ହରିଦ୍ୱାର,୨୬।୫: ବିଭିନ୍ନ ସମୟରେ ମନ୍ତବ୍ୟ ଦେଇ ଚର୍ଚ୍ଚା ପରିସରକୁ ଆସୁଥିବା ବାବା ରାମଦେବ ପୁଣି ଥରେ ବିବାଦୀୟ ହୋଇପଡ଼ିଛନ୍ତି । ହରିଦ୍ୱାରରେ ଏକ ସଭାରେ ଯୋଗଦେଇ ରାମଦେବ କହିଛନ୍ତି ପରିବାରରେ ଜନ୍ମ ହେଉଥିବା ତୃତୀୟ ସନ୍ତାନକୁ ଭୋଟ ଦେବା ଅଧିକାରରୁ ବଞ୍ଚିତ କରିବା ଲାଗି ଆଇନ ପ୍ରଣୟନ ଉପରେ ସରକାର ଗୁରୁତ୍ୱଦେବା ଆବଶ୍ୟକ। ଏହା ସହିତ ନିର୍ବାଚନ ଲଢ଼ିବା ତଥା ସମସ୍ତ ସରକାରୀ ସୁବିଧା ସୁଯୋଗରୁ ତୃତୀୟ ସନ୍ତାନଙ୍କୁ ଦୂରେଇ ରଖିବା ଆବଶ୍ୟକ। ଏପରି ହେଲେ ଦେଶର ବଢୁଥିବା ଜନସଂଖ୍ୟାରେ ଅଙ୍କୁଶ ଲାଗିପାରିବ। ସମ୍ପ୍ରତି ଦେଶର ଜନସଂଖ୍ୟା ୧୫୦ କୋଟିରୁ ଅଧିକ ରହିଛି। ଆଗାମୀ ୫୦ ବର୍ଷ ମଧ୍ୟରେ ଭାରତର ସ୍ଥିତି ଖରାପ ହେବାର ଆଶଙ୍କା ରହିଛି। ତେଣୁ ଏଭଳି ଆଇନ ଅଣାଗଲେ ଲୋକଙ୍କ ମଧ୍ୟରେ ସଚେତନତା ବୃଦ୍ଧି ପାଇ ପାରନ୍ତା ବୋଲି ସେ କହିଛନ୍ତି। ଜାତି ଧର୍ମ ବର୍ଣ୍ଣ ନିର୍ବିଶେଷରେ ସମସ୍ତ ଜନସାଧାରଣ ଅଧିକ ସନ୍ତାନ ଜନ୍ମ ନ କରିବା ଉପରେ ସେ ଗୁରୁତ୍ୱାରୋପ କରିଛନ୍ତି। ରାମଦେବଙ୍କ ଏଭଳି ମନ୍ତବ୍ୟ ନେଇ ଏବେ ଚର୍ଚ୍ଚା ଆରମ୍ଭ ହୋଇଛି।
