ବମ୍ବେ: ଚିରନିଦ୍ରାରେ ବଲିଉଡ୍ର ଭେଟେରାନ୍ ଅଭିନେତା ଇରଫାନ୍ ଖାନ୍। ବୁଧବାର ବମ୍ବେର କୋକିଲାବେନ୍ ହସ୍ପିଟାଲ୍ରେ ସେ ଶେଷ ନିଃଶ୍ୱାସ ତ୍ୟାଗ କରିଛନ୍ତି। ଏହି ଖବର ପ୍ରସାରିତ ହେବା ପରେ ବଲିଉଡ୍ରେ ଶୋକର ଛାୟା ଖେଳିଯାଇଛି। ଅପରପକ୍ଷେ ସମ୍ପ୍ରତି ଲକ୍ଡାଉନ୍ ସ୍ଥିତି ଜାରି ରହିଥିବାରୁ ଇରଫାନ୍ଙ୍କ ଶେଷ ଦର୍ଶନ ଏବଂ ଅନ୍ତ୍ୟେଷ୍ଟି କ୍ରିୟାରେ କଟକଣା ଲଗାଯାଇଛି। ଫଳରେ ତାଙ୍କର ଶବାଧାରରେ ମାତ୍ର ୨୦ଜଣ ଲୋକ ସାମିଲ ହେବେ। ବମ୍ବେର ବର୍ସୋବାରେ ଥିବା ସମାଧିସ୍ଥଳରେ ତାଙ୍କ ଅନ୍ତିମ ସଂସ୍କାର କରାଯିବ ବୋଲି ଜଣାପଡ଼ିଛି।
ଇରଫାନ୍ ବଲିଉଡ୍ର ପସନ୍ଦ କରାଯାଉଥିବା ଅଭିନେତା ମାନଙ୍କ ମଧ୍ୟରୁ ଜଣେ। ଏଣୁ ତାଙ୍କ ଶେଷ ଦର୍ଶନ ଲାଗି ଲୋକମାନଙ୍କ ଗହଳି ଲାଗି ଥାନ୍ତା। ମାତ୍ର ବର୍ତ୍ତମାନର ପରିସ୍ଥିତିରେ ଏହା ସମ୍ଭବ ନୁହେଁ। ଫଳରେ କେବଳ ସୋସିଆଲ ମିଡିଆ ମାଧ୍ୟମରେ ସମସ୍ତ ଅଭିନେତା/ଅଭିନେତ୍ରୀ ତଥା ପ୍ରଶଂସକମାନେ ଶୋକବାର୍ତ୍ତା ଦେଉଥିବା ଦେଖାଯାଇଛି।
