ହିନ୍ଦୋଳ ରଥଯାତ୍ରା ପାଇଁ ପ୍ରସ୍ତୁତି ବୈଠକ: ସରକାରୀ ଅନୁଦାନ ସମୁଦ୍ରକୁ ଶଙ୍ଖେ
8:04 amJune 5, 2019June 11, 2020 / 21

ହିନ୍ଦୋଳ, ୫।୬(ଡି.ଏନ.ଏ.) – ହିନ୍ଦୋଳର ଐତିହାସିକ ରଥଯାତ୍ରାକୁ ଶାନ୍ତିଶୃଙ୍ଖଳାର ସହ ସମ୍ପନ୍ନ କରିବାକୁ ଉପଜିଲାପାଳଙ୍କ କାର୍ଯ୍ୟାଳୟ ପରିସରରେ ମଙ୍ଗଳବାର ପ୍ରସ୍ତୁତି ବୈଠକ ଅନୁଷ୍ଠିତ ହୋଇଯାଇଛି। ଖର୍ଚ୍ଚ ତୁଳନାରେ ସରକାରୀ ସୂତ୍ରରେ ମିଳୁଥିବା ଅନୁଦାନ ‘ସମୁଦ୍ରକୁ ଶଙ୍ଖେ’ ପରି ହେଉଛି। ଏ ନେଇ ଉଦ୍‌ବେଗ ପ୍ରକାଶ ପାଇଥିଲା।
କମିଟି ଅଧ୍ୟକ୍ଷ ତଥା ଉପଜିଲାପାଳ ଭବେଶ କୁମାର ନାୟକଙ୍କ ଅଧ୍ୟକ୍ଷତାରେ ଆୟୋଜିତ ବୈଠକରେ ପୂର୍ବବର୍ଷର ଆୟବ୍ୟୟର ସମୀକ୍ଷା କରାଯାଇଥିଲା। ସ୍ନାନ ପୂର୍ଣ୍ଣିମାଠାରୁ ବାହୁଡ଼ା ଯାତ୍ରା ପର୍ଯ୍ୟନ୍ତ ଶ୍ରୀଜୀଉଙ୍କ ନୀତିକାନ୍ତି କିଭଳି ଶୃଙ୍ଖଳିତ ହୋଇପାରିବ ସେ ନେଇ ବିସ୍ତୃତ ଆଲୋଚନା କରାଯାଇଛି।
ଦରଦାମ ବୃଦ୍ଧି ଯୋଗୁ ରଥଯାତ୍ରା ଖର୍ଚ୍ଚ ୨ଲକ୍ଷ ଟପିଲାଣି। ହେଲେ ସରକାରୀ ଅନୁଦାନ ମାତ୍ର ୫୦ ହଜାର ଟଙ୍କା ମିଳୁଛି। ରଥଯାତ୍ରାକୁ ବିଧିବ୍ୟବସ୍ଥିତ କରିବାକୁ ଅର୍ଥରାଶି ବଢ଼ାଇବା ଜରୁରୀ ହୋଇପଡ଼ିଛି। ଏହାକୁ ସରକାର ହେୟଜ୍ଞାନ କରୁଛନ୍ତି। ଏ ନେଇ ବରିଷ୍ଠ ନାଗରିକ, ବୁଦ୍ଧିଜୀବୀମାନେ କ୍ଷୋଭ ବ୍ୟକ୍ତ କରିଥିଲେ। ହିନ୍ଦୋଳ ରଥଯାତ୍ରାର ସ୍ବତନ୍ତ୍ର ପରିଚୟ ରହିଛି। ଏହାକୁ ଅଧିକ ଆକର୍ଷଣୀୟ କରିବାକୁ ଅଞ୍ଚଳବାସୀ, ସରକାରୀ ପଦାଧିକାରୀ, ସାମାଜିକ ଅନୁଷ୍ଠାନ, ବ୍ୟବସାୟୀମାନେ ସହାୟତାର ହାତ ବଢ଼ାଇବାକୁ ନିବେଦନ କରାଯାଇଛି। ବୈଠକରେ ଏନଏସି ଅଧ୍ୟକ୍ଷା ରୀନା ବେହେରା, ତହସିଲଦାର ଅଜୟ ମଲ୍ଲିକଙ୍କ ସମେତ ସମସ୍ତ ବିଭାଗର ଅଧିକାରୀ, ବଜାର କମିଟି ସଦସ୍ୟ ଉପସ୍ଥିତ ଥିଲେ।