ମୁନିଗୁଡ଼ା,୩।୧(ଡି.ଏନ୍.ଏ.) – ରାୟଗଡ଼ା ଜିଲା ମୁନିଗୁଡ଼ାର ଗୁପ୍ତା କଲୋନୀରେ ଜଣେ ଯୁବକଙ୍କୁ ତାଙ୍କ ସ୍ତ୍ରୀ ନୂଆବର୍ଷରେ ହତ୍ୟା କରିବା ଭଳି ଅଭାବନୀୟ ଘଟଣା ଘଟିଛି। ମୃତକ ହେଲେ ଯୁବରାଜ ଚଣ୍ଡୀ (୩୦)। ସ୍ବାମୀଙ୍କ ମାନସିକ ଓ ଶାରୀରିକ ନିର୍ଯାତନା ସହି ନ ପାରି ତାଙ୍କୁ ହତ୍ୟା କରିଥିବା ପୋଲିସ ଆଗରେ ସ୍ବୀକାର କରିଛନ୍ତି ଅଭିଯୁକ୍ତ ସ୍ତ୍ରୀ।
ସୂଚନା ଅନୁଯାୟୀ, ଯୁବରାଜ ମୁନିଗୁଡ଼ା ବ୍ଲକ କାର୍ଯ୍ୟାଳୟରେ ଭଡ଼ାସୂତ୍ରରେ ବୋଲେରୋ ଗାଡ଼ି ଲଗାଇ ସେଇଥିରେ ହିଁ ଡ୍ରାଇଭର ଥିଲେ। ତହସିଲ ଅଫିସରେ କିରାଣି ଥିବା ମହିଳାଙ୍କୁ ସେ ବିବାହ କରିଥିଲେ। ଉଭୟଙ୍କର ଗୋଟିଏ ପୁଅ ଓ ଝିଅ ରହିଛି। ତେବେ ଉଭୟଙ୍କ ମଧ୍ୟରେ ଅଧିକାଂଶ ସମୟ ଝଗଡ଼ା ହେଉଥିଲା ା ଯୁବରାଜ ଭୋଜି ଖାଇ ମଙ୍ଗଳବାର ବିଳମ୍ବିତ ରାତିରେ ଘରକୁ ଫେରିବା ପରେ ସ୍ତ୍ରୀଙ୍କ ସହ ପାଟିତୁଣ୍ଡ ହୋଇଥିଲା। କିନ୍ତୁ ବୁଧବାର ଅପରାହ୍ନରେ ଯୁବରାଜ ନିଖୋଜ ଥିବା ନେଇ ଏତଲା ଦେବା ପାଇଁ ତାଙ୍କ ସ୍ତ୍ରୀ ମୁନିଗୁଡ଼ା ଥାନାକୁ ଯାଇଥିଲେ। ଅନ୍ୟପକ୍ଷରେ ଯୁବରାଜଙ୍କ ମୃତଦେହକୁ ଗଜପତି ଜିଲା ଅଡ଼ବା ପୋଲିସ ଉଦ୍ଧାର କରିଥିବା ସୂଚନା ପୂର୍ବରୁ ମୁନିଗୁଡ଼ା ଥାନାରେ ପହଞ୍ଚତ୍ଥିଲା। ତେଣୁ ପୋଲିସ ସନ୍ଦେହରେ ଯୁବରାଜଙ୍କ ସ୍ତ୍ରୀଙ୍କୁ ଅଟକ ରଖି ପଚରାଉଚରା କରିବା ବେଳେ ସତ ବାହାରିଥିଲା। ସ୍ବାମୀଙ୍କ ମାନସିକ ଓ ଶାରୀରିକ ନିର୍ଯାତନା ସହି ନ ପାରି ତାଙ୍କୁ ହତ୍ୟା କରିଥିବା ପୋଲିସ ଆଗରେ ସ୍ବୀକାର କରିଥିଲେ ଯୁବରାଜଙ୍କ ସ୍ତ୍ରୀ। ତେବେ ଏହି ହତ୍ୟାରେ ଅନ୍ୟ କେହି ସମ୍ପୃକ୍ତ ଅଛନ୍ତି କି ନା, ତାହାର ଖୋଳତାଡ଼ ଚାଲିଛି। ଅଡ଼ବା ଥାନାରେ ମାମଲା ରୁଜୁ ହୋଇଥିବାରୁ ଅଭିଯୁକ୍ତ ସ୍ତ୍ରୀଙ୍କୁ ସେଠାକାର ପୋଲିସକୁ ହସ୍ତାନ୍ତର କରାଯିବ ବୋଲି ମୁନିଗୁଡ଼ା ଏସ୍ଡିପିଓ ଚନ୍ଦ୍ରଶେଖର ହୋତା ଓ ଆଇଆଇସି ରାଜେନ୍ଦ୍ର ଦେହୁରୀ ସୂଚନା ଦେଇଛନ୍ତି।
