ଖଣ୍ଡପଡ଼ା,୩୧ା୫(ସ୍ବ.ପ୍ର.)-୨ଦିନ ପରେ ସାବିତ୍ରୀ ବ୍ରତ। ଏଥିପାଇଁ ରାସ୍ତା ପାର୍ଶ୍ୱ, ସାହି, ବସ୍ତି, ଛକ ଓ ବଜାରରେ ଫଳ ବ୍ୟବସାୟୀ ପସରା ମେଲାଇଛନ୍ତି। ଶାଢ଼ି, ଚୁଡ଼ି, କସମେଟିକ୍ସ ଆଦି ଦୋକାନ/ବଜାରରେ ଦର ଆକାଶଛୁଆଁ ହୋଇଛି। ଏ ସମୟରେ ସମସ୍ତ ପ୍ରକାର ଜିନିଷର ଚାହିଦା ଅଧିକ ଥିବାରୁ ବ୍ୟବସାୟୀମାନେ ଦର ବୃଦ୍ଧି କରିବାକୁ ପଛାଉନାହାନ୍ତି। ଗୁରୁବାର ସକାଳେ ଖଣ୍ଡପଡ଼ା, ଖଳିସାହି, କଣ୍ଟିଲୋ, ବେଣାଗାଡିଆ, ସିଧାମୂଳା ଆଦି ବଜାରରେ ସୀମିତ ପରିମାଣରେ ଫଳ ରହିଥିବାରୁ ବ୍ୟବସାୟୀମାନେ ଫଳ ଓ ସାବିତ୍ରୀ ବ୍ରତ ପାଳନ ନିମନ୍ତେ ଆବଶ୍ୟକ ଜିନିଷକୁ ଚଢ଼ା ଦରରେ ବିକ୍ରି କରୁଥିବା ଦେଖାଯାଇଛି। ଆମ୍ବ, ପଣସ, ସପୁରି, ଲିଚୁ, କମଳା, ସପେଟା, ଅଙ୍ଗୁର, କଦଳୀ, ଜଙ୍ଗଲୀ କେନ୍ଦୁ, ଖଜୁରି, ତାଳ ଆଦି ଫଳମୂଳ ସହ ଗଜା ମୁଗର ଦର ଗ୍ରାହକଙ୍କ ମଧ୍ୟରେ ଅସନ୍ତୋଷ ସୃଷ୍ଟି କରିଛି। ତେଣୁ ଏ ସମୟରେ ବିବାହିତା କନ୍ୟା ପିତା ଏବଂ ସତ୍ୟବାନ ସାଜିଥିବା ସ୍ବାମୀଙ୍କ ମାନସିକ ଚାପ ଉଚ୍ଚରେ ରହିଥାଏ। ବିଶେଷ ଭାବେ ନୂଆ କରି ବିବାହ କରିଥିବା କନ୍ୟା ପିତାଙ୍କୁ ପାଇଁ ଏଭଳି ପରିସ୍ଥିତି ଆର୍ଥତ୍କ ବୋଝ ମନେ ହୋଇଥାଏ। କାରଣ ଦର ଯେତେ ଅଧିକ ହେଲେ ମଧ୍ୟ ସାବିତ୍ରୀ ଭାର ଦେବାକୁ ହିଁ ପଡ଼ିବ। ସ୍ତ୍ରୀ ମନ ରଖିବାକୁ ବିଚରା ସ୍ବାମୀମାନଙ୍କୁ ମଧ୍ୟ ଏ ସବୁ ଜିନିଷ କିଣିବାକୁ ପଡ଼ିବ। ଅବଶ୍ୟ ବିଭିନ୍ନ ସ୍ଥାନ ଏବଂ ଗୁଣବତ୍ତା ଅନୁସାରେ କେଉଁଠାରେ ଦର କମ୍ ଓ ଅଧିକ ରହିଛି। ତେବେ ଫନୀ ବାତ୍ୟା ଓଡ଼ିଶାରେ ଆମ୍ବ ଦର ବୃଦ୍ଧି ନିମନ୍ତେ ବେଶ୍ ସହାୟକ ହୋଇଥିବା ଲୋକେ କହୁଛନ୍ତି। ଆମ୍ବ କିଲୋ ପ୍ରତି ୪୦ରୁ ୫୦ଟଙ୍କା ଥିବାବେଳେ ସେଓ, ଅଙ୍ଗୁର, କମଳା କିଲୋ ପ୍ରତି ଶହେ ଟଙ୍କାରୁ ଅଧିକ, କଦଳୀ ଡଜନ ପ୍ରତି ସର୍ବନିମ୍ନ ୩୦ରୁ ୩୫, ସପୁରି ଗୋଟା ୩୦ରୁ ୪୦ଟଙ୍କା, ସପେଟା ୯୦ ଟଙ୍କା, ପଣସ ୧୦୦ ଟଙ୍କା, ଗୋଟାତାଳ ୫ଟଙ୍କା, କେନ୍ଦୁ ଗୋଟା ୫ଟଙ୍କା, ନଡ଼ିଆ ଗୋଟାକୁ ୨୫ରୁ ୩୦ଟଙ୍କା ହୋଇଥିବାବେଳେ କାକୁଡ଼ିି କିଲୋ ୩୦ଟଙ୍କା ରହିଛି। ଯେ କୌଣସି ମତେ ଓଡ଼ିଆ ବୋହୂ ଉପରୋକ୍ତ ଜିନିଷ କିଣି ଏହି ପାରମ୍ପରିକ ବ୍ରତ ପାଳନ କରିବେ। ପୌରାଣିକ କଥା ଅନୁସାରେ ନିଜର ନିଷ୍ଠା, ଭକ୍ତି, ସତୀତ୍ୱ, ପବିତ୍ରତା ଏବଂ ପତିବ୍ରତା(ସ୍ବାମୀ ହିଁ ବ୍ରତ)ଧର୍ମ ଯୋଗୁ ସାବିତ୍ରୀ ସ୍ବାମୀ ସତ୍ୟବାନଙ୍କୁ ମୃତ୍ୟୁର ଅଧିଶ୍ୱର ଯମରାଜଙ୍କଠାରୁ ଫେରାଇ ଆଣି ପାରିଥିଲେ। ତେଣୁ ହିନ୍ଦୁ ପରିବାରର ବିବାହିତା ମହିଳାମାନେ ସ୍ବାମୀଙ୍କ ଶୁଭକାମନା କରି ରୀତିନୀତି ଅନୁସାରେ ଏହି ପୂଜା କରିଥାନ୍ତି।
