ଭୁବନେଶ୍ୱର,୨୧ା୩(ବ୍ୟୁରୋ): କରୋନାକୁ ନେଇ ଏବେ ସବୁଠି ଆତଙ୍କର ବାତାବରଣ। ସଂକ୍ରମଣ ଏଡ଼ାଇବା ପାଇଁ ସରକାର ଓ ବିଭିନ୍ନ ବିଭାଗ ଆଡଭଇଜରି ଜାରି କରି କଟକଣା ଲଗାଇଥିବାବେଳେ ଭୁବନେଶ୍ୱର ମହାନଗର ନିଗମ ସମସ୍ତ ମଲ୍କୁ ଆସନ୍ତା ୩୧ ତାରିଖ ପର୍ଯ୍ୟନ୍ତ ବନ୍ଦ ନିର୍ଦ୍ଦେଶ ଦେଇଛନ୍ତି। ମଲ୍ରେ ଥିବା ଗ୍ରୋସରୀ ସାମଗ୍ରୀ କାରବାର ପାଇଁ କେବଳ ଅନୁମତି ଦିଆଯାଇଛି। ସେହିଭଳି କମିଶନରେଟ ପୋଲିସ ପକ୍ଷରୁ କଟକଣା ରହିଛି। ହେଲେ ଭୁବନେଶ୍ୱରର ରସୁଲଗଡ଼ ଓ ନୟାପଲ୍ଲୀଠାରେ ଥିବା ବିଶାଲ ମେଗା ମାର୍ଟ ନିର୍ଦ୍ଦେଶକୁ ଖୋଲାଖୋଲି ଉଲ୍ଲଂଘନ କରିଥିବା ଗୁରୁବାର ଦେଖିବାକୁ ମିଳିଥିଲା। ଗ୍ରୋସରୀ ବିକିବା ଆଳରେ ଅନ୍ୟ ବେପାର କରୁଥିଲା। ସେହିଭଳି କର୍ତ୍ତୃପକ୍ଷ ଅନ୍ୟ କେତେକ ଗାଇଡ୍ଲାଇନକୁ ମଧ୍ୟ ପାଳନ କରୁ ନ ଥିବା ଦେଖିବାକୁ ମିଳିଥିଲା। ସେଠାରେ ପ୍ରବଳ ଗହଳି ହେବା ସହ ସଂକ୍ରମଣ ଆଶଙ୍କା ରହିଥିଲେ ମଧ୍ୟ କର୍ତ୍ତୃପକ୍ଷ ଏହାକୁ ଗୁରୁତ୍ୱ ଦେଇ ନ ଥିଲେ। ଏ ସଂକ୍ରାନ୍ତରେ ‘ଧରିତ୍ରୀ’ରେ ଫଟୋ ସହ ତଥ୍ୟ ଭିତ୍ତିକ ଖବର ଶୁକ୍ରବାର ପ୍ରକାଶ ପାଇବା ପରେ କାର୍ଯ୍ୟାନୁଷ୍ଠାନ ହୋଇଛି। ବିଏମସି ଉତ୍ତର ଜୋନ୍ର ଜୋନାଲ ଡେପୁଟି କମିଶନର ପ୍ରମୋଦ କୁମାର ପୃଷ୍ଟି ଟିମ୍ ସହ ରସୁଲଗଡ଼ସ୍ଥିତ ବିଶାଲ ମେଗା ମାର୍ଟରେ ପହଞ୍ଚତ୍ ଘଟଣାର ସତ୍ୟାସତ୍ୟ ଯାଞ୍ଚ କରିଥିଲେ। ବିଏମସି ଓ କମିଶନରେଟ ପୋଲିସର ଗାଇଡ୍ଲାଇନକୁ ମଲ୍ କର୍ତ୍ତୃପକ୍ଷ ଉଲ୍ଲଂଘନ କରୁଥିବା ପ୍ରମାଣ ପାଇଥିଲେ। ସେହିଭଳି ହୋଲ୍ଡିଂ ଟିକସ ଖିଲାପ ହୋଇଥିବା ଜଣାପଡିଥିଲା। ଏହାପରେ ଉକ୍ତ ମଲ୍କୁ ସିଲ କରାଯାଇଛି। ପରବର୍ତ୍ତୀ ନିର୍ଦ୍ଦେଶ ପର୍ଯ୍ୟନ୍ତ ମଲ୍ ବନ୍ଦ ରହିବ ବୋଲି ପୃଷ୍ଟି ସୂଚନା ଦେଇଛନ୍ତି।
ଅନ୍ୟପକ୍ଷରେ ନୟାପଲ୍ଲୀସ୍ଥିତ ବିଶାଲ ମେଗା ମାର୍ଟରେ ମଧ୍ୟ ସମାନ ଭାବେ ନିର୍ଦ୍ଦେଶକୁ ଉଲ୍ଲଂଘନ କରାଯାଇଥିବା ଖବର ପ୍ରକାଶ ପାଇଥିଲା। ଏନେଇ ବିଏମ୍ସି ତଦନ୍ତ ଜାରି ରଖିଛି। ଶନିବାର ବିଏମସି ଦକ୍ଷିଣ ପଶ୍ଚିମ ଜୋନର ଜୋନାଲ ଡେପୁଟି କମିଶନର ରବି ନାରାୟଣ ଜେଠୀ ନୟାପଲ୍ଲୀସ୍ଥିତ ବିଶାଲ ମେଗା ମାର୍ଟକୁ ଯାଞ୍ଚ କରିବେ। ମଲରେ ଖାଦ୍ୟ ଓ ଗ୍ରୋସରୀ ସାମଗ୍ରୀ ଛାଡି ଅନ୍ୟକିଛି ବିକ୍ରି ହୋଇଛି କି ନାହିଁ ତାହା ଯାଞ୍ଚ କରାଯିବ। ଏଥିସହ ଗାଇଡ ଲାଇନକୁ ପାଳନ କରାଯାଇ ନ ଥିବା ଜଣାପଡିଲେ ତାହାକୁ ମଧ୍ୟ ସିଲ୍ କରାଯିବ ବୋଲି ପୃଷ୍ଟି କହିଛନ୍ତି।
ସୂଚନାଯୋଗ୍ୟ, ପୂର୍ବରୁ ମଧ୍ୟ ଉକ୍ତ ମଲ୍କୁ ସିଲ୍ କରାଯାଇଥିଲା। ମଲ୍ କର୍ତ୍ତୃପକ୍ଷ ଗ୍ରୋସରୀ ସାମଗ୍ରୀ ବିକ୍ରି ପାଇଁ ବିଏମ୍ସିଠାରୁ ଅନୁମତି ଆଣି ୧୭ ତାରିଖରୁ ଅନ୍ୟସବୁ ବେପାର କରୁଥିଲେ। ହେଲେ ବିଏମ୍ସି ଅନୁମତି ଦେବାପରେ ତାହାର ଯାଞ୍ଚ କରୁ ନ ଥିବାରୁ ମଲ୍ ମାଲିକମାନେ ଲୋକଙ୍କ ଜୀବନ ସହ ଏପରି ଖେଳ ଖେଳୁଛନ୍ତି। ତେଣୁ ବିଏମ୍ସି ପକ୍ଷରୁ ଦିଆଯାଉଥିବା ନିର୍ଦ୍ଦେଶ ବା କଟକଣା ଠିକ୍ ଭାବେ ପାଳନ ହେଉଛି କି ନାହିଁ ତାହାର ତଦାରଖ କରାଯିବାର ଆବଶ୍ୟକତା ରହିଛି। ନଚେତ ବହୁ ଆଡ଼ମ୍ବରରେ ଲଘୁକ୍ରିୟା ପରି କରୋନା ସଂକ୍ରମଣକୁ ରୋକିବା କଷ୍ଟକର ହୋଇପଡିବ।
