ନୟାଗଡ଼ ଅଫିସ, ୪ା୮: ମିଥ୍ୟା ବିଲ୍ କରିବା ୩ ସରକାରୀ କର୍ମଚାରୀଙ୍କ ପାଇଁ ମହଙ୍ଗା ପଡ଼ିଛି। ସେମାନଙ୍କଠାରୁ ୩ମାସ ଭିତରେ ୬୬ ହଜାର ୫୫୦ ଟଙ୍କା ଲେଖାଏ ଭରଣା କରାଯିବ। ସରକାରୀ ଟଙ୍କା ଆତ୍ମସାତ୍ କରିବା ଅଭିଯୋଗରେ ଏହି ଟଙ୍କା ସେମାନଙ୍କଠାରୁ ଭରଣା କରାଯିବ ବୋଲି ଗତ ୩୧ତାରିଖରେ ଜିଲାପାଳଙ୍କ କୋର୍ଟରେ ଶୁଣାଣି ହୋଇଛି। ସମ୍ପୃକ୍ତ କର୍ମଚାରୀମାନେ ହେଲେ ନୟାଗଡ଼ ଜିଲା ଓଡ଼ଗାଁ ବ୍ଲକର ସହକାରୀ ନିର୍ବାହୀ ଯନ୍ତ୍ରୀ ଶରତ କୁମାର ମଲ୍ଲିକ, ଜିପିଟିଏ ସୁଶାନ୍ତ କୁମାର ନନ୍ଦ ଓ ହରିହରପୁର ପଞ୍ଚାୟତର ଗ୍ରାମ ରୋଜଗାର ସେବକ ପ୍ରଣବ ପ୍ରକାଶ ମିଶ୍ର।
ଓଡ଼ଗାଁ ବ୍ଲକ ହରିହରପୁର ପଞ୍ଚାୟତ କରଡ଼ା ରଘୁନାଥପୁର ଶାସନର ଦୀନବନ୍ଧୁ ଓ କୈଳାସ ପ୍ରଧାନଙ୍କ ନାମରେ ମୋ ପୋଖରୀ ଯୋଜନାରେ ପୋଖରୀ ଖୋଳାଇବା ପାଇଁ କାର୍ଯ୍ୟାଦେଶ ମଞ୍ଜୁର ହୋଇଥିଲା। ୧୫ ଏପ୍ରିଲ ୨୦୧୭ରେ ସେମାନଙ୍କୁ ପଥରଗଡ଼ ମୌଜାର ଖାତା ନଂ. ୫୫/୧୫, ପ୍ଲଟ ନଂ. ୩୮୮ର ୫୧ ଡେସିମିଲ ଜାଗାରେ ପୋଖରୀ ଖୋଳିବା ପାଇଁ କାର୍ଯ୍ୟାଦେଶ ଦିଆଯାଇଥିଲା। ପୋଖରୀ ପାଇଁ ପର୍ଯ୍ୟାୟ କ୍ରମେ ୪ଟି କିସ୍ତିରେ ୧ ଲକ୍ଷ ୯୯ ହଜାର ୫ଶହ ଟଙ୍କା ପ୍ରଦାନ କରାଯାଇଥିଲା। ହେଲେ ଉକ୍ତ ସ୍ଥାନରେ ପୋଖରୀ ହୋଇ ନ ଥିବାରୁ କିଛି ବ୍ୟକ୍ତି ଏ ନେଇ ଓଡ଼ଗାଁ ତହସିଲ କାର୍ଯ୍ୟାଳୟରେ ଆରଟିଆଇରେ ତଥ୍ୟ ମାଗିଥିଲେ। ଏହି ତଥ୍ୟ ଅନୁଯାୟୀ ପୋଖରୀ ଖୋଳାହେବା ପାଇଁ ଦିଆଯାଇଥିବା ପ୍ଲଟ ନମ୍ବରରେ କୌଣସି ପୋଖରୀ ନ ଥିବା ସୂଚନା ମିଳିଥିଲା। ଉକ୍ତ ସ୍ଥାନରେ ପଡ଼ିଆ ଓ କିଛି ଅନାବାଦୀ ଗଛ ରହିଥିବା ଓଡ଼ଗାଁ ତହସିଲ କାର୍ଯ୍ୟାଳୟର ଜନ ସୂଚନା ଅଧିକାରୀ (ପିଆଇଓ) ଲିଖିତ ଭାବେ ଜଣାଇଥିଲେ। ପରେ ୧୬ ଡିସେମ୍ବର ୨୦୧୮ରେ ହରିହରପୁର ପଞ୍ଚାୟତର କେତେଜଣ ଲୋକ ଜିଲାପାଳଙ୍କଠାରେ ଏହାର ତଦନ୍ତ ପାଇଁ ଅଭିଯୋଗ କରିଥିଲେ। ୧୯ ଡିସେମ୍ବରରେ ମିଥ୍ୟା ବିଲ୍ କରି ଟଙ୍କା ହଡ଼ପ ଶୀର୍ଷକ ଏକ ଖବର କେବଳ ଧରିତ୍ରୀରେ ପ୍ରକାଶ ପାଇଥିଲା। ଏହା ପରେ ତଦନ୍ତ କରାଯିବାରୁ ସମ୍ପୃକ୍ତ କର୍ମଚାରୀମାନେ ଉକ୍ତ ସ୍ଥାନ ନିକଟରେ ଏମ୍ଜିଏନ୍ଆର୍ଇଜିଏସ୍ରେ ହୋଇଥିବା ପୋଖରୀ ଦେଖାଇଥିଲେ। ତଦନ୍ତରେ ବିଳମ୍ବ ହେବାରୁ ପଞ୍ଚାୟତର ନାଏବ ସରପଞ୍ଚ ଅନନ୍ତ ଚରଣ ନାୟକଙ୍କ ସମେତ ୫ ଜଣ ବ୍ୟକ୍ତି ଏ ନେଇ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ। ୧୪ ଡିସେମ୍ବର ୨୦୧୮ରେ ଜିଲାପାଳଙ୍କ ସମେତ ହାଇକୋର୍ଟ ୬ ଜଣଙ୍କୁ ପକ୍ଷ ରଖିଥିଲେ। ଜିଲାପାଳଙ୍କୁ ଏହାର ତଦନ୍ତ ପାଇଁ ହାଇକୋର୍ଟ ନିର୍ଦ୍ଦେଶ ଦେଇଥିଲେ। ଜିଲାପାଳ ଏହି ଦାୟିତ୍ୱ ଓଡ଼ଗାଁ ତହସିଲଦାରଙ୍କ ଉପରେ ନ୍ୟସ୍ତ କରିଥିଲେ। ଓଡ଼ଗାଁ ତହସିଲଦାର ତଦନ୍ତ କରିବାରୁ ଉକ୍ତ ସ୍ଥାନରେ କୌଣସି ପୋଖରୀ ନ ଥିବା ନେଇ ଜିଲାପାଳଙ୍କୁ ରିପୋର୍ଟ ଦେଇଥିଲେ।
