ଭାପୁର/ଖଣ୍ଡପଡା,୧୧ା୬(ଡି.ଏନ.ଏ./ସ୍ବ.ପ୍ର.)- ଭାପୁର ବ୍ଲକ ସଦର ମହକୁମାରେ ଯୁକ୍ତ ୩ ମହାବିଦ୍ୟାଳୟ ପ୍ରତିଷ୍ଠା ଦାବି ଜୋର ଧରିଛି। ରବିବାର ଏହି ମର୍ମରେ ଏକ ଗୁରୁତ୍ୱପୂର୍ଣ୍ଣ ବୈଠକ ସ୍ଥାନୀୟ ଯୁକ୍ତ ୨ ମହାବିଦ୍ୟାଳୟ ପରିସରରେ ଅନୁଷ୍ଠିତ ହୋଇଥିଲା। ଶିକ୍ଷାବିତ୍ ଲୋକନାଥ ଆଚାର୍ଯ୍ୟ ଏଥିରେ ଅଧ୍ୟକ୍ଷତା କରିଥିଲେ। ଯୁକ୍ତ ୩ ମହାବିଦ୍ୟାଳୟ ପ୍ରତିଷ୍ଠା ପାଇଁ ଉଚ୍ଚ ଶିକ୍ଷା ବିଭାଗ ନିର୍ଦ୍ଧାରଣ କରିଥିବା ନୀତିନିୟମ ସମ୍ପର୍କରେ ଅଧ୍ୟାପକ ସୁମନ୍ତ କୁମାର ଜେନା ସୂଚନା ପ୍ରଦାନ କରିଥିଲେ। ନୟାଗଡ ବିଧାୟକ ଡ. ଅରୁଣ କୁମାର ସାହୁ ଉଚ୍ଚ ଶିକ୍ଷା ମନ୍ତ୍ରୀ ହୋଇଥିବାରୁ ବୈଠକରେ ତାଙ୍କୁ ସ୍ବାଗତ କରାଯାଇଥିଲା। ଅପରପକ୍ଷେ ଏଠାରେ ଏହି ଶିକ୍ଷାନୁଷ୍ଠାନ ପ୍ରତିଷ୍ଠା କରାଯିବା କ୍ଷେତ୍ରରେ ସ୍ଥାନୀୟ ଏମ୍ପି, ବିଧାୟକ, ବ୍ଲକ ଅଧ୍ୟକ୍ଷ, ସମସ୍ତ ସରପଞ୍ଚ, ସମିତି ସଭ୍ୟ ତଥା ବିଶିଷ୍ଟ ବ୍ୟକ୍ତିଙ୍କ ସହଯୋଗ କାମନା କରାଯାଇଥିଲା। ମହାବିଦ୍ୟାଳୟ ନାମରେ କିଭଳି ଯଥାଶୀଘ୍ର ୫ ଏକର ଜମି ହୋଇପାରିବ ସେ ସମ୍ପର୍କରେ ଆଲୋଚନା କରାଯାଇଥିଲା। ଏହି ଅବସରରେ ୩ଟି ସମନ୍ବୟ କମିଟି ଗଠନ କରାଯାଇଥିଲା। ବୈଠକରେ ଶିକ୍ଷାବିତ୍ ପ୍ରଫୁଲ୍ଲ କୁମାର ଲେଙ୍କା, ରବୀନ୍ଦ୍ର କୁମାର ପଟ୍ଟନାୟକ, ଜଗନ୍ନାଥ ବାରିକ, ଗଗନ ବିହାରୀ ତ୍ରିପାଠୀ, ଜିତେନ୍ଦ୍ର କୁମାର ରଣସିଂ, ଭାପୁର, ଗୋଳାପୋଖରୀ, ଫତେଗଡ ସରପଞ୍ଚ ଯଥାକ୍ରମେ ପ୍ରସନ୍ନ କୁମାର ନାୟକ, ଲକ୍ଷ୍ମୀଧର ସାମନ୍ତରାୟ, ତୋଫାନ ପ୍ରଧାନ ପ୍ରମୁଖ ଅତିଥି ଭାବେ ଯୋଗଦେଇଥିଲେ। ଅଞ୍ଚଳବାସୀଙ୍କ ତରଫରୁ ବିଜୟ କୁମାର ସାମନ୍ତରାୟ, କାର୍ତ୍ତିକ ପ୍ରଧାନ, ନିରଞ୍ଜନ ଦଳବେହେରା, କୃଷ୍ଣଚନ୍ଦ୍ର ରାଉତରାୟ, ପ୍ରବୋଧ କୁମାର ସାହୁ, ରମେଶ ଚନ୍ଦ୍ର ବରାଡ ପ୍ରମୁଖ ଉପସ୍ଥିତ ରହି ସେମାନଙ୍କ ମତାମତ ପ୍ରଦାନ କରିଥିଲେ।
