ଚାନ୍ଦବାଲି,୬ା୧୧(ଡି.ଏନ.ଏ.)-ଆଖିକୁ ଭଲ ଦେଖାଯାଉ ନ ଥିବା ଜଣେ ୯୦ ବର୍ଷର ବୃଦ୍ଧାଙ୍କୁ କେହି ଆଣି ଭଦ୍ରକ ଜିଲା ଚାନ୍ଦବାଲି ଏନଏସି ଆହାର କେନ୍ଦ୍ର ବାରଣ୍ଡାରେ ସୋମବାର ସକାଳେ ଛାଡି ଚାଲିଯାଇଥିବା ଦେଖିବାକୁ ମିଳିଥିଲା। ଏହି ଘଟଣା ସ୍ଥାନୀୟ ଅଞ୍ଚଳବାସୀଙ୍କୁ ଆଲୋଡିତ କରିଥିଲା। ଖବର ପାଇ ଚାନ୍ଦବାଲି ତହସିଲଦାର ସତ୍ୟଜିତ ରାଉତ ସନ୍ଧ୍ୟାରେ ଆହାର କେନ୍ଦ୍ରରେ ପହଞ୍ଚି ଅସହାୟ ବୃଦ୍ଧାଙ୍କୁ ଉଦ୍ଧାର କରିଥିଲେ। ତାଙ୍କ ସ୍ବାସ୍ଥ୍ୟବସ୍ଥା ଭଲ ନ ଥିବାରୁ ତହସିଲଦାର ଆମ୍ବୁଲାନ୍ସ ମଗାଇ ତାଙ୍କୁ ଚାନ୍ଦବାଲି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ପଠାଇଥିଲେ। ମଙ୍ଗଳବାର ସ୍ଥାନୀୟ ଲୋକେ ସ୍ବାସ୍ଥ୍ୟକେନ୍ଦ୍ରକୁ ଯାଇ ଏହି ବୃଦ୍ଧାଙ୍କୁ ଭେଟି ସହାୟତାର ହାତ ବଢାଇବା ସହ ବିସ୍କୁଟ, କମ୍ବଳ ଆଦି ଯୋଗାଇ ଦେଇଛନ୍ତି।
ବୃଦ୍ଧାଙ୍କ ଘର ଚାନ୍ଦବାଲିଠାରୁ ୪ କି.ମି. ଦୂର ମହୁଲିଆ ଗ୍ରାମରେ। ପୈତୃକ ଜମିବାଡି ଯାହାଥିଲା, ଅଭାବ ଅନଟନ ଯୋଗୁ ତାକୁ ବିକ୍ରି କରିଦେଇଛନ୍ତି। ତାଙ୍କର ଜଣେ ପୁଅ କେନ୍ଦ୍ରାପଡାରେ ବିବାହ କରି ଶ୍ୱଶୁର ଘରେ ରହୁଥିବାରୁ କନ୍ତଳା ସେଠାକୁ ଯାଇ କିଛି ଦିନ ରହିଥିଲେ। ପରେ ସେ ଗାଁକୁ ଫେରିଥିବା କୁହାଯାଉଛି। ତେବେ କିଏ ଆଣି ତାଙ୍କୁ ଆହର କେନ୍ଦ୍ରରେ ଅସହାୟ ଅବସ୍ଥାରେ ଛାଡିଗଲେ, ସେ ନେଇ ପ୍ରଶାସନ କୌଣସି ସୂଚନା ପାଇପାରି ନାହିଁ ା ସୋମବାର ଆହାର କେନ୍ଦ୍ର ବାରଣ୍ଡାରେ ସେ ବସି ରହିଥିବା ବେଳେ ହାତରେ ଧରିଥିଲେ ଖଣ୍ଡିଏ ବାଡି । ପାଖରେ ଥିଲା ଗୋଟିଏ ପାଣି ବୋତଲ । ଆହାର କେନ୍ଦ୍ରର ଜଣେ କର୍ମଚାରୀ ମଧ୍ୟାହ୍ନ ସମୟରେ କିଛି ଖାଦ୍ୟ ଆଣି ଖାଇବାକୁ ଦେଇଥିଲେ। ଅପରାହ୍ନ ଯାଇ ସନ୍ଧ୍ୟା ମାଡି ଆସିବାରୁ ବୃଦ୍ଧାଜଣଙ୍କ ଅଧିକ ଅସହାୟ ହୋଇପଡିଥିଲେ। ଚଲାବୁଲା କରି ଗାଁକୁ ଯିବା ସକାଶେ ଦେହରେ ଶକ୍ତି ନ ଥିବାରୁ ସେ କନ୍ଦାକଟା କରିଥିଲେ। ସ୍ଥାନୀୟ ଲୋକେ ଏ ସମ୍ପର୍କରେ ତହସିଲଦାରଙ୍କୁ ଜଣାଇବାରୁ ସେ ଆସି ତାଙ୍କୁ ଉଦ୍ଧାର କରିଥିଲେ। ପୋଲିସ ବ୍ୟସ୍ତ ଥିବା ଯୋଗୁ ଏଥିରେ ମୁଣ୍ଡ ଖେଳାଇ ପାରି ନ ଥିବା କୁହାଯାଉଛି। ଏହି ଅସହାୟ ବୃଦ୍ଧାଙ୍କୁ ପ୍ରଶାସନ ପକ୍ଷରୁ ଯଥାସମ୍ଭବ ସହାୟତା ଯୋଗାଇ ଦିଆଯିବ ବୋଲି ତହସିଲଦାର ରାଉତ କହିଛନ୍ତି।
