ପୁରୀ ଅଫିସ,୨୬ା୨: ଶ୍ରୀଜଗନ୍ନାଥଙ୍କ ଅମୃତମଣୋହି ଜମି ହିସାବକୁ ନେଇ ଅଡୁଆ ପରିସ୍ଥିତି ସୃଷ୍ଟି ହୋଇଛି। ମହାପ୍ରଭୁଙ୍କ ସମୁଦାୟ ଜମି କେତେ, କେଉଁ କେଉଁ ଜାଗାରେ ରହିଛି, ସବୁ ଜମିର ହିସାବ ଅଛି କି ନାହିଁ ଏ ନେଇ ବିଧାନସଭାରେ ତଥ୍ୟ ରଖିଛନ୍ତି ଆଇନମନ୍ତ୍ରୀ ପ୍ରତାପ ଜେନା। ତେବେ ସବୁ ଜମିର ରେକର୍ଡ ଶ୍ରୀମନ୍ଦିର ପ୍ରଶାସନ ପାଖରେ ନ ଥିବା ଏବଂ ବେଆଇନ ଭାବେ ମହାପ୍ରଭୁଙ୍କ ଜମି ଜବରଦଖଲ ହୋଇଥିବା ନେଇ ମନ୍ତ୍ରୀ ତଥ୍ୟ ରଖିବା ପରେ ଏହାକୁ ବିଭିନ୍ନ ମହଲରେ ନିନ୍ଦା କରାଯାଇଛି। ଶ୍ରୀଜଗନ୍ନାଥ ମହାପ୍ରଭୁଙ୍କ ଜମିର ଯତ୍ନ ନେଇପାରୁ ନ ଥିବା ସରକାର କିପରି ସାଧାରଣ ଲୋକଙ୍କ ସମ୍ପତ୍ତିକୁ ସୁରକ୍ଷା ଦେଇପାରିବେ ସେ ନେଇ କ୍ଷୋଭ ପ୍ରକାଶ କରିଛନ୍ତି ଶ୍ରୀମନ୍ଦିର ସେବାୟତ, ବୁଦ୍ଧିଜୀବୀ ଓ ଜଗନ୍ନାଥପ୍ରେମୀ।
ମଙ୍ଗଳବାର ବିଧାନସଭାରେ ଆଇନ ମନ୍ତ୍ରୀ ରଖିଥିବା ବିବୃତି ଅନୁଯାୟୀ, ଓଡ଼ିଶାର ୨୪ଟି ଜିଲାରେ ମହାପ୍ରଭୁଙ୍କର ୬୦୪୨୬.୯୪୩ ଏକର ଜମି ଚିହ୍ନଟ କରାଯାଇଛି। ଏଥିମଧ୍ୟରୁ ବର୍ତ୍ତମାନ ସୁଦ୍ଧା ୩୪୮୦୩.୦୧୩ ଏକର ଜମିର ଚୂଡ଼ାନ୍ତ ସ୍ବତ୍ୱଲିପି ଶ୍ରୀମନ୍ଦିର ପ୍ରଶାସନ ପାଖରେ ରହିଛି। ତେବେ ମନ୍ତ୍ରୀଙ୍କ ଏହି ତଥ୍ୟ ପ୍ରଦାନ ପରେ ପ୍ରାୟ ୨୫ ହଜାର ଏକର ଜମିର ହିସାବ ସରକାରଙ୍କ ପାଖରେ ନ ଥିବା ସ୍ପଷ୍ଟ ହୋଇଛି। ଅପରପକ୍ଷେ ମହାପ୍ରଭୁଙ୍କ ଜମିକୁ ବେଆଇନ ଭାବେ ଜବରଦଖଲ କରିଥିବା ବ୍ୟକ୍ତିବିଶେଷଙ୍କୁ ଚିହ୍ନଟ କରାଯାଇଛି। ଏହି ଜବରଦଖଲକୁ ଉଚ୍ଛେଦ କରାଯିବା ନିମନ୍ତେ ୮୬୪ଟି ମାମଲା ସମ୍ପୃକ୍ତ ତହସିଲଦାରଙ୍କ ନିକଟରେ ମନ୍ଦିର ପ୍ରଶାସନ ପକ୍ଷରୁ ଦାଏର କରାଯାଇଥିବା ମନ୍ତ୍ରୀ ସୂଚନା ଦେଇଛନ୍ତି। ତେବେ ଏଭଳି ତଥ୍ୟ ଜଣାପଡିବା ପରେ ଶ୍ରୀମନ୍ଦିର ସେବାୟତ, ଜଗନ୍ନାଥପ୍ରେମୀ ଏବଂ ବୁଦ୍ଧିଜୀବୀ କ୍ଷୋଭ ପ୍ରକାଶ କରିଛନ୍ତି। ସେବାୟତ ବିନାୟକ ଦାସ ମହାପାତ୍ର କହିଛନ୍ତି, ମହାପ୍ରଭୁଙ୍କ ଜମି ପ୍ରତି ସରକାର କେତେ ଯତ୍ନଶୀଳ ତାହା ଏଥିରୁ ସ୍ପଷ୍ଟ ହେଉଛି। କଟକ, ପୁରୀ, ଖୋର୍ଦ୍ଧା ସମେତ ବିଭିନ୍ନ ଜିଲାରେ ମହାପ୍ରଭୁଙ୍କ ସମ୍ପତ୍ତି ବହୁ ବଡ଼ବଡ଼ିଆ ମାଡ଼ି ବସିଛନ୍ତି। ସେଥିରେ ଘରଦ୍ୱାର କରିବା ସହ କେହି କେହି ଅନ୍ୟମାନଙ୍କୁ ଭଡ଼ା ବି ଦେଇଛନ୍ତି। ହେଲେ ସରକାର ସେମାନଙ୍କ ବିରୋଧରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରିପାରୁ ନାହାନ୍ତି। ତେଣୁ ମହାପ୍ରଭୁଙ୍କ ଜମି ମୁକ୍ତ ହୋଇପାରୁ ନ ଥିବାବେଳେ ଶ୍ରୀମନ୍ଦିରକୁ ମଧ୍ୟ ଟଙ୍କାଟିଏ ରାଜସ୍ବ ଆସୁନାହିଁ। ପୁରୀ ସହରର ବୁଦ୍ଧିଜୀବୀ ସରୋଜ କୁମାର ବେହେରା କହିଛନ୍ତି, ମହାପ୍ରଭୁଙ୍କ ଜମିର ହିସାବ ଠିକ୍ ଭାବେ ନ ରଖିବା ନିଶ୍ଚିତ ଦୁର୍ଭାଗ୍ୟଜନକ ବିଷୟ। ପ୍ରଥମରୁ ଠାକୁରଙ୍କ ଜମିକୁ ସୁରକ୍ଷା କାହିଁକି ଦିଆଗଲା ନାହିଁ। ବର୍ତ୍ତମାନ ଲୋକେ ଘରଦ୍ୱାର କରି ରହିଲା ପରେ ମହାପ୍ରଭୁଙ୍କ ଜମି କହି ସେମାନଙ୍କୁ ହଇରାଣ କରାଯାଉଛି। ସରକାରଙ୍କ ଅବହେଳାରୁ ଆଜି ଜମି ହିସାବ ବାଉଳା ରହିଛି ବୋଲି ସେ କହିଛନ୍ତି। ସରକାରଙ୍କ ପାଖରେ ଯଦି ଶ୍ରୀଜଗନ୍ନାଥ ମହାପ୍ରଭୁଙ୍କ ସବୁ ଜମିର ହିସାବ ରହିଛି ତେବେ ଏହାର ରେକର୍ଡପତ୍ର କରାଯାଉ ନାହିଁ କାହିଁକି ବୋଲି ପ୍ରଶ୍ନ କରିଛନ୍ତି ମହେଶ୍ୱର ପ୍ରଧାନ। ସେ କହିଛନ୍ତି ଏହା ଅବହେଳାକୁ ଦର୍ଶାଉଛି। ତେଣୁ ତୁରନ୍ତ ସମ୍ପୃକ୍ତ ଜିଲାପାଳମାନଙ୍କ ସହ ଯୋଗାଯୋଗ କରି ମହାପ୍ରଭୁଙ୍କ ସମ୍ପତ୍ତି ଉଦ୍ଧାର କରିବା ଦରକାର।
