ପ୍ୟାରିସ୍,୪।୫(ପି.ଟି.): ୨୦୨୧ ଗ୍ରୀଷ୍ମରେ ଜାପାନରେ ଆୟୋଜନ ହେବାକୁ ଥିବା ସନ୍ତରଣ ବିଶ୍ୱ ଚାମ୍ପିୟନଶିପ୍କୁ ଘୁଞ୍ଚାଇ ଦିଆଯାଇଛି। ୨୦୨୨ ମେ ପର୍ଯ୍ୟନ୍ତ ଏହି ମେଗା ଇଭେଣ୍ଟକୁ ସ୍ଥଗିତ ରଖାଯାଇଛି। ଟୋକିଓ ଅଲିମ୍ପିକ୍ସକୁ ଘୁଞ୍ଚାଇ ଦିଆଯିବା ପରେ ଏହି ନିଷ୍ପତ୍ତି ନିଆଯାଇଛି ବୋଲି ସନ୍ତରଣର ସର୍ବୋଚ୍ଚ ପ୍ରଶାସନିକ ସଂସ୍ଥା ଅନ୍ତର୍ଜାତୀୟ ସୁଇମିଂ ଫେଡେରେଶନ (ଫିନା) ସୋମବାର କହିଛି।
ବିଶ୍ୱ ସନ୍ତରଣ ଚାମ୍ପିୟନଶିପ୍ ଆସନ୍ତାବର୍ଷ ଫୁକୁଓକାରେ ଜୁଲାଇ ୧୬ରୁ ଅଗଷ୍ଟ ୧ ତାରିଖ ମଧ୍ୟରେ ଆୟୋଜନ ହେବାର କାର୍ଯ୍ୟକ୍ରମ ଥିଲା। ତେବେ ଏହା ଏବେ ୨୦୨୨ ମେ ୧୩ରୁ ୨୯ ତାରିଖର ମଧ୍ୟରେ ଆୟୋଜନ ହେବା ବୋଲି ଫିନା ତରଫରୁ କୁହାଯାଇଛି। ଉଲ୍ଲେଖଥାଉ କି, କରୋନା ଭାଇରସ ମହାମାରୀ କାରଣରୁ ୨୦୨୦ ଅଲିମ୍ପିକ୍ସକୁ ଗୋଟିଏ ବର୍ଷ ଘୁଞ୍ଚାଇ ଦିଆଯାଇଛି। ଏହି ମେଗା ଇଭେଣ୍ଟ ୨୦୨୧ ଜୁଲାଇ ୨୩ରୁ ଅଗଷ୍ଟ ୮ ତାରିଖ ମଧ୍ୟରେ ଆୟୋଜନ ହେବ। ବିଭିନ୍ନ ଦୃଷ୍ଟିକୋଣରୁ ସାମ୍ପ୍ରତିକ ପରିସ୍ଥିତିକୁ ବିଚାର କରି ଓ କ୍ରୀଡ଼ା ସହିତ ଜଡିତ ବିଭିନ୍ନ ଅନୁଷ୍ଠାନ ସହିତ ଆଲୋଚନା କରିବା ପରେ ସନ୍ତରଣ ଚାମ୍ପିୟନଶିପ୍କୁ ଘୁଞ୍ଚାଇବାକୁ ନିଷ୍ପତ୍ତି ନେଇଛୁ ବୋଲି ଫିନା କହିଛି। ବିଶ୍ୱ ସନ୍ତରଣ ଚାମ୍ପିୟନଶିପ୍ରେ ଡାଇଭିଂ, ଓପନ୍ ଓ୍ବାଟର ସୁଇମିଂ, ସିନ୍କ୍ରୋନାଇଜ୍ ସୁଇମିଂ ଓ ଓ୍ବାଟର ପୋଲୋ ଭଳି ପ୍ରତିଯୋଗିତା ସାମିଲ ରହିଛି।
