ଇନ୍ଦୋର,୯ା୧୨(ପି.ଟି.): ଗତ ୫ ବର୍ଷ ମଧ୍ୟରେ ଦେଶର ୧୦ଟି ପ୍ରମୁଖ ଶିକ୍ଷାନୁଷ୍ଠାନ ଭାରତୀୟ ପ୍ରାଦ୍ୟୋଗିକୀ ସଂସ୍ଥାନ (ଆଇଆଇଟି)ରେ ୨୭ ଛାତ୍ରୀଛାତ୍ର ଆତ୍ମହତ୍ୟା କରିଥିବା ସୂଚନା ଅଧିକାର ଆଇନ (ଆର୍ଟିଆଇ) ଆବେଦନରୁ ଜଣାପଡିଛି। ମାନବ ସମ୍ବଳ ବିକାଶ ମନ୍ତ୍ରଣାଳୟ ଅଧୀନରେ ଥିବା ଉଚ୍ଚଶିକ୍ଷା ବିଭାଗ ପକ୍ଷରୁ ପ୍ରଦତ୍ତ ଏହି ତଥ୍ୟ ଅନୁଯାୟୀ ୨୦୧୪ରୁ ୨୦୧୯ ମଧ୍ୟରେ ଆଇଆଇଟି ମାଡ୍ରାସରେ ସର୍ବାଧିକ ୭ ଛାତ୍ରୀଛାତ୍ର ଆତ୍ମହତ୍ୟା କରିଛନ୍ତି। ଆଇଆଇଟି ଖଡଗପୁରରେ ୫, ଆଇଆଇଟି ଦିଲ୍ଲୀ ଏବଂ ଆଇଆଇଟି ହାଇଦ୍ରାବାଦରେ ୩ ଜଣ ଲେଖାଏ ଆତ୍ମହତ୍ୟା କରିଥିବା ଉକ୍ତ ତଥ୍ୟରୁ ଜଣାପଡିଛି। ବମ୍ବେ, ଗୁଆହାଟୀ ଓ ରୂଡ୍କୀ ଆଇଆଇଟିରେ ୨ ଜଣ ଲେଖାଏ ଆତ୍ମହତ୍ୟା କରିଥିବାବେଳେ ବାରାଣସୀ, ଧାନବାଦ ଏବଂ କାନପୁର ଆଇଆଇଟିରେ ଜଣେ ଲେଖାଏ ଏଭଳି ଚରମ ପଦକ୍ଷେପ ନେଇଛନ୍ତି। ତେବେ ଆଇଆଇଟି ଛାତ୍ରୀଛାତ୍ର ଆତ୍ମହତ୍ୟା କରିବା କାରଣ ସମ୍ପର୍କରେ ଆବେଦନକାରୀ ଚନ୍ଦ୍ରଶେଖର ଗୌର ଜାଣିବାକୁ ଚାହିଁଥିଲେ ହେଁ ଏନେଇ ଉଚ୍ଚଶିକ୍ଷା ବିଭାଗ କୌଣସି ଉତ୍ତର ଦେଇନାହିଁ।
