ନୂଆପଡା ଅଫିସ,୩ା୮
ଜଣେ ସୁରକ୍ଷିତ ଶିଶୁ ହିଁ ଦେଶର ଉଜ୍ୱଳ ଭବିଷ୍ୟତ । ଶିଶୁଙ୍କୁ ଉପଯୁକ୍ତ ସୁରକ୍ଷା ଦେବା ସହ ତାଙ୍କର ଉଜ୍ଜ୍ୱଳ ଭବିଷ୍ୟତ ପାଇଁ ଆମକୁ ଅହରହ କାମ କରିବାକୁ ପଡିବ ବୋଲି ଜିଲାପାଳ ମଧୁସ୍ମିତା ସାହୁ କହିଛନ୍ତି । ସ୍ଥାନୀୟ ଜିଲାପାଳଙ୍କ ସଭାଗୃହରେ ଆୟୋଜିତ ଶିଶୁ ସୁରକ୍ଷା ବିଭାଗ ସମୀକ୍ଷା ବୈଠକରେ ଯୋଗଦେଇ ଜିଲାପାଳ ଏହା କହିଛନ୍ତି । ବୈଠକରେ ଜିଲାପାଳ ସାହୁ ଅଧ୍ୟକ୍ଷତା କରିଥିବାବେଳେ ଶିଶୁ କଲ୍ୟାଣ ସମିତି ଅଧ୍ୟକ୍ଷ ରମେଶ କୁମାର ଭୋଇ, ସଦସ୍ୟ କୁମୁଦ କୁମାର ହୋତା, ଅଶ୍ୱିନୀ କୁମାର ପାତ୍ର, ଏଲପିଓ ବିକାଶ ଲରେନ୍ସ, ପୋନିକ ରବୀନ୍ଦ୍ର କୁମାର ମହାଲିକ ପ୍ରମୁଖ ଯୋଗଦେଇଥିଲେ । ବୈଠକରେ ଶିଶୁ ସୁରକ୍ଷା ଅଧିକାରୀ ବଳଦେବ ରଥ ବୈଠକ ପରିଚାଳନା କରିଥିଲେ । ଏହି ଅବସରରେ ଉଦ୍ଧାର କରାଯାଇଥିବା ଶିଶୁଙ୍କୁ ଅଧିକାର ଦେବା ସହ ସେମାନଙ୍କୁ ସମାଜର ମୁଖ୍ୟ ସୋ୍ରତରେ ସାମିଲ କରିବାକୁ ଅନ୍ୟାନ୍ୟ ବିଭାଗ ସହ ପତା୍ରଚାର କରିବାକୁ ନିର୍ଦ୍ଦେଶ କରିଥିଲେ । ଶିଶୁ ଯତ୍ନ ଅନୁଷ୍ଠାନରେ ଶିଶୁଙ୍କୁ ଯଦି ପୋଷ୍ୟ ସନ୍ତାନ ଗ୍ରହଣୀୟ ଅଟନ୍ତି ତେବେ ସେଥିପ୍ରତି ସଯତ୍ନ କାର୍ଯ୍ୟ କରିବାକୁ ନିର୍ଦ୍ଦେଶ କରିଥିଲେ। ଶିଶୁଙ୍କୁ ଯତ୍ନର ସହ କାଉନସେଲିଂ କରି ମୁଖ୍ୟ ସ୍ରୋତରେ ସାମିଲ କରି ଶିକ୍ଷା ଓ ଆତ୍ମନିର୍ଭରଶୀଳ ହୋଇପାରିବେ ସେଥିପ୍ରତି ଯତ୍ନଶୀଳ ହେବାକୁ କହିଥିଲେ । ଏହିଭଳି ଜିଲାରେ ପୋକସୋ ଆକ୍ଟ (ପ୍ରୋଟେକ୍ସନ ଅଫ ଚାଇଲ୍ଡ ଫ୍ରମ ସେକ୍ସୁଆଲ ଅଫେନସେସ ଆକ୍ଟ) ଅଧୀନରେ ପୀଡିତ ଥିବା ଶିଶୁମାନଙ୍କୁ ଠିକ ନ୍ୟାୟିକ ମାର୍ଗଦର୍ଶନ କରିବା ସହ ଅନୁକମ୍ପାରାଶି ପ୍ରଦାନ ଦିଗରେ ତ୍ୱରିତ ପଦକ୍ଷେପ ନେବାକୁ ନିର୍ଦ୍ଦେଶ ଦିଆଯାଇଥିଲା। ଚଳିତବର୍ଷ ମୋଟ ୪୬ଜଣ ଶିଶୁଙ୍କୁ ବିଭିନ୍ନ ଅନୁଷ୍ଠାନରୁ ଉଦ୍ଧାର କରାଯାଇଛି। ସେମାନଙ୍କୁ ସେମାନଙ୍କ ପରିବାରକୁ ଫେରାଇ ଦିଆଯାଇ ପାରିଥିବାରୁ ଜିଲାପାଳ ଧନ୍ୟବାଦ ଦେଇଥିଲେ। ଗତ ଦିନରେ ବହୁ କାମ ହୋଇଛି। ହେଲେ ବର୍ତ୍ତମାନ ଗୁଣାତ୍ମକ କାମ କରିବାକୁ ଅଛି ବୋଲି ଜିଲାପାଳ ସମୀକ୍ଷା ବେଳେ କହିଥିଲେ। ଏଥିରେ ଅନ୍ୟମାନଙ୍କ ମଧ୍ୟରେ କର୍ମୀ ଶ୍ରୀନିବାସ ବେହେରା, ସୁଧୀର କ୍ଷତ୍ରି ପ୍ରମୁଖ ଯୋଗଦେଇଥିଲେ।
