କେନ୍ଦୁଝର,୨।୧(ସ୍ବ.ପ୍ର.): ପୂଜା ସାମଗ୍ରୀ ଆଣିବା ଲାଗି ନିକଟସ୍ଥ ଛକକୁ ଆସିଥିବାବେଳେ ରାସ୍ତାରେ ପାର୍ଶ୍ୱରେ ପଡ଼ି ଜଣେ ବୃଦ୍ଧଙ୍କର ମୃତ୍ୟୁ ଘଟିଛି।
ସୂଚନାଯୋଗ୍ୟ, କେନ୍ଦୁଝର ସଦର ବ୍ଲକ ଅନ୍ତର୍ଗତ ସାରସକେଲା ଗ୍ରାମର ଦୁଃଶାସନ ନାଏକ(୬୦) ସାରସକେଲା ଛକକୁ ବୁଧବାର ସନ୍ଧ୍ୟାରେ ନଡ଼ିଆ କଦଳୀ ପୂଜା ସାମଗ୍ରୀ କିଣିବାକୁ ଆସିଥିଲେ। ମାତ୍ର ସେ ଆଉ ଘରକୁ ଫେରି ନ ଥିଲେ। ତାଙ୍କ ପୁଅ ଦିଲୀପ ନୂଆବର୍ଷ ପାଇଁ କେନ୍ଦୁଝର ସହର ନିକଟ ବର୍ତ୍ତୀ ଗଣ୍ତସାହି ଅପା ଘରକୁ ଯାଇଥିଲେ। ରାତି ଦୁଃଶାସନ ନ ଫେରିବାରୁ ପରିବାର ଲୋକେ ବହୁ ଖୋଜାଖୋଜି କରିଥିଲେ ବି ପାଇ ନ ଥିଲେ। ତେବେ ଗୁରୁବାର ସକାଳେ ସ୍ଥାନୀୟ ଲୋକେ ତାଙ୍କୁ ପଡ଼ିଥିବା ଦେଖି ପରିବାର ଲୋକଙ୍କୁ ଖବର ଦେବାରୁ ସେମାନେ ଘଟଣାସ୍ଥଳରେ ପହଞ୍ଚି ଚିହ୍ନିଥିଲେ। ସେ ଅନ୍ଧାରରେ କିଛି ଦେଖି ନ ପାରି ପଡ଼ି ଯାଇଥିବା ବେଳେ ଅଧିକ ଶୀତରେ ମୃତ୍ୟୁ ଘଟିଥିବା ଜଣାପଡ଼ିଛି। ଖବର ପାଇ ପଳାଶପଙ୍ଗାଫାଣ୍ତି ପୋଲିସ ପହଞ୍ଚି ମୃତଦେହ କେନ୍ଦୁଝର ମୁଖ୍ୟ ଚିକିତ୍ସାଳୟକୁ ପଠାଇ ବ୍ୟବଚ୍ଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରିଛି।
