ନାଉଗଁା, ୨୭।୩ (ସ୍ବ.ପ୍ର.)-କରୋନା ଭୂତାଣୁ ସାରା ବିଶ୍ୱରେ ଆତଙ୍କ ସୃଷ୍ଟି କରିଛି। ସଂକ୍ରମଣକୁ ରୋକିବା ପାଇଁ ସାରା ଦେଶରେ ଲକ୍ଡାଉନ୍ କରାଯାଇଥିବା ବେଳେ କୌଣସି ଜରୁରୀ କାର୍ଯ୍ୟରେ ବାହାରକୁ ବାହାରିଲେ ସାମାଜିକ ଦୂରତା ବଜାୟ ରଖିବାକୁ ନିର୍ଦ୍ଦେଶ ଦିଆଯାଇଛି। ମାତ୍ର ନାଉଗଁା ବ୍ଲକରେ କେତେଜଣ ଠିକାଦାର ସରକାରଙ୍କ ଲକ୍ଡାଉନ୍ ନିୟମ ଉଲ୍ଲଂଘନ କରି ଶ୍ରମିକମାନଙ୍କୁ କାର୍ଯ୍ୟରେ ଲଗାଇଥିବା ଜଣାପଡ଼ିଛି। ନାଉଗଁା ବ୍ଲକର ଦେବୀ ନଦୀ ବନ୍ଧ ନିର୍ମାଣ କାର୍ଯ୍ୟ ଆଳିପିଙ୍ଗଳ ଜଳସେଚନ ବିଭାଗ ପକ୍ଷରୁ କରାଯାଉଛି। ରୋହିଆ ପଞ୍ଚାୟତ ଅରଖକୁଦଠାରେ ବନ୍ଧ କାର୍ଯ୍ୟ ଚାଲିଥିବା ବେଳେ ଲକ୍ଡାଉନ୍ ଯୋଗୁ କାର୍ଯ୍ୟ ବନ୍ଦ କରାଯାଇଛି। ମାତ୍ର ବନ୍ଧ ନିର୍ମାଣ ଦାୟିତ୍ୱରେ ଥିବା ଠିକାଦାର ଶ୍ରମିକଙ୍କୁ ଲଗାଇ କାର୍ଯ୍ୟ କରାଉଛନ୍ତି। ବୁଧବାର ରାସ୍ତା ନିର୍ମାଣ ଚାଲିଥିବା ବେଳେ ସେଠାରେ କୌଣସି ବିଭାଗୀୟ କର୍ତ୍ତୃପକ୍ଷ ଉପସ୍ଥିତ ନ ଥିବା ଦେଖାଯାଇଥିଲା। ମେଶିନ ସାହାଯ୍ୟରେ ମାଟି ଖୋଳା ଯାଉଥିବା ବେଳେ ଟ୍ରାକ୍ଟର ସାହାଯ୍ୟରେ ମାଟି ବୁହା କାମ ଚାଲୁଛି।
ଗୁରୁତ୍ୱପୂର୍ଣ୍ଣ କଥା ହେଲା, ନଦୀବନ୍ଧ ସୁଦୃଢ଼ କରିବା ସକାଶେ ପ୍ରତିବର୍ଷ ଲକ୍ଷାଧିକ ଟଙ୍କା ବ୍ୟୟ କରାଯାଉଛି। ମାତ୍ର ଠିକାଦାର ନିମ୍ନମାନର କାମ କରାଉଥିବାରୁ ଏହା ଦିନ କେଇଟା ପରେ ନଷ୍ଟ ହୋଇଯାଉଥିବା ଦେଖାଯାଉଛି। ଅନ୍ୟପଟେ ନଦୀପଠାରୁ ମାଟି ଖୋଳିବା ନିୟମ ନ ଥିବା ବେଳେ ଠିକାଦାର ମନଇଚ୍ଛା ପଠାରୁ ମାଟି ଖୋଳି ରାସ୍ତାରେ ପକାଉଛନ୍ତି। ମାତ୍ର ଏ ନେଇ ତହସିଲ ଅଫିସରେ ଏ ସମ୍ପର୍କିତ ଖବର ନ ଥିବା ତହସିଲଦାର ଜେ. କଳ୍ପନା ପ୍ରକାଶ କରିଛନ୍ତି। ବିଭାଗୀୟ ଯନ୍ତ୍ରୀ ସୁଷମା ସାହୁଙ୍କୁ ପଚାରିବାରେ, ନଦୀ ବନ୍ଧରେ ୩ ଇଞ୍ଚର ମୋରମ ପକାଇବାର ନିୟମ ରହିଛି, କିନ୍ତୁ ଠିକାଦାର ୧ ଇଞ୍ଚର ମୋରମ ପକାଉଥିବା ନେଇ ଅଭିଯୋଗ ହୋଇଛି ବୋଲି କହିଛନ୍ତି। ବର୍ତ୍ତମାନ ସମୟରେ କାର୍ଯ୍ୟସ୍ଥଳରେ କେହି ରହୁ ନ ଥିବାରୁ ଠିକାଦାର ମନଇଚ୍ଛା କାର୍ଯ୍ୟ କରି ବିଲ୍ କରିନେବାର ମସୁଧା ଚଳାଇଥିବା ଜନସାଧାରଣ ଅଭିଯୋଗ କରିଛନ୍ତି। ଏ ବିଷୟରେ ବିଭାଗୀୟ ନିର୍ବାହୀ ଯନ୍ତ୍ରୀ ପ୍ରମୋଦ କୁମାର ଶତପଥୀଙ୍କୁ ପଚାରିବାରେ ଏବେ ସମସ୍ତ ନିର୍ମାଣ କାର୍ଯ୍ୟ ବନ୍ଦ ରଖାଯାଇଛି। ଯଦି କୌଣସି ଠିକାଦାର ନିୟମ ନ ମାନି କାର୍ଯ୍ୟ କରୁଥାନ୍ତି, ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କହିଛନ୍ତି।
