କୃଷ୍ଣପ୍ରସାଦ,୧ା୪(ଡି.ଏନ୍.ଏ)- ପୁରୀ ଜିଲା କୃଷ୍ଣପ୍ରସାଦ ବ୍ଲକର ଲକଡାଉନ ଅଞ୍ଚଳକୁ ବ୍ରହ୍ମଗିରି ନିର୍ବାଚନ ମଣ୍ଡଳୀ ବିଧାୟକ ଲଳିତେନ୍ଦୁ ବିଦ୍ୟାଧର ମହାପାତ୍ର ବୁଧବାର ପରିଦର୍ଶନ କରିଛନ୍ତି। କରୋନା ସଂକ୍ରମଣରୁ ରକ୍ଷା ପାଇଁ ହୋଇଥିବା ଲକଡାଉନରେ ବିଭିନ୍ନ ସମସ୍ୟା ଉପରେ ବିଡିଓ ଅଭିମନ୍ୟୁ ମାଝି, ତହସିଲଦାର ଜିତେନ୍ଦ୍ର ନାୟକଙ୍କ ସହ ଆଲୋଚନା କରିଥିଲେ। ସ୍ବାସ୍ଥ୍ୟସେବା ଯୋଗାଇ ଦେବା ପାଇଁ ଚିଲିକା ନୂଆପଡା ଗୋଷ୍ଠୀ କେନ୍ଦ୍ର ଏବଂ କୃଷ୍ଣପ୍ରସାଦ ଗୋଷ୍ଠୀକେନ୍ଦ୍ର ପରିଦର୍ଶନ କରି ଡାକ୍ତରଙ୍କ ସହ ଆଲୋଚନା କରିଥିଲେ। କୃଷ୍ଣପ୍ରସାଦ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଆବଶକୀୟ ଡାକ୍ତର ନ ଥିବା ଏବଂ ପାନୀୟଜଳର ବ୍ୟବସ୍ଥା ନ ଥିବା ଯୋଗୁ କ୍ଷୋଭ ପ୍ରକାଶ କରିଥିଲେ। ଏ ନେଇ ଜିଲାପାଳଙ୍କ ସହ ଆଲୋଚନା କରିବା ପାଇଁ ସେ କହିଥିଲେ। ପରେ ନୂଆପଡା ସମିତିସଭ୍ୟ ଉତ୍ତମ କୁମାର ତରେଇଙ୍କ ସହ ଏକ ବାଇକରେ ଜହ୍ନିକୁଦା ଗାଟଠାରୁ ଚିଲିକା ପର୍ଯ୍ୟନ୍ତ ବୁଲି ଦେଖିଥିଲେ। ସେହିଭଳି ସରପଞ୍ଚ ମିଟୁସିଂହ ସାମନ୍ତ, କୁମାରସିଂହଙ୍କ ସହ ବିଭିନ୍ନ ସମସ୍ୟା ଉପରେ ଆଲୋଚନା କରିଥିଲେ।
