାରୁ ଅନେକ କର୍ମଚାରୀ ଆସିଥିଲେ ହେଁ କ୍ୱାରାଣ୍ଟାଇନ ନ ରହି ଅଫିସ ଯାଇ କାମ କରୁଥିବା ଚର୍ଚ୍ଚା ହେଉଛି। ହେଡ କ୍ୱାର୍ଟରରେ ନ ରହି ଘରକୁ ବା ଅନ୍ୟ କାମରେ ଜିଲା ବାହାରକୁ ପଳାଇ ଯାଇଥିବାରୁ ଭୟରେ ସ୍ବତଃ ପ୍ରବୃତ୍ତ ଭାବେ ଘୋଷଣା କରୁ ନ ଥିବା ଅଭିଯୋଗ ହେଉଛି। ଫଳରେ କରୋନା ଭୂତାଣୁ ସଂକ୍ରମଣ ଭୟ ରହୁଛି। ସାଧାରଣ ଲୋକଙ୍କ କ୍ଷେତ୍ରରେ ଆଇନକୁ କଡ଼ାକଡ଼ି ଲାଗୁ କରାଯାଇ ଏକାନ୍ତବାସରେ ରହିବାକୁ କୁହାଯାଉଥିବା ବେଳେ ସରକାରୀ କର୍ମଚାରୀଙ୍କ କ୍ଷେତ୍ରରେ କାର୍ଯ୍ୟକାରୀ କରାଯାଉନାହିଁ କାହିଁକି ବୋଲି ସାଧାରଣରେ ପ୍ରଶ୍ନବାଚୀ ସୃଷ୍ଟି କରିଛି। ଏନେଇ ଜିଲାପାଳ ପଦକ୍ଷେପ ନେବାସହ ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି ହେଉଛି। ବାହାର ଜିଲା ବା ରାଜ୍ୟରୁ ଆସୁଥିବା ଲୋକ ସ୍ବତଃପ୍ରବୃତ୍ତ ଭାବରେ ପ୍ରଶାସନଙ୍କୁ ଜଣାଇ ୧୪ ଦିନର ଏକାନ୍ତବାସରେ ରହିବାକୁ ପଡ଼ିବ ବୋଲି ଅତିରିକ୍ତ ଜିଲାପାଳ ସନ୍ତୋଷ ନାୟକ କହିଛନ୍ତି।
