ଅନୁଗୋଳ ଅଫିସ, ୨୨।୧ – ଦୀର୍ଘ ୧୨ ବର୍ଷ ହେଲା ଜବରଦଖଲରେ ଥିବା ଦୋକାନ ଘରକୁ ମଙ୍ଗଳବାର ଅନୁଗୋଳ ପୌରପାଳିକା ନିଜ କବ୍ଜାକୁ ନେଇଛି। ମାଜିଷ୍ଟ୍ରେଟ ଭାବେ ଅନୁଗୋଳ ଅତିରିକ୍ତ ତହସିଲଦାର, ପୋଲିସ, ପୌର ନିର୍ବାହୀ ଅଧିକାରୀ ଓ ପୌର କର୍ମଚାରୀଙ୍କ ଉପସ୍ଥିତିରେ ଉକ୍ତ ଦୋକାନ ଘରକୁ ଜଉମୁଦା ଦିଆଯାଇ ସିଲ୍ କରାଯାଇଥିବା ନିର୍ବାହୀ ଅଧିକାରୀ ବିନୋଦଚନ୍ଦ୍ର ପଣ୍ଡା ସୂଚନା ଦେଇଛନ୍ତି।
ସୂଚନାଯୋଗ୍ୟ ଯେ, ଅନୁଗୋଳ ପୌରପାଳିକା ପକ୍ଷରୁ ୧୯୯୩ରେ ବସ୍ଷ୍ଟାଣ୍ଡ ଭିତରେ କଦମ୍ ପଡ଼ିଆକୁ ଲାଗିଥିବା ୩୩ ଗୃହ ବିଶିଷ୍ଟ ଏକ ମାର୍କେଟ କମ୍ପଲେକ୍ସ ନିର୍ମାଣ କରାଯାଇଥିଲା। ଏହି ମାର୍କେଟ କମ୍ପଲେକ୍ସ ନିର୍ମାଣ ହେବା ପରେ ସମସ୍ୟା ଉପୁଜିବାରୁ ମାମଲା କୋର୍ଟକୁ ଯାଇଥିଲା। ୨୦୦୮ରେ ଏହି ଦୋକାନ ଘରଗୁଡ଼ିକୁ ଆବଣ୍ଟନ କରାଯାଇଥିଲା। ତେବେ ସେଥିରୁ ଗୋଟିଏ ଗୃହକୁ ବସ୍ଷ୍ଟାଣ୍ଡ ୱେଲଫେୟାର କମିଟିକୁ ପ୍ରଦାନ ପାଇଁ ପୌରପରିଷଦ ବୈଠକରେ ନିଷ୍ପତ୍ତି ହୋଇଥିବାବେଳେ ଦୁଇଟି ଗୃହରେ ବସ୍ଷ୍ଟାଣ୍ଡ ଫାଣ୍ଡି ଥିଲା। ତେବେ ଗୋଟିଏ ଗୃହକୁ ବିକାଶ ନାୟକ ଜବରଦସ୍ତି ମାଡ଼ି ବସି ବ୍ୟବସାୟ କରୁଥିଲେ। ଗତବର୍ଷ ନଭେମ୍ବରରେ ପୌର କର୍ତ୍ତୃପକ୍ଷ ସମ୍ପୃକ୍ତ ଦୋକାନୀଙ୍କୁ ନୋଟିସ୍ ଜାରି କରିଥିଲେ। କିନ୍ତୁ ଦୋକାନ ଘର ନ ଛାଡ଼ିବାରୁ ମଙ୍ଗଳବାର ଜିଲାପାଳଙ୍କ ନିର୍ଦ୍ଦେଶକ୍ରମେ ଅନୁଗୋଳ ଅତିରିକ୍ତ ତହସିଲଦାର ପ୍ରଶାନ୍ତ ସିଂହ ସହ ନିର୍ବାହୀ ଅଧିକାରୀ ବିନୋଦ ଚନ୍ଦ୍ର ପଣ୍ଡା ଓ ପୋଲିସ ଦୋକାନ ଘରକୁ ବ୍ୟବସାୟୀଙ୍କ ଜବରଦଖଲରୁ ମୁକୁଳାଇଛନ୍ତି। ଏଥିସହ ପୌର କାର୍ଯ୍ୟାଳୟ କର୍ମଚାରୀ ଉକ୍ତ ଦୋକାନ ଘରେ ତାଲା ପକାଇଛନ୍ତି। ପରେ ଏହି ଦୋକାନ ଘରକୁ ଲଟେରି ମାଧ୍ୟମରେ ଆବଣ୍ଟନ କରାଯିବ ବୋଲି ନିର୍ବାହୀ ଅଧିକାରୀ ପଣ୍ଡା ସୂଚନା ଦେଇଛନ୍ତି।
