ମୁମ୍ବାଇ: କରୋନା ଭାଇରସ୍ ସଂକ୍ରମଣକୁ ରୋକିବା ପାଇଁ କେନ୍ଦ୍ର ସରକାର ସାରା ଦେଶରେ ୨୧ ଦିନ ପର୍ଯ୍ୟନ୍ତ ଲକ୍ଡାଉନ୍ ଘୋଷଣା କରିଛନ୍ତି। ଏହି ଲକ୍ଡାଉନ୍ କର୍ଫ୍ୟୁ ସହ ସମାନ ବୋଲି ପ୍ରଧାନମନ୍ତ୍ରୀ କହିଥିବା ବେଳେ କେତେକ ଲୋକ ଏହାକୁ ମାନୁ ନ ଥିବା ଦେଖିବାକୁ ମିଳିଛି। ଏହି ସମୟରେ ଘରେ ରହିବାକୁ ସମସ୍ତେ ବାଧ୍ୟ। ହେଲେ ଆବଶ୍ୟକତା ନ ଥାଇ ଯେଉଁମାନେ ଘର ବାହାରକୁ ଆସୁଛନ୍ତି ପୋଲିସ ସେମାନଙ୍କ ଉପରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରୁଛି। ଲକ୍ଡାଉନ୍ ସମୟରେ ଲୋକଙ୍କ ପାଇଁ ସୋସିଆଲ ମିଡିଆ ଏବେ ଏକମାତ୍ର ସାହାରା ପାଲଟିଛି। ଲକ୍ଡାଉନ୍ ସମୟରେ ସାଧାରଣ ଲୋକ ଓ ସେଲିବ୍ରିଟି ନିଜର ଭିନ୍ନ ଭିନ୍ନ ଭିଡିଓ ଓ ଫଟୋ ଶେୟାର କରୁଛନ୍ତି। ଇତିମଧ୍ୟରେ କମେଡିଆନ ସୁନୀଲ ଗ୍ରୋଭରଙ୍କ ଏକ ମିମ୍ ଭାଇରାଲ ହେବାରେ ଲାଗିଛି। ସୁଲୀଲ ନିଜେ ଇନ୍ଷ୍ଟାଗ୍ରାମରେ ୨ଟି ମିମ୍କୁ ଶେୟାର କରିଥିବା ବେଳେ କ୍ୟାପଶନ୍ରେ ଲେଖିଛନ୍ତି, ଭଗବାନଙ୍କ ପାଇଁ ଘରେ ରୁହନ୍ତୁ। କାରଣ ବାହାରକୁ ଆସିଲେ ପୋଲିସର ମାଡ ଖାଇବାକୁ ପଡ଼ିବ। ଶେୟାର ହୋଇଥିବା ଗୋଟିଏ ମିମ୍ରେ ସୁନୀଲ ଘରୁ ବାହାରୁଥିବା ବେଳେ ଅନ୍ୟଟିରେ ପୋଲିସ ତାଙ୍କୁ ମାଡ଼ ମାରୁଥିବା ଦେଖିବାକୁ ମିଳିଛି। ସୁନୀଲ ନିଜର ଏହି ୨ଟି ମିମ୍ ଜରିଆରେ ଲୋକଙ୍କୁ ଘରେ ରହିବାକୁ ସଚେତନ କରିଛନ୍ତି। ଏହି ମିମ୍କୁ ଏପର୍ଯ୍ୟନ୍ତ ଦେଢ଼ଲକ୍ଷରୁ ଊର୍ଦ୍ଧ୍ୱ ୟୁଜର୍ସ ଲାଇକ୍ ଓ ଶେୟାର କରିସାରିଲେଣି। ଏହାପୂର୍ବରୁ କେତେକ ସେଲିବ୍ରିଟି ମଧ୍ୟ ଭିଡିଓ ଜରିଆରେ ପ୍ରଂଶସକଙ୍କୁ ଘରେ ରହିବାକୁ ନିବେଦନ କରିସାରିଛନ୍ତି।
